عبدالقدوس بزنجو تے چوہدری سرور نال بیٹھک

لکھت:عتیق انور راجا

بدھ دی شام گورنر ہاؤس لہور ملک دے نامور کالم نگار تے ٹی وی اینکر مدعو سن۔ خبر ایہ سی کہ بلوچستان توں محترم پروہنے کیئر ٹیکر گورنر تے سپیکر بلوچستان اسمبلی عبدالقدوس بزنجو صاحب پنجاب والیاںنال کجھ دل دیاں گلاں کرن آ رہے نیں۔ گورنر پنجاب چودھری سرور نے دسیا اج بہت سارے بلوچ نوجوان اعلیٰ تعلیم لئی پنجاب دے تعلیمی اداریاں وچ داخل ہو رہے نیں۔ اوہناں نے پنجاب دی یونیورسٹیاں نوں ہدایتاں جاری کردتیاں نیں کہ بلوچستان تے فاٹا دے جہڑے علاقے کے پی کے وچ شامل کیتے گئے نیں اوتھوں آن والے طلباء نوں ترجیحی بنیاداں تے داخلہ دتا جاوے۔ طلباء توں بس ایناں کہنا اے کہ اوہ اپنا سارا دھیان پڑھائی ول رکھن تے کسے اجہے عمل دا حصہ بنن دی کوشش نہ کرن کہ اوہناں نوں ڈسپلنری ایکشن دا ساہمنا کرنا پوے۔ گورنر پنجاب نے ہور آکھیا ایہناں وچ بہت سارے جانن والے اجہے نیں جہڑے ایچی سن توں پڑھ کے گئے اوہ پنجاب نال محبت دا اجیہا درس لے کے گئے کہ اوہ کسے توں وی ودھ کے محب وطن ثابت ہوئے۔ ایہدے بعد سپیکربلوچستان اسمبلی جناب عبدالقدوس نے گل شروع کیتی تے آکھیا گورنر پنجاب ایہناں دے پسندیدہ وی نیں تے ایہناں توں بہت کجھ سکھیا وی اے تے ساڈا خیال اے کہ گورنر پنجاب چودھری سرور صاحب نوں پورے پاکستان وچ لوکاں دی بہتری لئی کم کرنا چاہیدا اے۔ بزنجو صاحب نے دسیا کہ اوہ کجھ دیر پہلاں لہور چیمبر آف کامرس وچ سن تے اوتھے وی بہت سارے میڈیا پرسن تے ٹی وینکرز ساڈے توں سوال تے سوال کر رہے سن جہدے توں سانوںمحسوس ہو رہیا اے کہ ایتھوں دے لوک بلوچستان بارے بہت کجھ جاننا چاہندے نیں سننا چاہندے نیں ہن ایتھے پورے پاکستان دی میڈیا کریم بیٹھی اے۔ اسیں اوہناں نوں کہنا چاہندے آں کہ بلوچستان ہن پہلاں توں بہت بدل چکیا اے۔ دوجی گل اسیں ساریاں نے ایہ سمجھ لینی اے کہ بلوچستان ادھا پاکستان اے تے پاکستان دی شہ رگ اے کیوں جے زمین اوتھے اے، ڈونگھا سمندر اوتھے اے، گوادر پورٹ اوتھے اے، گیارہ سو کلومیٹر لمی کوسٹل ہائی وے اوتھے اے تے دوجی معدنیات دے ذخائر وی بلوچستان دے پہاڑاں وچ بہت زیادہ نیں۔ ایس لئی آن والے دناں بلوچستان پاکستان دی ترقی وچ بہت اہم کردار ادا کرن والا اے۔ پنجاب وڈا بھرا اے میڈیا ایتھے اے، کاروبار ایتھے اے تعلیم ایتھے اے ، میٹرو ایتھے اے موٹرویز ایتھے اے۔ پنجاب وچ موٹرویز نیں میٹروز نیں سانوں ایہدے تے کوئی اعتراض نہیں سگوں خوشی اے پر بلوچستان وچ کوئٹہ توں کراچی تک سنگل روڈ اے۔ ہن وڈے بھرا دی ذمہ داری اے کہ اوہ بلوچستان دی ترقی وچ اپنا کردار ادا کرے۔ اسیں جدوں بلوچستان وچ گوادر دے آلے دوالے ویکھنے آں تے سانوں پتہ چلدا اے کہ بہت سارے پنجاب دے لوکاں نے اوتھے زمین خرید رکھی اے تے بلوچ سرکار خوش اے کہ کسے باہر والے دی بجائے پاکستان دے لوکاں نے اوتھے سرمایہ کاری کرن دا عمل شروع کیتا اے۔ میں پاکستان دا فرزند تے سپاہی آں۔ میڈیا والے بہت کجھ جاننا چاہندے نیں تے میں اوہناں نوں دسنا چاہنا آں کہ بلوچستان ادھا ملک اے پر اوتھے سانوں جہڑے فنڈ ملدے نیں ایس حساب نال اوتھے ترقی دا خواب ویکھنا مشکل اے۔ اسیں پنجاب توں کہنے آں کہ اسیں سدھے سادھے لوک آں تسیں سانوں پیار محبت نال اگے ودھن وچ مدد دیو۔ تہانوں لوکاں نوں خوشی ہووے گی کہ ہن اوتھوں دہشت گردی دی نرسری ختم ہو رہی اے۔ بلوچ نوجوان پہاڑاں توں تھلے اتر رہے نیں اوہ قومی دھارے وچ شامل ہو رہے ہن ویلا بہت نازک اے سانوں بہت حوصلے نال بہت دانشمندی نال تے بہت تدبر نال ایہناں لوکاں نوں روزگار دینا اے چھت دینی اے علاج معالجے دی سہولتاں دینیاں نیں اوہناں بالاں نوں معیاری درسگاہواں وچ تعلیم دینی اے۔پہلاں بلوچی نوجوان فوج وچ بہت گھٹ بھرتی ہوندے سن پر ہن بلوچ جوان بہت شوق نال فوج وچ بھرتی ہو رہے نیں۔ اسیں بس ایہ کہنا چاہنے آں کہ بلوچ طلباء جہڑے ماحول توں نکلے نیں اوہناں نوں کجھ ویلا لگے گا تے فیر اوہ وی قومی دھارے وچ شامل ہون لگن گے اوہناں نوں وی میرٹ تے نوکریاں ملن لگن گیاں تے اوہ ہور بہتر سوچ اپنان لگن گے۔ بزنجو صاحب توں سوال کیتا گیا کہ جدوں سارے وسائل بلوچستان دے کول نیں تے فیر وی اوتھے مسئلے اینے زیادہ کیوں نیں۔ جواب وچ اوہناں نے فرمایا کہ آبادی دے حساب نال ملن والے پیسیاں نال روڈ نیٹ ورکس تے ہائی ویز نہیں بنائی جا سکدیاں۔ انفراسٹرکچر بہتر بنان لئی آبادی نہیں سگوں زمین دے حساب نال پیسہ ملنا چاہیدا اے۔ تسیں پچھدے او سانوں کیہ چاہیدا اے تے اسیں کہنے آں سانوں پروفیسر تے استاد دیو جہڑے تعلیم دے نال نال ساڈے بالاں دے اندر وطن نال محبت دا جذبہ وی پیدا کرن دی کوشش کرن تے ایہ سوال کہ اوتھے ترقی کیوں نہیں ہو رہی اے تے ایہدا جواب اے کہ جہڑے صوبے وچ امن و امان نہیں سی اوتھے انویسٹمنٹ کیویں لیائی جاندی۔معزز مہمان توں آکھیا گیا بلوچستان وچ سیاحت نوں ترقی دین تے اوتھوں دے حالات دا بہتر رخ دنیا دے ساہمنے لیان لئی لہور توں میڈیا پرسنز نوں اوتھے مدعو کیتا جاوے۔ اوہناں نے حامی بھر لئی ہن ویکھنے آں ایہدے تے عمل کدوں ہوندا اے۔

اپنا تبصرہ گھلو