خوراک دا مصنوعی بحران پیدا کرن والیاں نال سختی نال نبڑیا جاوے: وزیراعظم

لہور: وزیراعظم عمران خان نے وزیراعلیٰ پنجاب عثمان بزدار نوں ہدایت کیتی اے کہ اشیائے خورونوش دا مصنوعی بحران پیدا کرن والیاں نال سختی نال نبڑیا جاوے۔ وزیراعظم عمران خان اک روزہ دورے تے لہور اپڑے جتھے اوہناں نال وزیراعلیٰ پنجاب نے ملاقات کیتی جہدے وچ صوبے دی صورتحال تے گل کیتی گئی۔

وزیراعلیٰ نے عمران خان نوں مہنگائی نوں کنٹرول کرن دے حوالے نال کیتے جان والے اقدامات تے وزیراعظم نوں بریفنگ دتی۔

وزیراعظم نے پنجاب حکومت نوں ذخیرہ اندوزاں تے ملاوٹ مافیا دے خلاف آپریشن تیز کرن دا حکم دیندیاں آکھیا تحریک انصاف دی حکومت دی اولین ترجیح عام بندے نوں سستے ریٹاں تے اشیاء خورونوش دی فراہمی اے۔

عمران خان آکھیا عام بندے نوں ریلیف دین لئی یوٹیلیٹی سٹوراں تے 15ارب دا پیکیج دتا اے، آٹا تے چینی دی سرکاری قیمتاں تے فراہمی نوں یقینی بنایا جاوے، اشیاء خورونوش دا مصنوعی بحران پیدا کرن والیاں نال سختی نال نبڑیا جاوے۔