بھارت وچ سفارتی عملے دی گرفتاری انتہائی قابل مذمت حرکت اے: شبلی فراز

اسلام آباد: وفاقی وزیر اطلاعات شبلی فراز نے بھارت وچ سفارتی عملے دی گرفتاری نوں انتہائی قابل مذمت حرکت قرار دیندیاں آکھیا اے بی جے پی سرکار نے جھوٹے الزامات دی مہم شروع کر رکھی اے۔

بھارت خطے وچ سارے گوانڈھیاں دے خلاف جارحیت دا مجرم اے۔ تفصیل دے مطابق وفاقی وزیر اطلاعات شبلی فراز نے اپنے بیان وچ آکھیا اے بھارت وچ اقلیتاں بالخصوص مسلماناں نوں متعصبانہ تے پرتشدد اقدامات دا نشانہ بنان والی بی جے پی سرکار پاکستانی ہائی کمیشن دے عملے تے بے بنیاد تے جھوٹے الزامات دی مہم شروع کر چکی اے۔

سینیٹر شبلی فراز آکھیا بین الاقوامی قوانین دے تحت پاکستانی ہائی کمیشن نوں اپنی سفارتی ذمہ داریاں دی انجام دہی توں روکنا تے سفارتی عملے دی گرفتاری، تشدد مذموم تے انتہائی قابل مذمت حرکت اے۔

اوہناں آکھیا ایس مہم دا مقصد اپنے جرائم نوں لُکانا، اقلیتاں دے خلاف عالمی بدنامی، رسوائی تے مقبوضہ جموں و کشمیر وچ نہتے کشمیریاں دے خلاف ریاستی دہشت گردی توں توجہ ہٹانا اے۔

وزیر اطلاعات نے مطالبہ کیتا کہ عالمی برادری بھارتی اقدامات دا نوٹس لیندیاں ہوئیاں سفارتی تے عالمی قانون دے منافی رویہ تے بھارت دا محاسبہ کرے۔

اپنا تبصرہ گھلو