نوازشریف دا صبر جت گیا : مریم نواز

لہور : مسلم لیگ (ن) دی نائب صدر مریم نواز دا کہنا اے عدلیہ دے وقار تے انصاف دا تقاضا اے داغدار جج دے داغدار فیصلیاں نوں اکھاڑ کے سُٹ دتا جائے۔ مریم نوازشریف آکھیا احتساب عدالت دے سابق جج ارشد ملک نوں برطرف دے فیصلے نے نوازشریف نہیں سگوں عدل و انصاف دے دامن تے لگیا وڈا داغ دھو دتا، تن وار ملک دے وزیراعظم رہن والے مقبول ترین سیاستدان دی بے گناہی تے ویلے دا فیصلہ آ گیا اے، نوازشریف دے چاہن والے رب دے حضور سجدہ شکر ادا کرن۔ نوازشریف دا صبر جت گیا، اوہناں دی استقامت جبر تے بھاری رہی، عدلیہ دے وقار تے انصاف دا تقاضا اے کہ داغدار جج دے داغدار فیصلیاں نوں اکھاڑ کے سُٹ دتا جائے۔ مریم نوازشریف آکھیا آئین و قنون دے احترام دا درس دینا بہت آسان اے، ایہ جاندیاں ہوئیاں کہ تسیں بے قصور او، جاندیاں ہوئیاں کہ ظلم تے ناانصافی ہو رہی اے، اللہ بے گناہ تے بہادر لوکاں نوں کلیاں نہیں چھڈدا۔