ریاست کیہڑی تے حکومت کتھے اے ؟

لکھت:آصف عنایت

زندگی تے میرے رب دی دین اے فیر ریاست کیوں ہر ساہ دی قیمت وصول کر رہی اے۔ ریاست توں مراد عدلیہ، انتظامیہ اے جد کہ ہر ادارہ تے ادارہ ہر مقتدر اپنے آپ نوں ریاست سمجھن لگیا۔ چیف جسٹس آف پاکستان جناب گلزار احمد نے اگلے دن از خود نوٹس دے اک مقدمے دی سماعت وچ ریمارکس دتے ’’جعلی لائسنس اُتے جہاز اڑانا انج ای اے جویں کوئی چلدا پھردا مزائل ہوا وچ اڑ رہیا ہوئے۔ جے حکومت دی کوئی معاشی پالیسی اے تے سو تے کیہ ای خوب فرمایا کہ ’’حکومت کتھے اے ؟‘‘ عوام نوں روٹی، پٹرول، تعلیم، صحت تے روزگار دی لوڑ اے۔ سیاسی لوک اک دوجے اُتے کیچڑ اچھال رہے نیں۔ ٹی وی اُتے بیان بازی نال عوام دا ڈیڈھ نہیں بھرے گا تے لاجواب گل کیتی کہ ایس آئین توں فائدہ چکن دے انتظار وچ بڈھا ہو جاندا اے پر آئین دا پھل صرف کجھ لوک کھا رہے نیں ایس وچ کوئی عام بندا شامل نہیں۔ ( گویا میرے مطابق آئین توں استفادہ ایس حلف چکن والیاںِ معطل کرن والیاں، بحال کرن والیاں تے آئینی عہدہ حاصل کرن والیاں نے ای حاصل کیتا اے البتہ آئین بنان والا سولی چڑھ گیا )۔ 26 جون نوں سپریم کورٹ نے کہیا کہ دوا ساز ادارے وی مافیا خریداری دے ناں اُتے منافع باہر گھل دیندے نیں، حکومت کجھ نہیں کردی۔ ڈریپ ویلے اُتے فیصلا نہ کرے تے دوائی دی قیمت آپے ودھ جاندی اے۔ ایہہ فرمانا سی کہ اٹارنی جنرل دا گویا جواز گناہ بدتراز گناہ ایہہ وی کہ اک کمپنی نے 8 دوائیاں دی قیمت کئی گنا ودھا دتیاں۔ ہجے جانکاہ صورت حال عوام برداشت نہ کر پائی کہ حسرت بنے پٹرول دی قیمت وچ ریکارڈ وادھا کر دتا گیا۔ جدوں پٹرول سستا سی تے کمپنیاں نے دین توں انکار کر دتا۔ وفاق سرنڈر اوگرا دا کردار نظر انداز تے پٹرولیم و خزانہ ڈویژن نے قیمتاں دا تعین کیتا قیمت ودھدے ای تیل عام ہو گیا۔ ہجے میرا خیال سی کہ میں فواد چوہدری دے انٹرویو راجہ ریاض دے ٹسوے، خواجہ شیراز دی غیر منتخب لوکاں دے ہتھوں پارلیمانی نظام وچ حکومت چلن دا ذکر کراں گا۔ ریاض محمود مزاری دا بیان کہ کوئی تبدیلی نہیں حالات بدتر نیں اورنگ زیب کچھی دا گلہ کہ ایواناں توں وزیر تے وزیراعظم غائب رہندے رہن تے اسحق خاکوانی دی امید کہ حکومت چلدی رہوے گی جنہاں ے اکثریت قائم رکھنا ہوندی اے اوہ کیتے رکھن گے رقم کرواں گا۔ (ایہہ سب حکومتی بندے نیں) ۔ آٹا، چینی دا بوہت شور مچیا پر سستی تے کیہ چینی غائب ای ہو گئی۔ اسمبلی اجلاس وچ خواجہ سعد رفیق نے کہیا کہ اوہ ویلا آئے گا کہ وزارت دین والے پھرن گے پر لوے گا کوئی نہیں تے گل اگے ودھائی کہ بلکے آ چکیا اے ہن اسیں وی availavleدستیاب نہیں تے پیپلز پارٹی دے بنچاں ول اشارہ کیتا کہ ایہہ وی دستیاب نہیں پر ایہناں گلاں اُتے اظہار خیال دی نوبت ای نہیں آئی کہ ہر لمحہ تنزلی ول حالات دا سفر انج جاری اے جویں ذمے داراں نے قائداعظم دے احسان دا بدلہ اتارن دی ٹھان لئی اے۔ 35 ورھے حکومت کرن تے 72 ورھے دی گل کرن والے ایوب، یحییٰ ، ضیاء تے مشرف دے ادوار شمار کردے نیں کہ نہیں؟ خدا خدا کر کے وزیراعظم اسمبلی وچ آئے تے تقریر فرمان توں بعد اینا ویلا وی نہ دتا کہ کسے دی گل سن لین۔ غیر ملکی وی اسمبلی وچ تقریر کردا اے تے اوہ کجھ ویلا پارلیمنٹ دی توقیر لئی اوتھے موجود رہندا اے پر تقریر وچ اسامہ بن لادن نوں پہلے کہیا سانوں ہتک محسوس ہوہئی کہ امریکیاں ے اسامہ نوں آ کے مار دتا فیر مار دتا دی فوراً اصلاح کیتی کہ شہید کر دتا جیہڑے ایہہ کہندے نیں کہ شہید زبان دا پھسلنا سی۔ کلب دوبارہ سنو مار دتا زبان دا پھسلنا اے جیہڑا فوراً ای شہید کہہ کے لفظ دی اصلاح کیتی۔ انسان دا نقطہ نظر ہوندا اے ایس اُتے قائم رہنا چاہیدا اے پر ایہہ واحد رہنما نیں جنہاں دا زبان پھسلنا، زبان اُتے لفظ نہ چڑھنا چاہے اوہ خاتم النبین ؐ ای کیوں نہ ہوئے ایہناں دے پیروکاراں نے بوہت دفاع کیتا۔ بلاول بھٹو نے عمران خان نوں جھوٹا، نااہل، نالائق سلیکٹڈ تے اک وار تے بے غیرت کہہ دتا سی پر ہن دی وار اوہناں نے مناظرے دا چیلنج دتا جس اُتے پی ٹی آئی والے دا فی سیخ پا نظر آندے نیں۔ شاید بلاول توں نراض نیں۔ اصل وچ میرے خیال نال عمران خان زرداری صاحب تے میاں صاحب تے دور دی گل مریم تے بلاول دا 5منٹ وی ساہمنا نہ کر پان گے۔ تیجی قوت دی تلاش وچ ملک زمین دی تیجی تہہ ول چلا گیا ۔ پہلی دو سیاسی قوتاں دے منحرف تے کمزور اخلاقی تے سیاسی کردار دے مالک لوکاں نوں اکٹھا کر کے تیجی قوت بنان دی کوشش سمجھ توں بالا تر اے تے امید رکھنا کہ بھلائی ہوئے گی ایہہ انج دے ای جویں کسے نوں مینار پاکستان توں دھکا دے کے سٹ دین تے ایس دی حیاتی دی دعا کرن تے امید وی رکھن۔ اسیں تے قدرت نوں وی امتحان وچ پایا ہویا اے قدرت اپنا نظام افراد تے اقوام دی خاطر نہیں بدلدی قدرت دے تابع کوششاں کرن والے ای کامیاب ہوندے نیں۔ جن سرکار ؐ دی امت آں ایہناں دے زخمی صحابہ ؓ وچوں کسے نے وی اک غزوہ وچ پانی دا پیالہ نہیں پیتا کہ دوجے نوں دے دیو۔ زخمی حالت وچ دوجے دی فکر کردے ہوئے شہید ہو گئے پر ساڈی اخلاقیات تے کردار تے ویکھو کہ ایتھے افواہ ودھ جائے کہ فلاح دوائی یا جڑی بوٹی کرونا وبا لئی فائدہ مند اے اوہ مہنگی تے درکنار غائب ای کر دتی جائے گی۔ لعنت اے انج دی سوچ، انج دے کردار انج دے اخلاق اُتے۔ حکومت نے ہواز بازاں دا معاملہ انج ڈیل کیتا جویں بھارت دا مسئلا سی تے اپنی ایئر لائن دی شہرت نوں مزید برباد کر دتا۔ اصل وچ عروج نوں نہیں تکبر نوں زوال ہوندا اے۔ ساڈے وزیراعظم دا تکبر ای بے قابو اے تے غلط فہمی کہ ساڈے علاوہ کوئی چوائس نہیں واہ! کیہ قحط الرجال اے؟ ڈھٹائی، پارلیمانی نظام دی روایات دے برعکس رویہ ملک دا نقصان کر چکیا۔ بھارت چائنہ دے ہتھوں ذلالت توں بعد ساڈے ول جارحیت دے در پے اے جویں 1965ء وچ ہویا کیہ حکومت نوں ادراک اے۔ موجودہ حکومت دی نااہلی نے بیوروکریسی دی چاندی کر دتی جدوں حکومت دی گل اُتے بھروسہ تے رٹ قائم نہ رہوے تے سمجھو کھیڈ ختم ۔ مافیاز دا رونا روندی حکومت ہن آپ مافیا بن گئی۔ میں نہیں چیف جسٹس پچھدے نیں حکومت کتھے اے تے عوام پچھدے نیں ریاست کتھے اے ؟

اپنا تبصرہ گھلو