اقبال دے تصور وچ انسان تے اوہدی حالت

لکھت: علی رضا رانا

اج دا آغاز اقبال دی فکر توں کرنا چاہنا آں۔پاکستان جہڑے حالات توں لنگھ رہیا اے ایہدے وچ نوجواناں دا کردار یقینا بہت اہم اے اقبال نے اپنے کردار توں وی ایہ گل ثابت کرن دی کوشش کیتی اے کہ اوہناں نے غلامی دی زنجیراں نوں اپنے نوجوانی دے دور وچ توڑیا تے توڑن دا سلیقہ وی سکھایا اے تے اپنے آپ نوں کتاب نال محبت کرن تے قوم دی فلاح و بہبود تے قربان ہون دا درس دتا اے۔ ایہ اشعار ملاحظہ فرماؤ۔
عقابی روح جب بیدار ہوتی ہے جوانوں میں
نظر آتی ہے ان کو اپنی منزل آسمانوں میں
نہیں تیرا نشیمن قصرِ سلطانی کے گنبد پر
تو شاہین ہے بسیرا کر پہاڑوں کی چٹانو ں پر
نوجوان نسل وچ عدم برداشت تے سوشل میڈیا دی کامیابی والدین دی نکامی دا دوجا اہم حصہ کجھ انج اے کہ انٹرنیٹ تے کیہ سوشل میڈیا دا استعمال غلط اے؟ ہرگز نہیں پر جہڑا طریقہ ساڈی نسل نے اپنا لیا اے اوہ غلط اے۔ ویکھیا جاوے تے یقینا ایہ گل واضح ہو جاوے گی کہ انٹرنیٹ کوئی غلط چیز نہیں سگوں ایہدا چنگا یاں بھیڑا ہونا اوہدے استعمال تے منحصر اے۔ اک تے سوشل میڈیا تے سیاسی تے مذہبی مباحثے چھڑ جاندے نیں اوہناں نے خاصا بدامنی دا ماحول پیدا کیتا ہویا اے تے نال ای جے کوئی واقعہ ہو جاوے تے اوہدا مذاق شروع کر دتا جاندا اے۔ ملکی مفاد دے بجائے گالھاں کڈھ کے اپنی انفرادی بھڑاس کڈھ لیندے نیں۔
کجھ نوجوان مُنڈے کُڑیاں نے تے اپنے شوق وچ افواہواں پھیلان دا کاروبار ای شروع کیتا ہویا اے اوہناں دا کم دنیا بھر دیاں جھوٹھیاں خبراں نوں پھیلانا اے۔ جدوں ویکھیا کہ لوکاں نے خالی گلاں تے یقین کرنا چھڈ دتا اے تے اوہناں نے جعلی تصویراں تے ویڈیوز نوں پھیلانا شروع کر دتا تے ہن تک ایہ سلسلہ جاری اے ایہ سب انٹرنیٹ دے غلط استعمال دی کجھ مثالاں نیں۔ہن ذرا سوچو جے اسیں انٹرنیٹ دا استعمال فلاحی کماں وچ کریئے جہناں نال معاشرے وچ بہتری آ سکدی اے تے کناں چنگا ہووے۔ اسیں ویلا انٹرنیٹ تے ضائع کرن دے بجائے مثبت طریقے نال استعمال کریئے تے ویکھو معاشرے وچ کناں فرق آ جاوے گا۔ اپنی ملت نوں مہذب وکھان لئی اپنے آپ نوں مہذب وکھاؤ آس اے معاشرہ بہتری ول ٹُر پوے گا تے نویں نسل اک چنگے راہ تے گامزن ہو جاوے گی جو کہ کتاب نال محبت توں ہو سکدی اے۔
زیادہ تر نوجوان کسے وی سوشل معاملے نوں چک کے بیٹھ جاندے نیں تے ودھ توں ودھ خود ساختہ تجزیہ Statusدی صورت وچ فیس بک تے واٹس ایپ تے لائے جاندے نیں جہناں وچوں زیادہ تر غیر اخلاقی تجزیے شامل ہوندے نیں جہڑے لکھن تے سوچن والے دی اپنی شخصیت خراب کر رہے ہوندے نیں۔
آکھیا جاندا اے کہ کتاب انسان دی بہترین دوست اے پر موجودہ دور وچ جیویں جیویں نوجوان دن بہ دن جدید ٹیکنالوجی توں قریب تر ہوندے جا رہے نیں کتاباں نال یاری دم توڑدی جا رہی اے۔ کتاباں دی تھاں انٹرنیٹ نے لے لئی اے۔ تفریح دے جدید ذرائع دی موجودگی وچ کتب بینی صرف لائبریریاں یاں کجھ اہل ذوق تک محدود ہو گئی اے، جہناں دی تعداد آٹے وچ لُون دے برابر اے۔ خاص طور تے نوجوان نسل تے بالاں وچ کتب بینی نال لاتعلقی تے غیر سنجیدہ رویہ پایا جاندا اے۔ اکثر خیال آندا اے کہ کیہ نسل نو ویلے دی کمی دی وجہ توں ایس لاتعلقی دا شکار اے یاں کتاباں توں دوری وی اقدار توں دوری دی طرح ساڈا رویہ بن دا جا رہیا اے۔ اج کل بک شاپس یاں لائبریریاں وچ نہیں سگوں برانڈڈ کپڑیاں دی دکاناں وچ رش ویکھن وچ آندا اے۔ ماضی وچ کتاب پڑھن والیاں دے ذوق دا ایہ عالم سی کہ رات نوں بغیر مطالعہ کیتے نیندر نہیں آندی سی تے اج دے نوجوان نصابی کتاباں تک کھولن دی زحمت نہیں کردے۔ ہن تے حال ایہ اے کہ طلبہ کتاب خریدن یاں لائبریری جان تک دی تکلیف نہیں کردے ایتھوں تک کہ نصاب دی کتاباں بجائے فیس بک تے واٹس ایپ تے اکتفا کیتا جاندا اے۔ علم دی روشنی نوں جدوں تک سماج وچ پھیلایا ای نہیں جاوے گا جہالت دے ہنیرے کیویں ختم ہون گے کتاب نوں انسان دا سب توں چنگا دوست جانیا جاندا اے پر ایتھے تے ایہ حال اے کہ آپ ایس دوست نال دشمنی کیتی جا رہی اے۔ پڑھے لکھے بندے توں پچھو کہ اوہنے آخری کتاب کدوں خریدی سی یاں اوہنے آخری کتاب کدوں پڑھی سی کجھ نوجوان ایہ کہندے نظر آن گے کہ ویلے دی کمی دی وجہ توں اسیں مطالعہ نہیں کر پاندے، اینے کم جو کرنے پیندے نیں، کالج، یونیورسٹی، کوچنگ سنٹر یاں دفتر دی مصروفیات وچ الجھے رہندے نیںجد کہ کجھ ایہ شکوہ کردے نیں کہ کتاب مہنگی بہت اے۔ زندگی بہت فاسٹ ہو گئی اے۔ جے اسیں بحیثیت قوم کسے شے وچ خود کفیل آں تے ویلا ویلا ای اے اسیں ویلے دی دولت توں مالا مال آں تے اینے ای سخی کہ ایس قیمتی شے نوں لٹاندے پھردے آں۔ گھنٹیاں تک انٹرنیٹ، موبائل فون تے سماجی رابطیاں دی ویب سائٹ تے برباد کرن دے بعد وی ویلے دی کمی دا رونا روندے رہنے آں۔ دنیا دی ترقی یافتہ تے مصروف ترین قوماں نے اجے تک کتاباں نال رشتہ نہیں توڑیا اے۔ کتاباں دے شیدائی مطالعے وچ مصروف نظر آندے نیں۔ ایس گل دی وی لوڑ نہیں کہ اسیں ایہ بحث کریئے کہ کتب بینی کیہ اینی ضروری اے، کتاب تے سماج وچ نویں سوچ نوں لے کے آندی اے۔ اسیں ہر فورم تے تبدیلی دی گل کرنے آں پر تبدیلی کیویں آوے گی جدوں نوجوان شعور توں عاری ہون گے۔ مصیبت ایہ اے کہ شعور تے علم دا محتاج ہوندا اے۔ جستجو کیویں کریئے اسیں تے مادہ پرستی دی بھیڑ وچ اک دوجے نوں نیچا وکھا کے اگے ودھنا چاہنے آں۔ مطالعے دی روایت اخلاقی، تہذیبی، معاشی، معاشرتی، ثقافتی، نفسیاتی، سائنسی تے دوجے سارے علوم و فنون لطیفہ نوں سنوارن دی خدمات انجام دیندی اے۔ کتاباں نال ذہن دی آبیاری ہوندی اے، ایہ معاشرے نوں پروان چڑھان وچ بنیادی کردار ادا کردی اے۔ ایہ بہترین تہذیب دی موجد تے ذہن دے ارتقاء دا موثر ذریعہ اے۔ کوئی وی ترقی کتب بینی دے بغیر ناممکن اے۔ زندگی وچ ہر لمحہ معاون و مددگار رہندیاں نیں۔ کتاباں نے ہر دور وچ مثبت و منفی کردار ادا کیتے نیں۔ ساریاں قوماں تے تہذیباںکسے نہ کسے کتاب دے تابع رہیاں نیں۔ کسے وی قوم، ملک و ملت دی تہذیب دا نکتہ نظر متعین کرن وچ اہم خدمات انجام دیندیاں نیں۔ کتاباں کسے وی قوم دا ورثہ ہوندیاں نیں، ایہ نسل نو نوں نویں خیالات نال روشناس کرواندیاں نیں، دوجے دے فہم و ادراک نوں سمجھن وچ مددگار ہوندیاں نیں۔ کتاباں نال ای طاقتور معاشرہ بن دا اے، خواندہ معاشرے دی تشکیل وچ اہم کردار ادا کردیاں نیں، ملک و قوم دی تقدیر بدل سکدیاں نیں کتاباں وچ علوم و فنون دے لازوال خزانے نیں، بلاامتیاز رنگ و نسل، مذہب و ملت ہر انسان دی زندگی دے نشیب و فراز وچ ساتھ دیندیاں نیں۔ اج کل جدید تقاضیاں دے پیش نظر انٹرنیٹ ت وی کتاباں موجود ہوندیاں نیں جو مطالعے نوں فروغ دین دا انتہائی موثر ذریعہ نیں، آن لائن میسر کتاباں نوں ای لائبریری آکھیا جاندا اے، جتھے ہر موضوع تے آسانی نال کتاباں مل جاندیاں نیں۔ ایہناں وسائل توں بہت گھٹ نوجوان ای فائدہ چکدے نیں کیوں جے اوہناں دا تے زیادہ تر ویلا سماجی رابطیاں دی ویب سائٹ تے ای گزر جاندا اے پر مہذب معاشرے دی نسل نو وچ ای لائبریری تے ای لرننگ بڑی تیزی نال فروغ پا رہیاں نیں۔ کتب بینی دی عادت نوں نسل نو وچ پروان چڑھان لئی جتھے اساتذہ نوں محنت کرن دی لوڑ اے اوتھے والدین دی وی ذمہ داری اے کہ اوہ شروع توں ای بالاں وچ مطالعہ دی عادت پروان چڑھان تاں جے وڈے ہو کے ایہ عادت پکی ہو جاوے تے نال ای کھیڈاں دے میداناں نوں وی آباد کرنا چاہیدا اے جو کہ ایس ویلے گھٹ ہوندے جا رہے نیں یاں تے سیاست دی نذر ہوندے جا رہے نیں۔ کوئی وی قوم یاں نسل اودوں تک ترقی نہیں کر سکدی جدوں تک اوہدی تربیت اک جواب دی طرح نہ ہووے۔

اپنا تبصرہ گھلو