بدیس جائیداداں دا کیس، علیمہ خان دی جائیداد دی پوری تفصیلات طلب

علیمہ خان

اسلام آباد: سپریم کورٹ نے ایف بی آر نوں حکم دِتا اے علیمہ خان دی جائیداد دی تفصیلات پیش کیتیاں جان۔

چیف جسٹس نے ریمارکس دِتے پاکستانیاں دے بیرون ملک اکاؤنٹس تے جائیداداں دی تحقیقات دا معاملہ جان بُجھ کے خراب کیتا گیا۔ چیئرمین ایف بی آر نے یقین دہانی کرائی اگلی واری عدالت دے حکم تے عمل ہووے گا۔ پاکستانیاں دے بدیس اکاؤنٹس تے جائیداداں بارے اسٹیٹ بینک دی رپورٹ سپریم کورٹ وچ پیش کیتی گئی تے چیف جسٹس ثاقب نثار نے آکھیا اسیں جے آئی ٹی بنائی سی تے آکھیا سی دسیا جاوے پاکستانیاں دا پیسہ کِویں باہر منتقل ہویا؟ چیئرمین ایف بی آر نے کارروائی جاری ہون دا دسیا تے چیف جسٹس نے آکھیا عدالت دے حکم تے عمل کیوں نہیں ہویا، چیئرمین تے ممبر ایف بی آر نوں توہین عدالت دا نوٹس جاری کر دینے آں۔

چیف جسٹس نے چیئرمین تے ممبر ایف بی آر توں آکھیا پاکستانیاں دی بیرون ملک 3 ہزار ارب روپے دِیاں جائیداداں نیں، تسیں معاملہ سرد خانے وچ پا کے عدالت دا حکم نامہ وی خراب کر دِتا۔ عدالت نے حکم دِتا علیمہ خان دی جائیداد دی پوری تفصیلات پیش کیتیاں جان، دسیا جاوے ایف بی آر نے ایس معاملے وچ کیہ کارروائی کیتی تے کیہ کرن جا رہے نیں۔ کیس دی اگلی سنوائی 13 دسمبر نوں ہووے گی۔

Add new comment

About text formats