پاکستان زندہ باد

لکھت:ایثار رانا

ایہہ غالباً دو ہزار چھ دی گل اے پٹیالہ وچ پنجابی یونیورسٹی دے زیر اہتمام پاکستان توں آئے وفد دے اعزاز وچ تقریب اے۔ حال وچ لگ بھگ داہ ہزار بندے بیٹھے نیں۔ میں وی ایس وفد دا حصہ واں تقریب کیہ اے بھارتی دی ثقافتی یلغار اے۔ اچانک ہال دیاں ساریاں لائٹاں بند ہو گئیاں۔ انج لگیا دور کدھرے دور توں پنجابی انرجی بھرے لہجے وچ مٹیاراں لئے بھرے انداز وچ ٹپے گاندیاں آ رہیاں نیں۔ اک خوابناک ماحول سی اچانک میرے پچھے پوڑیاں تے پنجابی یونیورسٹی دی طالبات ہتھاں وچ وڈے وڈے تھال چکے جنہاں وچ گجرے، مہندی تیل تے ابٹن رکھیا سی تے اصل خوبصورت ایہہ سی کہ ایہناں تھالاں وچ نکے نکے دیئے بل رہے سن ہنیرے وچ ایہناں دی روشنی الہڑ مٹیاراں دے گیت وچ کیتا پورا پاکستانی وفد ایس سحر وچ گم صم بیٹھا سی۔ جویں امرتا پریتم بلھے شاہ وارث دا کوئی کلام زندہ ہو کے ساڈے وچکار آ کھڑا ہویا فیر ایہہ کڑیاں ساڈے وچکار توں گیت گاندیاں سٹیج تے آئیاں تے انج دا گڈا پایا کہ واقعی ایہناں دی ایڑیاں زمین تے پیندیاں تے لگدا دھرتی کنب رہی اے۔ بھارتی ساڈے تے چھائے ہوئے سن۔ اوہناں نے اپنی ثقافت بھر پور انداز وچ پیش کر کے پورے پاکستانی وفد نوں سحر زدہ کر دتا۔ تقریب ختم ہون دے نیڑے سی کہ پروگرام دے میزبان نے کہیا تقریب مُک چلی اے پر اوہ پاکستانی وفد وچ آئے طارق عزیز نال درخواست کرن گے کہ کجھ لفظ بول دین ۔ ایہہ ساری تقریب پنجابی وچ ہو رہی سی۔ طارق عزیز سٹیج تے آئے۔ اوہناں نے مائیک سنبھالیا تے انج لگیا بھارتی ثقافت ہوا وچ اڑ گئی ہوئے۔ طارق عزیز نے ہجے اینا ای کہیا کہ ’’اج آکھاں وارث شاہ نوں ‘‘ داہ ہزار دے ہال وچ سکتہ ہو گیا صرف اوتھے اک ای اواز سی اوہ سی طارق عزیز۔۔۔ میں پٹیالہ دے امرا بیورو کریسی سیاستداناں وزیراں، استاداں تے حاضرین دے چہرے غور نا ل ویکھنا شروع کیتے جویں اوہ سارے طارق عزیز دے لافانی لہجے الفاظ دے جادو ایہناں دی شخصیت دے سحر وچ ڈب گئے ہون۔ زندگی وچ پہلی وار مینوں محسوس ہویا میرے رونگٹے کھڑے نیں۔ میں اک احساس کمتری دا ماریا صحافی آں کسے نوں تسلیم کرن وچ بوہت تکلیف محسوس کر نا واں پر میرا دل کر رہیا سی کہ میں زور زور نال چیخاں، ایہہ ساڈا طارق عزیز اے۔ ویکھو ایہہ ساڈہ چہرہ اے، ویکھو پاکستان ثقافت وچ تہاڈے توں گھٹ نہیں۔ سارے بھارتی فنکار مینوں نکے نکے محسوس ہو رہے سن۔ مینوں لگیا چارے پاسے ساوا ہلالی جھنڈا لہرا رہیا وے۔ طارق بولدے گئے تے پورا ہال بت بنیا ایہناں نوں تکدا رہیا۔مینوں ہوش اودوں آیا جدوں طارق عزیز دے جواب وچ پورے ہال نے کہیا پاکستان زندہ باد۔ میں اپنے منہ تے ہتھ پھیریا اوہ اتھرواں نال بھریا سی۔
طارق عزیز صاحب مینوں اج احساس ہویا تسیں مینوں احساس کمتری توں کڈیا۔ میرے اندر دے بھارتی چکاچوند توں چندھیائے پاکستانی نوں احساس فخر دتا۔ تسیں چلے گئے پر ایہہ ’’تکدی اکھاں سن دے کن، تہاڈی سچی کھری اواز نوں ترسدے رہن گے۔ پتر ہوئے تے تہاڈے جہیا، تسیں اپنی ساری جائیداد ریاست دے ناں کر گئے۔ ریاست ماں نہ بن سکی تسیں پتر بن کے وکھا دتا۔ کاش ایس دھرتی توں فیضیاب ہون والے سارے سابق صدر ،وزیر اعظم، جج، جرنیل، صنعتکار، اپنی دھرتی ماں نوں تہاڈے جہیا خراج دے سکن۔ اکھاں نم نیں مزید لکھیا نہیں جا رہیا۔ بس اک وار کہہ دیو۔۔۔ پاکستان، میں تہاڈے نال زندہ باد کہنا چاہنا واں۔

اپنا تبصرہ گھلو