جناں مشکل ویلا آئے عوام دا ساتھ نہیں چھڈاں گا: وزیراعظم

اسلام آباد( بھلیکھا ٹی وی)وزیراعظم عمران خان آکھیا اے 24سالہ جدوجہد اجے ختم نہیں ہوئی تے جناں وی مشکل ویلا آئے اوہ عوام دا ساتھ نہیں چھڈن گے۔ وزیراعظم عمران خان دی زیر صدارت وفاقی کابینہ دا اجلاس ہویا جہدے وچ سرکار دے دو سال پورے ہون تے نمایاں کامیابیاں دا ذکر کیتا گیا۔ وزیر خارجہ شاہ محمود قریشی نے سفارتی کامیابیاں تے اسد عمر نے ملکی ترقی لئی حکومتی منصوبہ بندی توں آگاہ کیتا۔ شیخ رشید نے ایم ایل ون منصوبہ عمران خان دی وڈی کامیابی قرار دتا تے امین الحق نے کراچی دے ترقیاتی منصوبیاں تے وزیراعظم نال اظہار تشکر کیتا۔ مراد سعید آکھیا وزیراعظم دی قیادت وچ معیشت نوں نویں سمت مل گئی۔ وزیراعظم عمران خان نے اظہار خیال کردیاں آکھیا کمزور طبقے لئی سوچنا اصل ایمان اے، ساڈی جدوجہد دا محور ہر کمزور پاکستانی اے، 24سالہ جدوجہد اجے ختم نہیں ہوئی، جناں وی مشکل ویلا آئے، عوام دا ساتھ نہیں چھڈاں گا۔ عمران خان آکھیا تعلیمی نصاب وچ مدینے دی فلاحی ریاست دا تصور شامل کراں گے، ابتدائی طور تے 8ویں تے 9ویں جماعت لئی نصاب تیار کیتا جائے گا۔