ਨਵੀਨਤਮ

ہن چوراں تے لٹیریاں توں حساب دا ویلا اے۔۔۔۔۔۔۔ مدثر اقبال بٹ

Mudassar Iqbal Butt

تحریر:

مدثر اقبال بٹ

 

پاکستان اپنے بہترویں ورھے چ پیر پائون دے نال نال اجیہے تریخی دورچ داخل ہو رہیا اے جتھے قیام پاکستان دا خواب استحکام پاکستان دی راہے پے رہیا اے۔ہونا تے ایہہ بوہت پہلاں چاہیدا سی پرکجھ فہم قیادت دے عقلوں پیدل فیصلیاں نے پینڈا ڈاھڈا کھوٹا کیتا۔اوہ پاکستان جنھے فلاحی ریاست بننا سی،اوہ چند جاگیر داراں،وڈیریاں تے طاقتوراں دا یرغمال بن کے رہ گیا۔ریاست چ کوئی نظام سی تے نہ کوئی ضابطہ۔تگڑے نے جدوں چاہیا،اپنی مرضی نال قنون دی باندی نوں جنھاچاہیا نچا لیا۔اینھاں اکہتراں سالاں چ ظلم دی چکی وچ پس دا غریب معجزے ای اڈیکدا رہیا۔ناامیدی دے ایس حبس وچ آساں مردیاں جارہیاں سن۔کنی واری ،ایہناں دے مکدے ساہ مر مر کے بحال کیتے ،پر ہر واری ریاست دے سر اتے سوار ہون والے طبقے نے ایہناں آساں دا قتل عام کیتا۔
سیاست دی ایس کھیڈ چے اجیہی کھیہ اڈائی گئی کہ چنگیائی دا تے نین نقشہ ای دھندلا گیا۔میں ایہناں اکہتر ورھیاں دا کیہ کیہ رونا روواں،پلس پٹوار توں لگ کے عدالتاں دی سولی اتے ٹنگے انصاف تیک۔سڑکاں اُتے مردے مظلوماں توں لے کے بیوروکریسی دے اوس الوتیکر جیہڑا ہر شے پٹھی ویکھن دا عادی اے۔تے فیر ایس الو،دے پٹھے میراثیاں تے خوشامدیاں دیا ں سرکاری جُتیاں چمکاوندیاں زباناں تیکر۔ستر ورھے لمیاں ایہناں راہواں اتے بے غیرتی تے بے شرمی دی اجیہی دھوڑ اڈ رہی اے کہ کجھ وی صاف تے شفاف نظر نہیں آوندا۔۔۔۔پر ہن پاکستان دے بہترویں ورھے،مینوں موسم بدلدا نظر آرہیااے۔پتا نہیں کیوں ،مینوں محسوس ہورہیا اے کہ ہن حرام خوراں دا برا ویلا آون والا اے۔آساں تے امیدا ں دے جگنوپہلاں وی جگدے بجھ دے ویکھے سن ،پر ہن ایہناں دی روشنی نویکلی تے کھری کھری اے۔۔۔۔چوناں توں بعد ،ملکی سیاست نویں روپ چ سر چک رہی اے۔میں پہلاں وی آکھیا سی کہ عمران امید دا ناں اے۔اوہ میرٹ دی گل کردا اے،اوہ سفارش تے پرچی کلچر دا خاتمہ چاوہندا اے۔رب تعالیٰ نے ہن اوہنوں اقتدار دی نعمت نال نوازیااے۔ایہہ نعمت ،اجیہا امتحان اے ،جیہدے چ کامیابی ،سرداریاں نوں سداقائم رکھ دی اے۔تے جے ایس نعمت دا حق ادا نہ کیتا جائے تے فیر سرداری تے جاندی ہی اے ،نال دستار تے سر وی لے جاندی اے۔

مینوں عمران تے اوہدی حکومت توں بوہت امیداں نیں۔خاص طور اتے احتساب دا جیہڑا نعرہ اوس بلند کیتا سی ہن اوہدے اُتے عمل دا ویلا اے۔بوہتی دور جان دی لوڑ وی نہیں،سب توں پہلاں سابق چیئرمین نیب قمر زمان چوہدری کولوں صرف پچھلے پنج ورھیاں دا حساب منگوا لیا جائے۔ایہہ بد بخت اجیہا مکروہ کردار اے،جنھے انصاف دے منہ اُتے کالک ملن چے کوئی کسر نہیں چھڈی۔عوام دے پیسیاں دی تنخواہ لین والا ایہہ فراڈیا،لٹ مار مافیا دا ایجنٹ بنیارہیا۔بے شرم آدمی نوں عدالتاں بار بار آکھیا کہ تینوں شرم نہیں آوندی یا توں محسوس نہیں کردا؟۔پر ایہہ تاں شاید شرم دے ناں توں ای واقف نہیں ۔۔۔دوجے بنھے خوشی ایس گل دی وی اے کہ ہن ساڈیاں عدالتاں وی مصلحتاں دا چولا لاہ کے انصاف دی راہے ٹر پئیاں نے جیہدا کریڈٹ خالص تر سپریم کورٹ نوں جاندا اے۔جناب ثاقب نثا رصاحب تسیں ماڑے بندے دی آوازاو،ایس ماڑے توں روٹی روزی کھون والیاں توں حساب ضرور لئو،پر ایہناں دی رکھوالی کرن والیاں نوں وی بخشیانہیں جا سکدا۔قمر زمان چوہدری ٹیسٹ کیس اے،ایہہ لٹیرا بوہت کجھ بکے گا۔

سب توں پہلاں اجیہے ظالما ںتوں حساب لئو،فیر ویکھو نظام آپنے آپ ای کیویں سدھی راہے پیندا اے۔۔۔۔میں اخیر اُتے ایہہ وی کہنا چاہواں گا کہ ،پنجاب دی بیوروکریسی وچ جیہڑیاں حرام خوریاں ہوئیاں تے جس طرحاں دونمبراں نوں حیثیت یعنی گریڈتوں ودھ نوازیا گیا،اوہدے پچھے وجوہات وی لبھیاں جان۔اوہ سفارشی ڈی جی پی آر ہووے یا کوئی ہور میراثی صفت،ایسے سب کرداراں نوں وی کٹہرے چ لیانا ای گند مکاون ولے سفر دا آغاز اے۔ہن حکومت نوں ثابت کرنا پوے گا کہ بیوروکریسی چ بندے میرٹ اُتے ای لائے جان گے ۔سفارشی ،خوشامدی تے میراثی لوکاں نوں سنیارٹی ویکھیوں بغیر اپنے سینئرز دے سر اتے نہیں بٹھایا جائے گا۔ایس امید نال اجازت چاہواں گا کہ آون والے ویلے چ ساہنوں بدلیا ہویا پاکستان نظر آئے گا۔اوہ پاکستان جتھے حقداراں دا حق مارن دی روایت مر جائے گی۔ہن سفارشیاں تے میراثیاں توں جان چھڈاون دا ویلا اے۔جے عمران تے اوہدے سنگیاں نے ایس مافیا نوں سدھا کر لیا تے فیر ملک دی ترقی دا راہ وی سدھا تے صاف ہوجائے گا۔
ڈھیر دعاواں تے آساں نال،رب راکھا۔

ਨਵੀਂ ਟਿੱਪਣੀ ਸ਼ਾਮਿਲ ਕਰੋ

About text formats

ਸਬੰਧਤ ਨਿਊਜ਼

Services