سرکار نے سرکاری افسراں دی ترقی دے طریقہ کار وچ تبدیلی کر دتی

اسلام آباد: وفاقی حکومت ولوں سول سرونٹس رولز 2019ء جاری کر دتے گئے نیں۔ نویں رولز وچ بورڈز دے اختیارات وچ وادھا کر دتا گیا اے۔

دستاویز دے مطابق سول سرونٹس رولز 2019ء دے تحت کارکردگی جائزہ رپورٹ دے نمبرز وچ دس فیصد دی کمی کر دتی گئی اے۔

پرفارمنس ایویلیشن رپورٹاں دے نمبر 50توں گھٹ کرکے 40جد کہ ٹریننگ ایویلیشن رپورٹاں دے نمبر وچ 5فیصد کمی کرکے 30فیصد کر دتے گئے نیں۔

دستاویز دے مطابق سنٹرل سلیکشن بورڈ تے ڈیپارٹمنٹل سلیکشن بورڈ دے اختیارات وچ وادھا کیتا گیا اے تے بورڈز دے نمبر پندرہ فیصد توں ودھا کے 30فیصد کر دتے گئے نیں۔ پسماندہ علاقیاں وچ خدمات سرانجام دین والے افسراں نوں ترقی لئی ترجیح دتی جاوے گی۔

افسراں دی ترقی سلیکشن بورڈ دے ممبراں دی اجتماعی رائے تے منحصر کرے گی تے پرفارمنس ایویلیشن رپورٹ ای ترقی دا واحد کریٹیریانہیں ہووے گی۔ دستاویز دے مطابق سرکاری تربیتی اداریاں وچ خدمات سرانجام دین والے افسراں نوں ترقی لئی اضافی پوائنٹس دتے جان گے۔