کرونا وائرس ذخیرہ اندوزی تے ساڈ ے رویے حکومت نوں مصنوعی بحران پیدان کرن والیاں دے خلاف آرڈی ننس جاری کرنا پیا

empty profile

لکھت:جاوید یونس

کروناوائرس دی شکل وچ پوری دنیا وچ اک عذاب نازل ہویا اے۔ پوری دنیا دے ملک ایس وباء نال نمبڑن لئی اپنے سارے وسائل ْبروئے کار لیا رہے نیں پر ہجے تیکر ایس وائرس دے مریضاں دی تعداد 30لکھ 10 ہزار تیکر اپڑ چکیاں نیں۔ ماہرین دے مطابق کرونا وائرس توں بچائو صرف تے صرف سماجی فاصلے ودھان وچ ای ممکن اے۔ لوگاں نوں تاکید کیتی جا رہی اے کہ اوہ گھراں وچ رہن، جے گھر توں باہر جانا ضروری ہوئے تے حفاظتی اقدامات جنہاں وچ منہ تے ماسک، ہتھاں نوں سینیٹائزر لا کے جان۔ اک دوجے توں گھٹ توں گھٹ چھ فٹ دا فاصلہ رکھیا جائے پر صد افسوس اسیں اپنی عادتاں نوں تبدیل نہیں کیتا بلکے ایس نوں اک مذاق بنا رکھیا اے۔ بازاراں، سڑکاں تے اوہ ای رش، جے اسیں اپنی راہ تبدیل نہ کیتی تے آن والے دناں وچ حالات مزید خراب ہو سکدے نیں۔ ارباب اختیار شہریاں نوں تواتر دے نال خبردار کر رہے نیں کہ لاک ڈائون تے سختی توں عمل درآمد کیتا جائے۔ ایس وچ کوئی دورائے نہیں کہ ایس وباء نال لڑن لئی حکومت کلی کجھ نہیں کر سکدی۔ ایس لئی شہریاں نوں حکومت دی طرفوں لائی گئی پابندیاں تے عملدرآمد کرنا ہوئے گا۔زندگی ہوئے گی تے کاروبار ہوئے گا جے زندگی ای نہیں رہی تے ایہہ کاروبار کس کم دا۔ ایہہ صورتحال متاثرہ ملکاں وانگوں اسیں وی سخت حفاظتی تے احتیاطی اقدامات دی متقاضی اے۔
کرونا وائرس نے دنیا دی ہیت ای تبدیل کر کے رکھ دتی اے۔ ایس وباء نے سماجی فاصلیاں نوں ودھا دتا اے۔ کہندے سن کہ انسان معاشرتی حیوان اے تے اوہ کلا نہیں رہ سکدا پر ہن سماجی فاصلے ودھان دی لوڑ تے زور دتا جا رہیا اے۔ اک دوجے نال میل ملاپ، ہتھ ملان تے گلے نہ ملن دی تاکید کیتی جا رہی اے۔ ایہہ سب ساڈے اعمال دا نتیجہ نہیں تے ہور کیہ اے۔ اوہ سماجی برائیاں جنہاں نوں کدی وی مذہب وچ ممنوع قرار دتا گیا اے اوہ سب اسیں اپنا لیاں نیں۔ دنیا دے کسے وی مذہب نوں ویکھ لوئو ایس وچ فحاشی، عریانی، بے حیائی، زناکاری، شراب نوشی نوں حرام قرار دتا گیا اے پر ایہہ ساری برائیاں انسان نے اپنا لیاں نیں۔ ذاتی ہوس نوں تسکین دین لئی طرح طرح دیاں دلیلاں لبھیاں جاندیاں نیں۔ حق دار دا حق مارنا، مظلوم دی داد رسی نہیں ہوندا۔ ذخیرہ اندوزی، ناپ تول وچ کمی، رشوت ستانی، انصاف دا ناپید ہونا وغیرہ وغیرہ جہی سماجی برائیاں ساڈی زندگی دا حصہ بن چکیاں نیں۔ جدوں حلال تے حرام دی تمیز ختم ہو جائے تے قدرت دا قانون حرکت وچ آندا اے تے فیر سب کجھ ختم ہو جاندا اے۔ ایس وچ کوئی شک نہیں کہ لاک ڈائون دی وجہ نال سب توں زیادہ غریب طبقہ، دیہاڑی دار مزدور متاثر ہویا اے۔ وزیراعظم پاکستان عمران خان دی ہدایات تے وزیراعلیٰ پنجاب سردار عثمان بزدار نے صوبے دا سب توں وڈا احساس کفالت پروگرام دا آغاز کیتا اے جس دے تحت غریب خانداناں نوں 12ہزار روپے دتے گئے۔ وزیراعلیٰ عثمان بزدار ایس پروگرام دی آپ ذاتی طور تے نگرانی کر رہے نیں ۔ احساس کفالت پروگرام شاندار فلاحی منصوبہ اے جس نال غریب دا گھر دا چولہا چلن لگیا اے۔ ایس حکومت دے اگے جیہڑا چیلنج اے اوہ احساس پروگرام دے تحت حق دار نوں ایس نوں حق اپڑے تے ایس دی شفافیت برقرار رہے۔ ایہو وجہ اے کہ سردار عثمان بزدار مختلف شہراں دیپالپور، چشتیاں، ساہیوال، ثوبہ ٹیک سنگھ، گوجرہ، ہیڈ تریماں، شیخوپورہ، ناروال تے راولپنڈی سنے کئی علاقیاں دے دورے کر چکے نیں تے امداد دی تقسیم دی نگرانی کر رہے نیں۔ وزیراعلیٰ عثمان بزدار دی خوبی اے کہ اوہ چپ رہ کے اپنا کم جاری رکھے ہوئے نیں اوہ ماضی دے حکمراناں وانگوں ذاتی تشہیر تے نمائش نوں پسند نہیں کردے۔ جتھوں تیکر کرونا توں حفاظتی اقدامات تے شہریاں نوں طبی سہولتاں دی فراہمی دا تعلق اے بزدار حکومت نے بھرپور تے ویلے تے اقدامات کیتے نیں۔
وزیراعلیٰ پنجاب سردار عثمان بزدار نے صوبے وچ کرونا دے تشخیصی ٹیسٹ وچ وادھے لئی مزید 4لیب دے قیام دی منظوری دے دتی اے۔ وزیراعلیٰ عثمان بزدار نے کہیا کہ پہلے مرحلے وچ سیالکوٹ تے سرگودھا وچ نوی لیب بنائی جان گیاں جد کہ دوجے مرحلے وچ رحیم یار خان تے گجرات وچ نویں لیب بنن گیاں۔ وزیراعلیٰ عثمان بزدار نے محکمہ صحت نوں سیالکوٹ تے سرگودھا وچ نوی لیب دے قیام لئی فوری اقدامات دی ہدایت کردے ہوئے کہیا کہ پنجاب وچ دو لیباں دی اپ گریڈیشن جد کہ 3 نوی لیب تیار ہو چکیاں نیں۔ لہور وچ ٹی بی کنٹرول پروگرام تے انسٹی ٹیوٹ آف پبلک ہیلتھ دی 2 لیب دی اپ گریڈیشن مکمل ہو چکی اے جد کہ الائیڈ ہسپتال فیصل آباد، نشتر ہسپتال ملتان تے تحصیل ہیڈ کوارٹر ہسپتال وزیر آباد وچ نوی لیب قائم ہو چکیاں نیں۔ پنجاب وچ روزانہ دی بنیاد تے ٹیسٹنگ دی صلاحیت 4500تیکر اپڑ چکی اے۔
حکومت نے لاک ڈائون جزوی طور تے ہٹان دی اجازت تے دتی اے پر اوقات کار دی سختی نال پابندی کروائی جا رہی اے۔ شٹر ڈائون کر کے کاروبار کرن دی کسے صورت اجازت نہیں دتی جا رہی ۔ خلاف ورزی تے انسداد کرونا آرڈیننس دے تحت دکان سیل تے چالان ہوئے گا۔ پنجگانہ نماز دی ادائیگی لئی 20 نکاتی اعلامیہ تے عملدرآمد یقینی بنایا جا رہیا اے۔ ایس اوپیز دی لاف ورزی کرن والی انڈسٹریز دے خلاف قانون دے مطابق کاروائی ہوئے گی۔ وزیراعلیٰ پنجاب سردار عثمان بزدار دی زیر صدارت وزیراعلی آفس وچ کرونا وباء دی روک تھام لئی قائم کابینہ کمیٹی دا ویڈیو لنک اجلاس وی ہو چکیا اے جس وچ سمارٹ لاک ڈائون دے حوالے نال بریفنگ دتی گئی۔ مختلف موقعیاں تے اجلاس وچ جزوی لاک ڈائون دے حوالے نال کیتے جان والے اقدامات دا مسلسل جائزہ لیا جا رہیا اے۔
شروع وچ توجہ مختلف قرنطینہ سنٹراں وچ ٹھہرائے گئے بندیا ں دے ٹیسٹ کرن تے سی ہن سسٹم تے بوجھ نسبتاً گھٹ ہون تے ٹیسٹنگ کیپسیٹی ہور ودھن نال Smart Sampling دے ذریعے لوکل کمیونٹی وچ وائرس دی موجودگی دا بہتر جائزہ لیا جا سکے گا۔ ایس دوران وزیراعلیٰ پنجاب سردار عثمان بزدار دی انتظامیہ صلاحیتاں نکھر کے سامنے آئے نیں۔ ہر سیاسی بحران وچ پہلے توں ودھ طاقتور تے کامیاب ہو کے نکلے نیں تے سب نوں حیران کر دتا اے۔ وزیراعلیٰ عثمان بزدار نے اپنے کردار تے انتظامی فیصلیاں نال طاقتور مقتدار حلقیاں وانگوں قدم چکدے ہوئے مخالفین دے اعتراضات نوں ختم کر کے ایہناں نوں مزید ششدر کر دتا اے۔ وزیراعلیٰ سردار عثمان بزدار نمایاں ہون دے شوق توں گریز کردے نیں تے کسے قسم دی سیاسی بڑھک بازی دے نیڑے تیکر نہیں جاندے۔
جیویں کہ ساڈے ایتھے موقع پرستی وی اک برائی اے، کرونا وائرس دے آندے ای ذخیرہ اندوز، گراں فروش حرکت وچ آ گئے نیں تے اوہناں نے ایس وائرس توں بچائو لئی استعمال ہون والی شیواں جنہاں وچ ماسک، سینٹائزر، کلورین، ڈیٹول نوں ذخیرہ کر لیا تے من مانی قیمتاں تے فروخت کرنا شروع کر دتا۔ماسک دا اک ڈبہ جس دی قیمت غالباً ڈیڑھ دو سو دے لگ بھگ سی نوں یک دم اک ہزار تے فروخت کرنا شروع کر دتا۔ دیگر روز مرہ ضرورت دے استعمال دی شیواں دی قیمتاں وی ودھا دتیاں جس نال عام بندے دی مشکلات وچ وادھا ہو گیا۔ بزدار حکومت نوں ایس صورت حال دا نوٹس لیندے ہوئے اک وڈا قدم چکنا پیا تے صوبے وچ دی پنجاب پری وینشن آف ہورڈنگ آرڈی ننس 2020، جاری کیتا گیا۔ جس دے تحت ذخیرہ اندوزاں نوں تن ورھے قید دی سزا دتی جا سکے گی تے ضبط شدہ شیواں دی 50فی صد رقم قومی خزانے وچ جمع ہوئے گی۔ آرڈی ننس دے تحت متعلقہ افسر معلومات دی بناء تے کسے ڈیلر دے گودام نوں بغیر وارنٹ چیک کر سکدا اے۔ ڈیلر اپنی پیداوار ، ایکسپورٹ، امپورٹ، سٹاک سیل تے ڈسٹری بیوشن دے حوالے نال ریکارڈ متعلقہ افسر دے کول جمع کران دا پابند ہوئے گا۔ وزیراعلیٰ عثما ن بزدار نے کہیا کہ پنجاب حکومت نے ذخیرہ اندوزی کر کے مصنوعی بحران پیدا کرن والیاں دے خلاف سخت ایکشن لین لئی آرڈی ننس جاری کیتا اے۔ ادویات، آٹا، چینی، دالاں، چائے، خدردنی تیل، مچھلی انڈے، دودھ، گوشت، فیس ماسک، سینی ٹائزر، سرجیکل ماسک، کھاد بنان دا کیمیکل، زردی ادویات، آلو ، پیاز، ٹماٹر سنے 41ضروری شیواں ذخیرہ کرن والیاں دے خلاف کاروائی ہوئے گی۔ ذخیرہ اندوزاں دے بارے وچ معلومات فراہم کرن والے نوں قومی خزانے وچ جمع ہون والی رقم دا 10 فی صد انعام دتا جائے گا۔ آرڈی ننس دے تحت ذخیرہ اندوزی کرن والے عوام دے دشمن نیں تے ایہناں دے خلاف بلاامتیاز کریک ڈائون جاری رہے گا۔ سانوں عوام دا مفاد زیادہ عزیز اے۔ ضروری شیواں دی ذخیرہ اندوزی کر کے مصنوعی مہنگائی کرن دی ہر گز اجازت نہیں دتی جا سکدی۔ سپیشل مجسٹریٹ 30 دن دے اندر فیصلا کرن دا پابند ہوئے گا۔ سزا دے خلاف 30 دن دے اندر سیشن جج نال رجوع کیتا جا سکد اے۔ صوبائی وزیر صنعت اسلم اقبال نے کہیا اے کہ پنجاب اکو صوبہ اے جس نے میپنگ دے ذریعے ضروری شیواں دا ڈیٹا حاصل کیتا اے۔ ذخیرہ اندوز اینوں کہیا جائے گا جیہڑا اپنی شیواں ڈیکلیئر نہیں کرے گا۔ حکومت پنجاب نے پہلے توں موجود ایکٹ دے تحت ذخیرہ اندوزاں دے خلاف بھرپور کاروائیاں دے ذریعے 2924.14 ملین روپے مالیت دی ذخیرہ کیتی گئی شیواں جنہاں وچ چینی، آٹا، بنا سپتی گھیو، چاول، سرخ مرچ، دالاں، کوکنگ آئل، سوچی تے گڑ برآمد کر کے سرکاری نرخاں تے فروخت کیتیاں۔ اسلام وچ ذخیرہ اندوزی ملاوٹ، گھٹ تولن، جھوٹ نال شیواں ویچن دی سخت ممانعت کیتی گئی اے تے ایس فعل نوں سخت ناپسند کیتا گیا اے۔
ملاوٹ کرن والیا ں دے بارے وچ حدیث شریف وچ اے کہ ’’جس نے ملاوٹ کیتی اوہ ساڈے وچوں نہیں‘‘۔ اک مسلمان لئی ایس توں زیادہ بدنصیبی ہور کیہ ہو سکدی اے کہ اوہ صرف مال کمان تے لالچ وچ آ کے کفار دی صف وچ شامل ہو جائے۔ اک تھاں تاجدا مدینہ نے فرمایا کہ ’’ سچا تاجر قیامت دے دن صدیقین تے شہداء دے نال چکیا جائے گا۔ اسلام وچ ذخیرہ اندوزی دی سخت ممانعت کیتی گئی اے۔حضور اکرم ؐ دا ارشاد گرامی اے کہ ’’جس نے چالی دن تیکر غلہ روکے رکھیا اللہ ایس توں بری الذمہ اے۔ ‘‘ اک ہور تھاں ارشاد فرمایا ’’ذخیرہ کرن والے گہنگار نیں ۔‘‘ ایسے طرح گھٹ تولن والے لئی وی سخت عذاب اے۔ ایس وچ کوئی شک نہیں کہ وزیراعلیٰ سردار عثمان بزدار دی قیادت وچ حکومت پنجاب عوام دی فلاح و بہبود لئی جامع تے مثبت اقدامات چک رہے نیں تے اوہ اک بہترین منتظم دی شکل وچ سامنے آ رہے نیں۔

اپنا تبصرہ گھلو