الیکشن کمیشن ارکان دی تعیناتی تے سرکار نوں ہور 10دیہاڑ دی مہلت

اسلام آباد: اسلام آباد ہائی کورٹ نے الیکشن کمیشن ارکان دی تعیناتی تے سرکار نوں ہور 10دیہاڑ دی مہلت دے دتی۔ چیف جسٹس ہائی کورٹ جسٹس اطہر من اللہ نے ریمارکس دتے پارلیمنٹ سپریم اے۔ پارلیمان مضبوط ہووے گا تے پاکستان مضبوط ہووے گا۔

الیکشن کمیشن دے دو ارکان تعیناتی کیس دی سنوائی شروع ہوئی تے قومی اسمبلی دے لیگل ایڈوائزر نے دسیا کہ اوہ ممبران الیکشن کمیشن تے تقریباً اتفاق ہو چکیا، چیف الیکشن کمشنر دا ناں واپس لے لیا گیا، ہن سرکار اپوزیشن نویں ناں دین گیاں۔ ن لیگ دے وکیل جہانگیر جدون نے دسیا کہ اسیں کوشش کر رہے آں، آرمی چیف دی توسیع دے معاملے تے وی اتفاق نال چلاں گے۔

چیف جسٹس اسلام آباد ہائی کورٹ اطہر من اللہ نے ریمارکس دتے ایہ خوش آئند گل اے پارلیمنٹ دی بے توقیری نہیں ہوئی، پارلیمنٹ دا تقدس تے آئین دی سربلندی ضروری اے، ارکان پارلیمنٹ جہڑے لوکاں دی نمائندگی کردے نیں اوہناں نوں تہاڈے توں بہت توقعات نیں، عدالت معاملہ آن نال پارلیمنٹرینز نوں منتخب کرن والے عوام دی بے توقیری ہوندی اے۔

محسن شاہ نواز رانجھا سنے لیگی رہنماواں نے الیکشن کمیشن ارکان دی تقرری نوں چیلنج کر رکھیا اے۔ اسلام آباد ہائی کورٹ نے الیکشن کمیشن ارکان دی تعیناتی تے سرکار نوں ہور 10 دیہاڑ دی مہلت دیندیاں کیس دی ہور سماعت 27جنوری تک ملتوی کر دتی۔

اپنا تبصرہ گھلو