خوبصورت لب و لہجے وچ کمپیئرنگ تے محبتاں ونڈن والا انسان، سیف اللہ بھٹی

عتیق انور راجہ

14اگست والا جمعہ پڑھ کے مسجد توں نکل رہیا سی کہ سیف اللہ بھٹی اُتے نظر پئی۔ اگے ودھ کے سلام دعا کیتی۔ حال احوال دریافت کر رہیا سی کہ مسجد دے خطیب پروفیسر ڈاکٹر محمد اکرم ورک صاحب چہرے اُتے مسکراہٹ سجائے ساڈے کول آ گئے۔ سیف اللہ بھٹی نے فوری کہیا کہ جناب تہاڈی فوٹو میں کسے اخبار وچ ویکھی اے جواب وچ ڈاکٹر صاحب نے فرمایا ایہہ راجہ صاحب دی محبت اے۔ نیڑے سی کہ ہجے ایس اُتے مزید گل ہوندی کہ اک منجھے ہوئے اینکر وانگوں سیف اللہ بھٹی نے گل بات دا پاسا موڑ یا تے آکھیا کہ ڈاکٹر اکرم ورک صاحب دے پچھے دو جمعے پڑھن توں بعد میں فیصلہ کر لیا اے کہ سال وچ جیہڑے دو چار جمعے پڑھاں گا اوہ جامع مسجد تاج وچ ای پڑھیا کراں گا۔ سعید احمد تاج صاحب ہجے مسجد دے اندر ای سن خیال ایہو اے کہ اوہ نمازیاں نال جشن آزادی تے جمعے دے بارے گلاں کر رہے ہون گے پر مینوں اک کیک کٹنگ تقریب وچ شرکت دی دعوت سی تے میں جتھے جانا ہوئے اوتھے ویلے اُتے اپڑن دی اپنی ہر ممکن کوشش وی کرنا واں ایس لئی میں اپنے مہربان دوستاں توں اجازت لے کے فوری گھر اپڑیا۔ دلدار پرویز بھٹی نوں بچپن وچ پی ٹی وی اُتے کجھ پروگرام کردے ویکھیا تے ایہناں دے گل بات کرن دے انداز توں انج دا متاثر ہویا کہ اک مدت تیکر کسے دوجے دی نظامت، خطابت یا کمپیئرنگ دل نوں متاثر نہ کر سکی۔ دلدار پرویز بھٹی وڈا بندا سی جیہڑا کسے وی محفل نوں اپنی جاندار گل بات نال شاندار بنا دتا کردا سی۔ اوہ اینا دلیر سی کہ وڈے وڈے بیرو کریٹس تے حکام دے اگے پنجابی وچ گل کردا تے خوب کھل کھلا کے گل کردا۔ فیر اک مدت دے بعد مینوں دلدار پرویز بھٹی دی شخصیت دا عکس سیف اللہ بھٹی وچ نظر آیا۔ ایسے وانگوں جوان، خوبـصورت تے وطن پرست، دلدار پرویز بھٹی ای وانگوں

خوبصورت لب و لہجے وچ کمپیئرنگ تے محبتاں ونڈن والا انسان۔
سیف اللہ بھٹی نال تعلق کافی ورہے پرانا اے بلکے مینوں احساس ہوندا اے کہ جویں ساڈا تعلق روحاں نال محبت دا اے۔ اونج تے پنجابی ثقافت تے زبان دے علمدار سیف اللہ بھٹی دا تعلق حافظ آباد نال اے تے اوہ ملک دے گوشے گوشے، چپے چپے گھم کے اوہ ماں بولی نال محبت دا حق بھرپور انداز وچ ادا کر رہیا اے۔ پر ہن کئی ورھیاں توں اوہ شہر محبت گونراجوالہ وچ ڈیرے پا چکیا اے۔ سیف اللہ بھٹی نوں میں جدوں وی ویکھیا اوہ دھرتی ماں دے رنگاں وچ رنگا نظر آیا۔اللہ نے شکل و صورت تے خوب دتی ای اے پر نال پان تے گل بات دا سلیقہ وی سیف نوں خوب عطا کیتا ۔ جویں فلمی ہیرو ہنز بدلدے موسماں وچ اپنے لباس دا خیال رکھدیاں نیں۔ ایسے طرح سیف بھٹی وی اپنے پہناواں تے رنگاں دا خیال رکھدا اے۔ ایہہ ہور گل اے کہ سیف دے پہناواں وچ پنجابی ثقافت دی ہمیشہ بڑی خوبصورتی نال عکاسی ہو رہی ہوندی اے۔لوکاں وچ خوشیاں تے محبتاں ونڈن والا سیف اللہ بھٹی جتھوں تیکر میں جاننا واں کدی کسے سازش دا حصہ دار نہیں رہیا۔ دور توں اک نظر ویکھیے تے خیال آندا اے کہ بوہت سنجیدہ تے اپنے آپ وچ رہن والا بندہ ہوئے گا پر حقیقت ایہہ وے کہ اندر توں میری طرح سدھا سادہ پینڈو اے جیہڑا ہر ویلے دوجیاں نوں عزت دین دی کوشش وچ رہندا اے مینوں بلکل انج لگدا اے جویں اسیں بچپن وچ نال کھیڈے آں۔

اپنی ماں نال محبت کردا اے تے ایس محبت دا اظہار ایس دی شخصیت دے ہر روپ وچ نظر آندا اے۔ پچھلے کئی ورھیاں توں کوئز پروگرام کروا رہیا اے۔ اونج تے اج کل پاکستان دے ٹی وی چینلز اُتے کوئز پروگراماں وچ انعامات دی بارش ہو رہی اے پر ٹی وی چینلز دے پروگراماں وچ کمپیئرنگ کرن والیاں دے انداز و اطوار نال ملک دے سنجیدہ حلقے اکثر خفا خفا ای رہندے نیں۔ ٹی وی دی چکا چوند روشنیاں وچ انعامات ونڈن والے کئی اینکر دے کول نہ تے آپ کوئی اینی معلومات ہوندی اے تے نہ ای ایہناں دا مقصد اصلاح قوم ہوندا اے پر جویں طارق عزیز نیلام گھر وچ انج دے سوال شامل کردے سن جنہاں نال اسلام تے پاکستان نال محبت دا اظہار ہوندا سی بلکل ایسے طرح میرا دوست سیف اللہ بھٹی اپنی مٹی نال محبت دا حق ادا کر رہیا اے۔ مینوں پتہ اے کہ سیف اللہ بھٹی دے شوز وچ خواتین تے خاص کر گھریلو خواتین دی بوہت وڈی تعداد شرکت کردی اے ایس دا کارن یقینا ایس شو دے میزبان دا چنگا رویہ ہوئے گا۔ تے اوہ اپنے شو وچ اخلاقی قدراں دا خوب خیال رکھن دی کوشش کردا ہوئے گا۔ سیف اللہ بھٹی اپنے کوئز شو دے علاوہ مختلف مشاعریاں تے تقریبات وچ وی اپنی گل بات دے جوہر خاب وکھاندا رہندا اے۔ سیف اللہ بھٹی مشاعریاں تے دوجی تقریباں وچ حاضرین محفل دی توجہ بڑی محبت نال تے کدی کدی ہلکی پھلکی ڈانٹ ڈپٹ نال سٹیج ول مبذول کروان دا فن وی خاب جاندا اے بلکل انج ای جویں اک ہر دلعزیز استاد اپنی کلاس نوں اپنی کٹھی میٹھی گلاں نال اپنا اثیر بنا کے امتحان لئی تیاری کرواندا اے ۔ پچھلے دناں اسیں ایہناں دی صدارت وچ اک مشاعرے دا اہتمام کیتا تے سعید احمد تاج بولے سیف طارق عزیز دے جان توں بعد ہن تہاڈی قدر و منزلت بوہت ودھ گئی اے۔ اردو تے پنجابی وچ خوب صورت تے طنز و مزاح نال بھرپور شاعری سیف اللہ بھٹی دی پہچان بن چکی اے۔ میرے ملک وچ مزاح لکھن والے تے بوہت ہون گے پر مزاح نوں مزاح دے رنگ وچ پڑھن دا ملکہ میرے دوست سیف اللہ بھٹی نوں قدرت نے خوب عطا کیتا اے۔