سندھ سرکار نے صوبے وچ انٹر سٹی بساں نوں چلان دی اجازت دے دتی

کراچی: سندھ سرکار نے صوبے وچ اک ضلع توں دوجے ضلع جان والی انٹر سٹی بساں نوں چلان دی اجازت دے دتی ۔ دیس دے دوجے شہراں لئی اجے تک پابندی برقرار اے۔ کورونا تے لاک ڈاؤن دی صورتحال وچ انٹر سٹی ٹرانسپورٹ تے پابندی چک لئی اے۔ سندھ سرکار نے ٹرانسپورٹراں نوں مشروط اجازت دے دتی۔ اک ضلع توں دوجے ضلع وچ چلن والی سارے مسافر گڈیاں نوں ایس او پیز دے تحت اجازت دتی اے۔ وزیر ٹرانسپورٹ سندھ اویس شاہ دا کہنا اے مسافر گڈیاں وچ مسافراں نوں تن فٹ دا فاصلہ رکھنا لازمی ہووے گا، کوچ وین تے بساں وچ ماسک، سینی ٹائزر دا استعمال وی لازمی ہووے گا، ساری مسافر گڈیاں سندھ سرکار دے مقرر کیتے بس اڈیاں توں نکلن گیاں۔ اویس شاہ آکھیا صرف سندھ دے اک ضلع توں دوجے ضلع لئی اجازت دتی گئی اے جد کہ ملک دے دوجے شہراں لئی پابندی اجے تک برقرار اے۔