موٹروے کیس، خاتون نے شوہر دے دباء تے رات دا سفر کیتا: سی سی پی او

اسلام آباد: سی سی پی او لہور عمر شیخ آکھیا لہور سیالکوٹ موٹروے زیادتی کیس وچ متاثرہ خاتون نے شوہر دے میکے توں گھر واپس آن دے دباء دی وجہ توں رات نوں سفر کیتا۔

واقعے تے قومی اسمبلی دی قائمہ کمیٹی برائے قنون انصاف نوں بریفنگ دیندیاں سی سی پی او لہورنے دسیا کہ عورت دے رات دے ویلے سفر کرن دی وجہ اوہدے شوہر دا میکے توں اپنے گھر واپس آن دا دباء سی۔

خاتون دے پٹرول ختم ہون دی شکایت تے ایف ڈبلیو او کے نال کانفرنس کال کرائی گئی۔ اوہناں دا کہنا سی ہیلپ لائن 130تے کال دے 45منٹ بعد تک کوئی متاثرہ خاتون دی مدد نوں نہ اپڑیا۔

رات 2وج کے 47منٹ تے کسے راہ گزر نے 15تے خاتون دے نال کسے دے ہاتھا پائی ہون دی اطلاع دتی۔ جے 15تے ویلے سر کال کر دتی جاندی تے واقعہ پیش نہ آندا۔ آئی جی موٹروے ڈاکٹر کلیم امام نے کمیٹی نوں دسیا کہ 1200کلومیٹر دا علاقہ اجیہا اے جتھے سانوں وسائل مہیا نہیں کیتے گئے پر فرائض انجام دے رہے آں۔ وسائل دی عدم فراہمی بارے اسیں وزارت مواصلات تے دوجے اداریاں دے نوٹس وچ لیاندے رہنے آں۔

قومی اسمبلی دی قائمہ کمیٹی برائے قنون و انصاف دے چیئرمین ریاض فتیانہ آکھیا وزارت مواصلات دی نکامی اے کہ موٹروے کھول دتی گئی پر سکیورٹی تعینات نہیں کیتی گئی جدوں موٹروے اوپن کیتی جاندی اے تے پہلاں سکیورٹی اہلکاراں نوں تعینات کیتا جانا چاہیدا اے۔ لہور سیالکوٹ موٹروے زیادتی واقعہ تے پاکستان دی دنیا وچ بدنامی ہوئی۔

ایڈیشنل آئی جی پنجاب تے سابق آئی جی شعیب سڈل وی شریک ہوئے۔