کورونا بحران پاروں 30لکھ بندے بیروزگار ہو سکدے نیں: وزارت خزانہ

اسلام آباد: وزارت خزانہ نے خدشہ ظاہر کیتا اے کورونا وباء پاروں دیس وچ 30لکھ بندے بیروزگار ہو سکدے نیں۔

سینیٹ وچ وزارت خزانہ ولوں جمع کرائے گئے تحریری جواب وچ آکھیا گیا اے کورونا توں پہلاں جی ڈی پی گروتھ دا تخمینہ 3.24فیصد سی جد کہ مالی ورھے 2019-20وچ 0.4فیصد دی منفی شرح نمو رہی، ایس مالی ورھے اپریل توں جون تک ایف بی آر دے ریونیو وچ 700توں 900ارب روپے تک کمی ہووے گی، ایس طرح ایف بی آر دا ٹیکس ریونیو 3905ارب روپے تک ڈگ سکدا اے، مالی خسارہ 7.5فیصد توں ودھ کے 9.4فیصد ہو جاوے گا۔

وزارت خزانہ دا کہنا اے کورونا بحران پاروں غربت دی شرح 24.3فیصد توں ودھ کے 33.5فیصد ہو جاوے گی، پاکستان دی برآمدات گھٹ ہو کے 21.22ارب ڈالرز رہن گیاں جد کہ بیرون ملک کم کرن والے مزدوراں دی ترسیلات وچ 2ارب ڈالرز دی کمی ہووے گی۔ کورونا بحران پاروں 30لکھ بندے بیروزگار ہو سکدے نیں۔

اپنا تبصرہ گھلو