ਨਵੀਨਤਮ

بوگس سیاست وانگوں بوگس ویاہ ...... اسد مفتی

Asad Mufty

تحریر:

اسد مفتی

خبر آئی اے کہ انگلستان وچ وسن والی ایشیائی کمیونٹی وچ جبری ‘بے جوڑ تے سہولت دیاں ویاہواں دامسئلہ شدت اختیارکردا جا رہیا اے۔ ایس گل دا اظہار یا انکشاف حال وچ ای  منعقدہ بے جوڑ ویاہواں دے حوالے نال اک ملک گیر کانفرنس وچ کیتا گیا۔ایس توں پہلے وزیراعظم تھریسامے دے حوالے نال خبر آ چکی سی کہ اوہناں نے وعدہ کیتا اے کہ حکومت بوگس تے جبری ویاہواں دے خلاف اقدامات کرے گی۔ پچھلے ہفتے پاکتانی نژاد میئر لندن صادق خان نے اخباری نمائندیاں نال گل بات کردے آکھیا اے کہ منظم گروہ بوگس ویاہواں تے سہولت دے ویاہ کرواکے وڈی رقم وٹ رہے نیں۔ اوہناں نے آکھیا کہ ایہ وی جبری ویاہواں جیا جرم اے۔ ایدھر سکاٹ لینڈ وچ چھپن والی اک رپورٹ دے مطابق صرف سکاٹ لینڈ وچ ہر سال تقریباً 2سو ایشیائی ویاہ ایسے ہوندے نیں جہناں وچ اک فریق دا تعلق غیر ملکاں نال ہوندا اے۔ اوہناں وچوں50فیصد ویاہواں دا براہ راست تعلق بے جوڑ تے جبر نال ہوندا اے۔ ایس قسم دی صورتحال توں ایس جبری شادی شدہ جوڑے دے اڈ اوہناں دوواں دے خاندان اتے وی ایس بے جوڑ ویاہ دا اثر پیندا اے۔ ایہو وجہ اے کہ حکومت اک نویں قنون نوں ملک وچ متعارف کروا رہی اے جہدے توں ایہناں افراد دے خلاف جنسی جرائم ‘ اغوا تے حبس بے جا دے قنون دے تحت مقدمہ چلایا جا سکے گا۔ جہناں اتے زبردستی دے ویاہ دا الزام ثابت ہو جاوے گا۔ آن والے ویلے وچ انگلستان وچ رہن والے پاکستانی بھارتی تے دوجے ایشیائی والدین نوں اپنے بالاں دا زبردستی ویاہ کروان اتے کڑی سزا دا سامنا کرنا پوے گا۔ میرے حساب نال جبری ویاہ نہ صرف انسانی حقوق دی خلاف ورزی اے بلکہ ایہ بین الاقوامی طور تے تسلیم شدہ اقوام متحدہ دے انسانی حقوق دے چارٹر تے معیار دی وی خلاف ورزی اے تے نہ ای مذہبی کلچر دے حوالے نال ایہدا جواز پیش کیتاجا سکدا اے۔ ساڈے مقابلے وچ بھارتی کمیونٹی وچ ایس قسم دے بے جوڑ تے جبری ویاہواں دی مثال کدھرے کدھرے اے۔ پورے برصغیر وچ اہدا رواج اے حکومت برطانیہ جہڑے نویں قنون نوں ملک وچ متعارف کر ارہی اے اوہدے تحت ایشیائی والدین نوں اپنے بالاں دی مرضی دے خلاف ویاہ دے بندھن وچ بنھن اتے اغوا تے حبس بے جا دے مقدمیاں دا سامنا کرنا پوے گا تے ان دے ویاہ لئی کسے وی ایشیائی ملک توں آن والے نوں برطانیہ وچ داخلے دی اجازت نہیں دتی جاوے گی ایس لئی قنون دے تحت کسی ایشیائی والدین لئی ایہ ممکن نہیں ہووے گا کہ اوہ اپنے پتر‘دھی یا بہن بھرا دا ویاہ اوہدی مرضی دے خلاف کر سکے۔اک اندازے دے مطابق برطانیہ وچ سالانہ بارہ سو ویاہ والدین دی مرضی نال ہوندے نیں جہناں وچ بوہتیاں کڑیاں شامل نیں پر ہن انج نہیں ہو سکے گا۔
جہڑے مذہبی رہنما ویاہ جہے خوشگوار واقعے نوں والدین اتے چھڈ دیندے نیں اوہ میرے حساب نال مذہب دی روح نہیں سمجھدے۔ اسلام دا نقطہ نظر قنون نکاح تے طلاق وچ بالکل واضح اے۔ اسلام وچ ویاہ دا مقصد ایہ اے کہ نفس دی تسکین ہووے دل نوں راحت اے ضمیر نوں استقرار حاصل ہووے تے مرد تے عورت محبت رحم تے ہمدردی‘ یکسانیت تے ہم آہنگی باہمی تعاون آپس دی شفقت تے مہربانی تے اک دوجے دی خیر خواہی دے نال حیاتی گزارن تے ایہ ایسے صورت ممکن ہو سکدا اے جدوں دوویں فریقاں دی سو فیصد رضامندی شامل ہووے۔ جدوں اسلام وچ جبر نہیں اے تے اسلامی ویاہ وچ جبر کیویں ہو سکدا اے؟ اسلام نے عورت نوں جہڑے حقوق دتے نیں اوہدے وچ پہلی شے شریک حیات دے انتخاب وچ اوہدی پسند تے معیار دا خیال رکھنا تے نکاح ویلے اوہدی رضا مندی اے جہدے بغیر نکاح نہیں ہو سکدا۔ عہد رسالت دا واقعہ اے کہ اک شخص نے اپنی کڑی دا نکاح اک مالدار شخص نال کر دتا۔ کڑی اوہنوں پسند نہیں کردی سی۔اوہنے نبی کریمﷺ نوں عرض کیتا کہ میرے والد نے میرا ویاہ اپنے دولت مند بھتیجے نال کردتا اے تاں جے مینوں پھسا کے اپنے عیش و عشرت دا سمان کرے۔ آپﷺ نے فرمایا: تینوں ایہ عقد پسند نہیں تے توں آزاد ایں۔ اوہنے جواب دتا: میرے والد نے جہڑا کم کیتا اے اوہنوں میں بحال کرنی آں پر میں چاہنی آں کہ عورتاں نوں ایہ پتہ چلے کہ اوہناں دی مرضی دے خلاف والدین نوں اوہناں دے نکاح دا حق نہیں اے۔ (مسند احمد ج۲‘ ص۱۳۶)
٭٭٭٭٭٭٭٭٭٭
 

ਨਵੀਂ ਟਿੱਪਣੀ ਸ਼ਾਮਿਲ ਕਰੋ

About text formats

ਸਬੰਧਤ ਨਿਊਜ਼

Services