پاکستان نے 5ورھیاں وچ 16لکھ ڈالر دے انسانی وال برآمد کیتے: وزارت تجارت

اسلام آباد: وزارت تجارت نے قومی اسمبلی اجلاس وچ وقفہ سوالات وچ دسیا کہ پاکستان نے پچھلے 5ورھیاں دے دوران 16لکھ ڈالر دے انسانی وال برآمد کیتے۔

قومی اسمبلی اجلاس وچ وقفہ سوالات دے دوران وزارت تجارت نے اسمبلی نوں دسیا کہ پاکستان نے پچھلے پنج ورھیاں دے دوران 16لکھ ڈالر دے انسانی وال برآمد کیتے، پارلیمانی سیکرٹری نے دسیا کہ چین نوں پنج ورھیاں وچ اک لکھ 5ہزار 461کلوگرام انسانی وال برآمد کیتے جہدی مالیت 1لکھ 32ہزار ڈالر اے۔ پارلیمانی سیکرٹری دا کہنا سی کہ انسانی والاں دا استعمال وگز بنان وچ ہوندا اے، 2016-17وچ کینسر دے مریضاں دی تعداد وچ کمی توں وگز دی مانگ وچ وی کمی ہوئی جد کہ پاکستان، چین، امریکا تے عرب امارات سَنے کئی ملکاں نوں وال برآمد کردا اے۔