چین وچ موجود ہر پاکستانی شہری دا خصوصی خیال رکھیا جاوے، وزیراعظم دی ہدایت

اسلام آباد: وزیراعظم عمران خان نے کرونا وائرس دے معاملے تے ہدایت جاری کردیاں آکھیا چین وچ موجود ہر پاکستانی شہری دا خصوصی خیال رکھیا جاوے۔ تفصیلات دے مطابق وزیراعظم عمران خان نال معاون خصوصی زلفی بخاری دی اہم ملاقات ہوئی جہدے وچ کرونا وائرس دے معاملے تے چین وچ پھسے پاکستانیاں دی صورتحال بارے ڈسکس کیتی گئی۔

مشیر صحت ڈاکٹر ظفر مرزا تے سیکرٹری خارجہ وی ایس اہم ملاقات وچ موجود سن۔ وزیراعظم نے ایہناں دوواں شخصیات نال وی چین وچ موجود پاکستانیاں دی صحت دے امور تے گل بات کیتی۔ وزیراعظم نوں چینی سفیر ولوں کیتے اقدامات توں وی آگاہ کیتا گیا۔

زلفی بخاری نے ایس معاملے تے وزیراعظم نوں بریفنگ دیندیاں آکھیا پاکستانیاں دی حفاظت لئی چینی حکومت دے نال رل کے کم کر رہے آں۔ چین وچ موجود ہم وطناں دی سلامتی تے تحفظ لئی فکر مند آں۔

وزیراعظم نے ملاقات دے دوران ہدایتاں جاری کیتیاں کہ طلبہ سنے ہر پاکستانی شہری دا خصوصی خیال رکھیا جاوے۔ اوہناں نے وزارت اوورسیز دے اقدامات تے وی اطمینان دا اظہار کیتا۔

اپنا تبصرہ گھلو