پاک آرمی میرٹ اُُتے یقین رکھدی اے : لیفٹیننٹ جنرل نگار جوہر

راولپنڈی: مسلم دُنیا سمیت جنوبی ایشیاوچ لیفٹیننٹ جنرل دے عہدے اُتے ترقی کرن والی پہلی خاتون آرمی آفیسر لیفٹیننٹ جنرل نگار جوہر نے آکھیا کہ محنت ، لگن تے جذبے دے نال ترقی تے کامیابی ملدی اے۔برطانوی نشرتاتی ادارے “بی بی سی”نے پہلی خاتون لیفٹیننٹ جنرل تے سرجن جنرل نگار جوہر دی تعیناتی دے حوالے نال اک رپورٹپیش کیتی کہ اک ایسا معاشرہ ، جیتھے مرد اہم عہدیاں اُتے تعنیات نیں ، اوہناں دا تقرر زبردست امر اے ۔خصوصی انٹرویو وچ جد بی بی سی دی نمائندہ نے سوال کیتا کہ کیہ ایس مقام اُتے پہنچنا مشکل نہیں سی؟جس اُتے لیفٹیننٹ جنرل نگار جوہر نے آکھیا کہ پاکستان آرمی میرٹ اُتے یقین رکھدی اے ۔ اگر کم چنگا کرو گے تے کسے وی منزل تک پہنچنا کوئی مشکل نہیں ۔لیفٹیننٹ جنرل نگار جوہر نے آکھیا کہ ترقی تے کامیابی لئی لگن تے محنت بوہت ضروری ہندی اے ، اگر تُسی ایہ کرو تے صنف دا کوئی مسئلہ نہیں ، عورتاں پاکستان وچ کمیونیکشن تے انفارمشین ٹیکنالوجی سمیت ہر شعبے وچ اپنے جوہر دکھا رہیاں نیں ۔لیفٹیننٹ جنرل نگار جوہر نے ہور آکھیا کہ پاکستان اندر عورتاں نوں بوہت عزت دتی جاندی اے تے اوہناں نوں ایہ مقام حاصل اے ، اک سوال اُتے لیفٹیننٹ جنرل نگار جوہر نے آکھیا کہ سانوں پاکستان وچ ہر طرح دا تحفظ حاصل اے ۔اوہناں نے آکھیا کہ مینوں پاکستان آرمی جوائن کرن اُتے بوہت فخراے ، آرمی میرٹ تے یقین رکھدی اے ، میرا تقرر ایس دا منہ بولدا ثبوت ای ، سرجن جنرل پاکستان آرمی لیفٹیننٹ جنرل نگار جوہر نے کورونا بارے آکھیا کہ ایس وباء دے خلاف حکومت پاکستان نال مل کے عوام دے ہر ممکن تحفظ لئی کم کر رہیے آں ۔