اسلحے دا جنونی بیوپاری

Hameed Ullah Bhatti

تحریر حمیداللہ بھٹی

بھارتی دی چین تے پاکستان نال کشیدگی وچ مسلسل وادھا ہو رہیا اے جس دے تناظر وچ دہلی پوری دنیا توں ہتھیار جمع کرن وچ مصروف اے۔ پہلے وی خطے وچ ہتھیاراں دا وڈا خریدار سی ہن نویں کشیدگی دی بنا اُتے ہتھیار جمع کرن دا جنون ہو گیا اے جس دی وجہ نال خطے وچ ہتھیاراں دی دوڑ خارج از امکان نہیں حالاں کے بھارتی معیشت نوں تاریخ دے بدترین زوال دا ساہمنا اے تے معاشی پہیہ چلان لئی حکومت دا مزید قرضے لینا ناگزیر اے وڈی تعداد وچ صنعتاں دی بندش تے مہنگائی و بے روز گاری نے معاشی ترقی نوں بریک لا دتی اے کاروباری موقعے گھٹ ہو گئے نیں پر حکومت نوں کسے قسم دی پرواہ نہیں بلکے قومی سلامتی نوں لاحق انج دے خدشات دا حل لبھنا زیادہ اہم اے جیہڑا جنونی قیادت دے اپنے پیدا کردہ نیں فرانس توں رافیل طیاریاں دے حصول نال بھارتی قیادت نوں نواں حوصلہ ضرور ملیا اے پر ایہہ حوصلہ عوام دی بجائے صرف حکمراناں تے میڈیا تیکر محدود اے جیہڑا دھمکی آمیز لہجے وچ گوانڈھیاں نوں للکارن لگے نیں پر جنگاں صرف طیاریاں نال نہیں جذبے نال لڑیاں جاندیاں نیں جس توں بھارتی فوج محروم اے ۔ پاکستان نے اک توں ودھ وار محدود وسائل دے باوجود بھارتی برتری مٹی وچ ملائی اے جد کہ چین نوں تے فوج تے ہتھیاراں دے حوالے نال واضح برتری اے فیر وی معیشت نوں بھل کے ہتھیاراں دے حصول اُتے توجہ توں باہر اے۔ میدان جنگ وچ ہون والی ہزیمت دا بدلا غریب عوام نوں بھوکا مارنا دانشمندی دے منافی اے۔
اسرائیل توں جدید ترین ہتھیار خریدن دے نال مشترکہ تیاری دے دہلی نے کئی معاہدے کر رکھے نیں جد کہ امریکہ توں وی دھڑا دھڑ اسلحہ خریدیا جا رہیا اے۔ برطانیہ توں تن شعبیاں جنگی سامان دی فراہمی ، نقل و حمل تے تربیت وچ تعاون دا معاہدہ کرن دے نال مزید شعبیاں وچ تعاون ودھان لئی دونویں ملک جائزہ لے رہے نیں۔ دفاعی معاہدے فرانس، اسرائیل، امریکہ تے برطانیہ تیکر ای محدود نہیں بلکے آسٹریلیا، جنوبی کوریا، سنگا پور تے جاپان نال وی معاہدے نیں میزائل کلب دی رکنیت دے بعد میزائل دی صنعت نوں جدید توں جدید تر بنان لئی دن رات کوشاں اے پر اینی نس بھج توں بعد ایہہ تصور کر لینا کہ بھارت نوں اپنے گوانڈھی چین تے پاکستان اُتے برتری مل گئی اے غلط اے میدان جنگ وچ ملن والی پہ در پہ سُبکی دے تناظر وچ انج دے تصورات خاصے احمقامہ معلوم ہوندے نیں پر جے سرحدی تنازعات نوں طے نہیں کیتا جاندا تے مستقبل وچ وی سبکی دا سلسلہ جاری رہن دا امکان اے۔
بھارتی فوج نوں کئی چیلنجز دا ساہمنا اے ملک وچ دو درجن توں ودھ علیحدگی دیاں تحریکاں جاری نیں جنہاں دی وڈی وجہ محرومیاں تے ناانصافی اے پر کسے حکومت نے اج تیکر محرومیاں تے ناانصافیاں نوں ختم کرن دی کوشش نہیں کیتی بلکے انتخابی کامیابی لئی اقلیتاں اُتے عرصہ حیات تنگ کرن نوں مجرب نسخہ سمجھیا اے جس دی بنا اُتے علیحدگی دیاں تحریکاں ختم ہون دی بجائے زور پھڑ رہیاں نیں انج بھارت دی ونڈ دا امکان ودھ گیا اے ایہناں حالات وچ اسلحے دا جنون بوہت عجیب اے پر لگدا اے اسلحے دے جنونی بیوپاری نوں سرحدی تنازعات نوں حل کرن تے محرومیاں و ناانصافی ختم کرن نال ملک دی ٹٹ بھج بہتر لگدی اے۔
بھارت دے پاکستان، چین تے نیپال نال سرحدی تنازعات وچ پچھلے کجھ مہینے توں شدت تے کشیدگی وچ وادھا ہویا اے مقبوضہ کشمیر دے حریت پسنداں نوں ختم کرن لئی بھارت نے اٹھ لکھ فوج جھونک رکھی اے پر پچھلے ورھے 5 اگست نوں خصوصی حیثیت دے خاتمے نال سیاسی جدوجہد عسکریت پسندی وچ تبدیلی ہو سکدی اے پر امن قائم کرن دی بجائے بھارت اسلحے دا جنونی بیوپاری بن گیا اے۔ 1962ء دی جنگ بندی دے معاہدے دی رو نال اقصائے چین اُتے چین دا حق ملکیت تسلیم کر چکیافیر بھارت کیوں جارحانہ پالیسی اُتے کاربند اے جے اسلحے دا جنونی بیوپاری ہتھیاراں دی خرید گھٹ کر دیوے تے کرونا وبا نال بے روزگار ہون والے 10 کروڑ بندیاں نوں روز ار دے سکدا اونج وی بھارت دی سالانہ معاشی نمو، فوجی اخراجات، جنگی ساز و سامان تے عالمی تجارت دا حجم ایس قابل نہیں کہ بیک وقت پاکستان تے چین نال لمبی مدت لئی جنگ لڑ سکے 1962 وچ چین تے 1965 وچ پاکستان نال ہون والی سرحدی جھڑپاں ایس امر دا واضح ثبوت نیں۔
مشرق وچ ارونا چل پردیش دا نوے ہزار کلو میٹر تے مغرب وچ اقصائے چین دا 33000 کلومیٹر دا علاقہ چین تے بھارت دے وچکار وجہ تنازع اے۔ ایہناں علاقیاں اُتے دونویں ملک اپنا حق ملکیت جتاندے نیں کشمیر دی خصوصی حیثیت دے خاتمے دے بعد چین نے ٹھیک رویہ اپنالیا اے کیوں جے بھارت دے سی پیک اُتے تحفظات تے مخالفت کوئی لُکی چھپی نہیں چین نوں ڈر اے کہ امریکی شہ اُتے بھارت سی پیک نوں ناکامی نال دو چار کرن لئی وڈے پیمانے اُتے سازش کر سکدا اے جس نال خطے دا امن تہہ بالا ہون دے نال چین دی معاشی سرگرمیاں وچ رکاوٹ آ سکدی اے۔ ایس لئی جوابی حکمت عملی دے طور اُتے اقصائے چین وچ فوجی موجودگی ودھائی گئی اونج چین نوں لاحق خطرات وچ بھارتی عسکری قوت دا کوئی حصہ نہیں بلکہ جدوں چاہوے بھارت دی گردن دبوچ سکدا اے پر فوجی تنازعات وچ الجھن توں زیادہ ایہنوں معاشی نمو وچ وادھے نال دلچسپی اے ایسے بنا اُتے پندرہ جون نوں بھارت دے 20 فوجی مارن دے باوجود کشیدگی وچ وادھا نہیں کیتا پر بھارت امریکہ ودھدی قربت پریشانی دا باعث ضرور اے۔
چین تے بھارت دے وچکار 1962 وچ ہون والی اک مہینے دی مختصر مدت دی سرحدی جھڑپاں دے بعد دونواں ملکاں دی حدود بارے نقشیاں نال وضاحت کیتی گئی جنہوں لائن آف ایکچوئل (LOC) دا ناں دتا گیا پر دونویں ملکاں دے تحفظات مکمل ختم نہیں ہو سکے بلکہ نیپال نوں وی شدید اعتراض اے چین دی طرفوں مشرقی تے وسطی توں زیادہ مغربی سیکٹر اُتے زیادہ توجہ دین دی کئی وجوہات نیں وڈی وجہ بھارت امریکہ ودھدی گرمجوشی اے کیوں جے امریکہ چین دی معاشی ترقی روکنا چاہندا اے ایس توں علاوہ چین توں فاصلہ رکھن والے ملکاں نال بھارت دے ودھدے مراسم نیں جس دا ماہرین مطلب ایہہ لیندے نیں کہ چاہے بھارت چین دی ہم پلہ فوجی طاقت نہیں پر امریکہ دی چین دے آلے دوالے ملکاں نال ودھدی دلچسپی دا بھرپور ادراک اے جاپان جنوبی کوریا تے تائیوان امریکہ دے زیر اثر نیں۔ ایس توں علاوہ بحر الکاہل دا مغربی ساحل وی چین لئی بوہت اہم اے بھارت نال سختی نال پیش آ کے چین اصل وچ امریکہ نوں پیغام دے رہیا اے کہ اوہ ایہنوں چھیڑن یا گھیرن توں باز رہوے چین لئی سائوتھ چائنہ سی دی وی بڑی اہمیت اے جتھے امریکیاں دی مداخلت ناگوار گزردی اے پر بھارت دا چین نوں للکارنا مقابلے دی تیاری تے اسلحے دے انبار جمع کرن نال چین نوں پریشانی نہیں پر اسلحے دا جنونی بیوپاری پاکستان نوں زک اپڑان دی کوشش کر سکدا اے جس نال پاکستان نوں محتاط رہن دی بوہت لوڑ اے عین ممکن اے چین توں ہزیمت دا بدلا اوہ پاکستان نوں نقصان اپڑا کے برابر کرکے عوام دیاں نظراں وچ سرخرو ہون دی کوشش کرے۔

اپنا تبصرہ گھلو