دنیا دی کوئی طاقت پاکستان نوں ختم نہیں کر سکدی: جنرل زبیر محمود حیات

General Zubair Mehmood Hayat

کراچی: چیئرمین جوائنٹ چیفس آف سٹاف کمیٹی جنرل زبیر محمود حیات دا کہنا اے دنیا دی کوئی طاقت پاکستان نوں ختم نہیں کر سکدی جد کہ نوجواناں نے پاکستان دا جھنڈا پھڑ یا رکھنا اے۔

کراچی یونیورسٹی وچ پاکستانیت کانفرنس نال خطاب کردیاں چیئرمین جوائنٹ چیفس آف سٹاف کمیٹی جنرل زبیر محمود حیات دا کہنا سی مارچ دے مہینے وچ فیصلہ ہویا کہ پاکستان بنانا اے، پاکستانی قوم دنیا دی منفرد قوم اے، اسیں 70ورھے پہلاں قوم بنے آں، ساڈی تہذیب ہزاراں ورھے قدیم اے، دنیا دی کوئی طاقت پاکستان نوں ختم نہیں کر سکدی۔

جنرل زبیر محمود حیات دا کہنا سی قائداعظم نے آکھیا مسلمان اقلیت نہیں سگوں اک قوم نیں، پاکستان ہمیشہ مسلمان ملک رہوے گا تے ایہہ ملک سبھ لئی اے۔ اوہناں آکھیا بھارت وچ مسلمان مشکلاں دا شکار نیں، بھارت وچ مسلماناں دے گھر ساڑے جاندے نیں، 42فیصد مسلماناں نوں اوہناں دے گوانڈھی قبول نہیں کردے۔

جنرل زبیر محمود حیات نے آکھیا پاکستان دے لوک غیرت مند لوک نیں، مسلم دنیا وچ پاکستان سبھ توں وڈی سائنسی قوت اے، قوماں غلطیاں کردیاں نیں تے فیر اوہناں توں سِکھدیاں نیں، پاکستانی قوم کول صلاحیت دی چنگاری اے جہدے توں روشنی ہوندی اے، پاکستانی دنیا وچ جتھے جتھے موجود نیں نمایاں مقام رکھدے نیں۔

 

Add new comment

About text formats