لہور: ینگ ڈاکٹراں نے او پی ڈیز بند کرن دا اعلان کر دتا

لہور دے ینگ ڈاکٹراں نے ایس او پیز بنن تے ایہناں تے عملدرآمد تک سرکاری ہسپتالاں دی او پی ڈیز وچ کم نہ کرن دا اعلان کر دتا۔ لہور دے جنرل ہسپتال وچ ینگ ڈاکٹرز ایسوسی ایشن دے رہنماواں نے پریس کانفرنس کردیاں آکھیا کورونا دے حوالے نال ہر حکومتی فیصلہ غلط ثابت ہوندا رہیا اے، سرکار نے ثابت کیتا اے کہ اوہ اپنی ضد ہیلتھ پروفیشنلز تے لاگو کرنا چاہندی اے۔ ینگ ڈاکٹرز نے آکھیا ایس او پیز بنائے تے ایہناں تے عملدرآمد ہوئے بغیر او پی ڈیز وچ کم نہیں کراں گے، سرکار اپنی نکامی تے نااہلی ساڈے تے پانا چاہندی اے۔ اوہناں دا کہنا سی 60ڈاکٹراں سنے 100توں ودھ ہیلتھ پروفیشنلز کورونا دا شکار ہو چکے، رسک الاؤنس سارے ہیلتھ پروفیشنلز لئی ہونا چاہیدے نیں، اک ہفتے تک ہیلتھ پروفیشنلز نوں رسک الاؤنس نہ دتا گیا تے اسیں ہور خدمات سرانجام نہیں دیواں گے۔