دسیا جاوے کورونا مریضاں لئی جہڑے وینٹی لیٹرز آئے سن، اوہ کتھے نیں؟ مریم اورنگزیب

لہور: ترجمان مسلم لیگ (ن) نے اسلام آباد وچ کورونا مریضاں لئی عدم سہولتاں تے تشویش دا اظہار کیتا۔

مریم اورنگزیب آکھیا دسیا جاوے کہ کورونا مریضاں لئی جہڑے وینٹی لیٹرز آئے سن، اوہ کتھے نیں؟ مریم اورنگزیب دا کہنا سی اسلام آباد وچ کورونا مریضاں دی تعداد2400توں ودھ چکی اے تے صرف 12وینٹی لیٹرز کم کر رہے نیں، پمز ہسپتال وچ 80بستر دے آئیسولیشن وارڈ وچ دوجے آئی سی یوز توں 9وینٹی لیٹرز منتقل کیتے گئے، پمز دے سرجیکل آئی سی یو دے 4، میڈیکل آئی سی یو دے 2تے کارڈیالوجی سرجری آئی سی یو دے 3وینٹی لیٹرز کورونا وارڈ وچ منتقل کیتے گئے، اسلام آباد دے دوجے وڈے ہسپتال پولی کلینک وچ صرف 4وینٹی لیٹرز نیں۔

مریم اورنگزیب دا کہنا سی پولی کلینک وچ کورونا مریضاں لئی صرف 10بستریاں دا آئیسولیشن وارڈ قائم اے۔

اوہناں آکھیا اسلام آباد دے سرکاری ہسپتالاں وچ کل 90بستر دے کورونا آئیسولیشن وارڈ دے سوا ہور کوئی انتظام نہیں، لواحقین اپنے کورونا مریضاں دی جان بچان لئی وینٹی لیٹرز دے حصول دی خاطر سفارشاں تے منتاں کرن تے مجبور نیں، سرکار جھوٹھ تے جھوٹھ بول کے قوم دی زندگیاں نال کھیڈ رہی اے۔