ماضی دے غلط فیصیلیاں نال معیشت کمزور ہوندی رہی: وزیراعظم

چلاس: وزیراعظم عمران خان دا کہنا اے پاکستان وچ بجلی پیدا کرن دی بھرپور سہولتاں موجود نیں پر غلط فیصیلیاں نال دیس دی صنعتی ترقی نوں نقصان اپڑیا۔ وزیراعظم عمران خان نے گلگت بلتستان دا دورہ کیتا جتھے اوہناں نے دیامر بھاشا ڈیم دے کم دا جائزہ لیا۔ وزیراعظم نوں دیامر بھاشا ڈیم تے کم دی پیشرفت بارے بریفنگ دتی گئی۔ ایس موقع تے آرمی چیف جنرل قمر جاوید باجوہ، ڈی جی آئی ایس آئی لیفٹیننٹ جنرل فیض حمید تے وفاقی وزیر فیصل واوڈا وی موجود سن۔ بعدوں وزیراعظم عمران خان نے چلاس وچ عوامی اجتماع نال خطاب کردیاں آکھیا دیامر بھاشا ڈیم تیجا وڈا ڈیم اے، پاکستان وچ بجلی پیدا کرن دی بھرپور سہولتاں موجود نیں پر غلط فیصیلیاں نال دیس دی صنعتی ترقی نوں نقصان اپڑیا، دریاواں توں بجلی بنان دے بجائے تیل تے بجلی بنان نوں ترجیح دتی، مہنگی بجلی دی وجہ توں صنعتاں تے اثر پیا جد کہ سانوں خدشہ اے مستقبل وچ سیلاب جہی صورتحال دا ساہمنا نہ ہووے۔وزیراعظم عمران خان دا کہنا سی پاکستان دی بدقسمتی رہی کہ شارٹ ٹرم فیصلے ہوئے، اسیں ماضی وچ غلط فیصلے کیتے جہدی وجہ توں معیشت کمزور ہوندی رہی، ساڈی کرنسی اُتے روپے دی قدر وچ کمی دی وجہ توں دباء آیا، 20ارب روپے دا خسارہ سانوں ورثے وچ ملیا، جدوں رقوم باہر جاندیاں نیں تے کرنٹ اکاؤنٹ خسارہ ودھدا اے۔وزیراعظم آکھیا انساناں تے سرمایہ کاری، انصاف تے قنون تے عملدرآمد نال ترقی ہوندی اے ، اوہ قوماں ترقی کردیاں نیں جہڑیاں مشکل فیصلے کردیاں نیں، چین دی کامیابی طویل المدتی منصوبے بنانا اے، چین نے 30,30سالہ منصوبہ بندی کر رکھی اے۔ اوہناں ہور آکھیا کورونا دی وجہ توں بیروزگاری وچ وادھا ہویا تے اشیاء باہر توں منگوان دی وجہ توں مہنگائی وچ وادھا ہوندا اے۔