ملک بھر وچ اک لکھ توں ودھ پشتوناں دے شناختی کارڈز بلاک ہون دا انکشاف

پشتوناں دے شناختی کارڈز

اسلام آباد: نادرا ولوں ملک بھر وچ اک لکھ توں ودھ پشتوناں دے شناختی کارڈز بلاک کیتے جان دا انکشاف ہویا اے۔

ملک وچ اک لکھ توں ودھ پشتوناں دے قومی شناختی کارڈز بلاک ہون دا انکشاف ہویا اے۔ قومی اسمبلی وچ توجہ دلاؤ نوٹس تے جواب دیندیاں وزیر مملکت برائے داخلہ شہریار آفریدی نے آکھیا خیبر پختونخوا وچ ضم کیتے گئے سابق قبائلی علاقہ جات وچ ایس ویلے 6ہزار 824 شناختی کارڈ بلاک نیں جد کہ ملک بھر وچ پشتوناں دے مجموعی بلاک شناختی کارڈز دی تعداد اک لکھ 2 ہزار 961 اے۔

وزیر مملکت نے دسیا شناختی کارڈز نوں بلاک کیتے جان دی 6 اہم وجوہات نیں، جیہناں وچ افغان مہاجرین، نامکمل دستاویزات، خاندانی تعلق تے غلط معلومات دا اندراج شامل نیں۔ شہریار آفریدی نے آکھیا اسیں وڈے وڈے منصوبے شروع کیتے پر ملک دی چار دیواری دا نہیں سوچیا، افغان طالبان دا سابق امیر ملا منصور ایران توں پاکستان وچ داخل ہویا تے امریکی ڈرون دا نشانہ بنیا، ایس واقعے توں ملک دی بدنامی ہوئی۔ پہلاں چمن وچ 500 روپے تک دے شناختی کارڈ بنائے جاندے سن، پچھلی حکومت نے ایہدے تے کوئی ایکشن نہیں لیا سی پر اسیں ایس ملک نوں محفوظ بناواں گے کسے اگےسر نہیں جھکاواں گے۔

Add new comment

About text formats