شہباز شریف، حمزہ شہباز، شہاہد خاقان دے خلاف نیب ریفرنسز دی منظوری

اسلام آباد: قومی احتساب بیورو (نیب) دے چیئرمین جاوید اقبال نے تن ریفرنس دائر کرن دی منظوری دے دتی۔ نیب نے شہباز شریف، سلمان شہباز تے حمزہ شہباز دے خلاف ریفرنس دائر کرن دی منظوری دے دتی۔ نیب دے مطابق شہباز شریف تے حمزہ شہباز دے خلاف آمدن توں ودھ اثاثے بنان دے الزام وچ ریفرنس دائر کیتا جائے گا۔ مسلم لیگ (ن) دے صدر تے اوہناں دے خاندان دے دوجے بندیاں نے بے نامی اکاؤنٹس توں جائیداداں بنائیاں۔ ریفرنس وچ شہباز شریف اُتے 7ہزار 328ملین روپے دے نجائز اثاثیاں دا الزام لایا گیا اے۔ شہباز شریف تے اوہناں دے پتر اپنے ملازماں تے ساتھیاں دے ناں تے بے نامی کمپنیاں وی چلاندے رہے۔ شاہد خاقان تے اوہناں دے پتر اں دے خلاف ضمنی ریفرنس دائر کرن دی وی منظوری دے دتی گئی۔ شیخ عمران الحق، آغا جان اختر، سعید خان ، عامر نسیم، عظمیٰ عادل، شاہد ایم اسلام، حسین داؤد تے دوجیاں نوں وی ریفرنس وچ ملزم نامزد کیتا گیا اے۔نیب اعلامیہ دے مطابق ملزمان نے ایل این جی ٹرمینل ون دے ٹھیکے وچ خزانے نوں 14ارب روپے توں ودھ دا نقصان اپڑایا، اوہناں نے دوجے ایل این جی ٹرمینل نوں استعمال وچ نہ لیا کے 7ارب روپے توں ودھ دا نقصان کیتا۔ ملزمان دے اختیارات دے نجائز استعمال نال ستمبر 2019تک ساڈھے 21ارب روپے دا نقصان ہویا۔

اپنا تبصرہ گھلو