چیف الیکشن کمشنر دی تقرری: سرکار تے اپوزیشن نویں ناں لیان تے متفق

اسلام آباد: نویں چیف الیکشن کمشنر دی تعیناتی تے ڈیڈ لاک دے خاتمے تے پیش رفت، سرکار تے اپوزیشن چیف الیکشن کمشنر لئی نویں ناں لیان تے متفق ہو گئے۔

وسیلیاں دے مطابق اپوزیشن تے سرکار نے چیف الیکشن کمشنر لئی دتے گئے ناں واپس لے لئے، سرکار تے اپوزیشن کجھ دن وچ دوبارہ نویں ناں پارلیمانی کمیٹی نوں گھلے گی، اگلے ہفتے چیف الیکشن کمشنر تے ممبراں دی تقرری بارے پارلیمانی کمیٹی دا اجلاس متوقع اے۔

ذرائع دے مطابق سرکار نے چیف الیکشن کمشنر لئی نویں اٹھ ناواں دی ابتدائی فہرست بنا لئی، سرکار نے نویں ناواں دی چھان بین تے ٹریک ریکارڈ ویکھنا شروع کر دتا۔ اپوزیشن تے سرکار وچ ڈیڈ لاک آن تے نویں ناں لیائے جا رہے نیں۔ خیال رہوے سرکار نے پہلاں بابر یعقوب، فضل عباس میکن، عارف خان دے ناں تجویز کیتے سن جد کہ اپوزیشن نے ناصر کھوسہ، جلیل عباس جیلانی، اخلاق تارڑ دے ناں تجویز دتے سن۔