شہباز شریف وی کورونا دا شکار, اپنے آپ نوں گھراندر قرنطینہ کر لیا

لہور: قومی اسمبلی وچ قائد حزب اختلاف شہباز شریف وی کورونا وائرس دا شکار ہو گئے۔ صدر پاکستان مسلم لیگ (ن) دا کورونا ٹیسٹ مثبت آ گیا۔ لیگی رہنما عطاء اللہ تارڑ نے قوم توں شہباز شریف دی جلد صحت یابی لئی دعا کیتی اے۔ اوہناں آکھیا شہباز شریف نوں ایہناں حالات وچ نیب وچ طلب کرکے اوہناں دی زندگی نوں خطرے وچ پایا گیا، تحریری طور تے نیب نوں کئی وار آگاہ کیتا کہ شہباز شریف کینسر دے مرض وچ مبتلا رہے نیں تے ایہناں دی قوت مدافعت عام لوکاں دی نسبت گھٹ اے، ایتھوں تک کہ ویڈیو لنک تے تفتیش کرن دی پیشکش کیتی۔ عطاء اللہ تارڑ دا کہنا سی شہباز شریف نے نیب دی پیش دے علاوہ نہ کسے نال ملاقات کیتی تے نہ ای کدھرے ہور گئے، جے شہباز شریف نوں کجھ ہویا تے عمران نیازی تے نیب ذمہ دار ہون گے، شہباز شریف نے ماڈل ٹاؤن رہائش گاہ تے اپنے آپ نوں قرنطینہ کر لیا اے تے ڈاکٹراں دی ہدایات تے عمل کر رہے نیں۔