کورونا توں بچاؤ لئی سانجھی حکمت عملی اپنانی ہووے گی: وزیراعظم عمران خان

اسلام آباد: وزیراعظم عمران خان آکھیا اے کورونا وباء توں بچاؤ لئی سانجھی حکمت عملی اپنانی ہووے گی، لاک ڈاؤن ہوندیاں ای مزدور طبقہ بیروزگار ہو گیا، حتمی طور تے ایہ کوئی نہیں آکھ سکدا کہ معیشت کدوں سنبھلے گی۔ عالمی فورم نال وزیراعظم عمران خان دا خطاب کردیاں کہنا سی کورونا کجھ ملکاں وچ گھٹ ہون دے بعد دوبارہ ودھیا، ساڈے کول محنت کش طبقے دا ریکارڈ نہیں اے، مزدور طبقے دے ٹبراں دادارومدار اوہناں دی آمدن اُتے اے، اسیں سانجھی حکمت عملی دے تحت کورونا دے زیادہ کھلار نوں روکیا، پوری دنیا وچ مزدوراں لئی مشکل ویلا اے۔ وزیراعظم آکھیا وباء توں بچن لئی سانجھی حکمت عملی بنانی ہووے گی، بھارت وچ کرفیو توں مزدور طبقہ بری طرح متاثر ہویا، کسے نوں علم نہیں وباء توں متاثر معیشت کدوں بحال ہووے گی؟ لاک ڈاؤن وچ غریباں لئی خوراک دی ضرورتاں پوری کرنا مشکل ہو گیا، مزدور طبقے دی مشکلات ویکھدیاں سمارٹ لاک ڈاؤن دا فیصلہ کیتا، اسیں چھوٹے طبقے لئی احساس پروگرام شروع کیتا، دوجے ملکاں نوں اپنے اقدامات توں آگاہ رکھاں گے، آئیڈیاز دے تبادلیاں توں بہت مدد ملے گی۔