قول و فعل وچ تضاد! منافقین دا ٹھکانہ جہنم

تحریر ۔پروفیسر حکیم سید عمران فیاض

منافق،نفق نال ماخوذ اے۔ جس دا معنی سرنگ اے تے کجھ نے ایس دی وجہ ایہہ بیان کیتی اے کہ لومڑی اپنے بل دے دو منہ رکھدی اے۔ اک دا ناں نافقاء تے دوجے دا ناں قاصعاء اے۔ اک پاسیو ں اوہ وڑدی اے تے جدوں کوئی شکاری ایس دا پچھا کردا اے تے اوہ دوجے پاسے توں نکل جاندی اے تے جے پاسے توں کوئی ایس دا پچھا کردا اے تے اوہ پہلے سوراخ توں نکل جاندی اے۔ ایس دے بل دے اک پاسے دا ناں نافقاء اے، ایسے توں، منافق، ماخوذ اے۔ ایس دے وی دو پہلو نیں اک کفر جیہڑا ایس دے دل وچ اے۔ دوجا ایمان جیہڑا ایس دی زبان اُتے اے۔ جے کفر نال ایہنوں کسے نقصان دا اندیشہ ہوئے تے اوہ اپنے آپ نوں مسلمان ظاہر کرن لگدا اے تے جے اسلام پاروں ایہنوں کوئی تکلیف اپڑ رہی ہوئے تے اوہ فوراً اپنے آپ نوں کافر ہون دا اعلان کر دیندا اے۔
منافقت دا معنی اے اپنے قول تے عمل نال اوہ کجھ ظاہر کرنا جو دل وچ موجود عقائد و عزائم دے خلاف ہوئے تے اسلام وچ منافقت دا مفہوم، دل وچ کفر، شرک تے گناہواں دا اقرار تے عمل دے وجود دے نال اپنے آپ نوں قولی تے عملی طور اُتے ایمان والا، اللہ دی توحید نوں منن والا تے گناہواں توں دور رہن والا ظاہر کرنا۔
اللہ تعالیٰ نے جہنم دا سب توں نچلا درجہ، منافقین، یعنی منافقت کرن والیاں دا ٹھکانہ مقرر فرما رکھیا اے۔ ایہناں دا ٹھکانہ جہنم دے سب توں نچلے درجے وچ ہوئے گا۔
خواہ ایہہ منافق ، نفاق اکبر (وڈی منافقت) اُتے عمل کرن والے ہون، یا نفاق اصغر (نکی منافقت) اُتے، اعتقادی نفاق والے ہون یا عملی منافقت والے، سب دا ٹھکانہ اوہ ای اے۔
نبی کریم ﷺ نے ارشاد فرمایا جس وچ ایہہ چار (خصلتاں، صفات، نشانیاں) ہون اوہ خالص منافق اے تے جس وچ ایہناں وچوں کوئی اک خصلت ہوئے تے ایس وچ نفاق دی خصلت اے ایتھوں تیکر کہ اوہ ایہنوں چھڈ دیوے۔
1۔ جدوں ایس دے کول امانت رکھوائی جائے تے اوہ ایس وچ خیانت کرے۔
2۔ جدوں گل کرے تے جھوٹ بولے۔
3۔ جدوں وعدہ کرے تے وعدہ خلافی کرے۔
4۔ جدوں لڑائی کرے تے پھٹ پئے (یعنی بے حیاتی اُتے اتر آئے)۔
نبی کریم ﷺ نے فرمایا جس وچ تن (خصلتاں، صفات، نشانیاں) ہون تے اوہ منافق اے۔
*- خواہ اوہ نماز (وی)پڑھدا ہوئے،

  • – روزہ(وی) رکھدا ہوئے،
  • – حج(وی) کردا ہوئے،
  • – عمرہ(وی) کردا ہوئے۔
    تے (ایہہ وی )کہندا ہوئے کہ میں مسلمان واں ( ایہہ اوہ بندا اے ) جیہڑا
    1۔ گل کرے تے جھوٹے بولے۔
    2۔ وعدہ کرے تے وعدہ خلافی کرے۔
    3جدوں ایہنوں امانت دار بنایا جائے تے خیانت کرے۔
    منافقت انج دے طرز عمل نوں کہندے نیں جیہڑا قول و فعل دے تضاد نال عبارت ہوئے جس وچ انسان دا ظاہر، باطن توں مختلف بلکہ برعکس ہوئے۔
    منافقت دی علامات درج ذیل نیں۔
    1۔ دعویٰ ایمان صرف زبانی حد تیکر کرنا تے باطن دا ایس دی تصدیق توں خالی ہونا۔
    2۔ محض توحید و آخرت اُتے ایمان نوں کافی سمجھنا تے رسالت محمدی ﷺ اُتے ایمان نوں ایس قدر ضروری نہ سمجھنا
    3۔ دھوکہ دہی تے مکروفریب دی نفسیات دا پایا جانا۔
    4۔ایہہ سمجھنا کہ اللہ تعالیٰ تے ایس دے رسول ﷺ ساڈی حالت نفاق توں بے خبر نیں۔
    5۔ ایہہ سمجھنا کہ اسیں اپنے مکاریاں، حلہ سازیاں تے چالاکیاں نال دوجیاں نوں فریب دین وچ کامیاب ہورہے آں۔
    6 قلب و باطن دا بیمار ہونا۔
    7- جھوٹ بولنا۔
    8- نام نہاد اصلاح دے پردے وچ مفسدانہ طرز عمل اپنان دے باوجود اپنے آپ نوں صالح سمجھنا ۔
    9۔ دوجیاں نوں بے وقوف تے صرف اپنے آپ نوں اہل عقل و دانش سمجھنا۔

10۔ امت مسلمہ دی اکثریت نوں گمراہ تصور کرنا۔
11۔ اجماع امت یا سواد اعظم دی پیروی نہ کرنا۔
12۔ کردار وچ دوغلا پن تے ظاہر و باطن دا تضاد ہونا۔
13۔ اپنے مسلمان بھرا دے خلاف خفیہ سازشاں تے تخریبی منصوبے تیار کرنا۔
14۔ مسلماناں اُتے طنز، طعنہ زنی تے حقیر سمجھدے ہوئے ایہناں دا مذاق اڑانا۔
15۔ باطل نوں حق اُتے ترجیح دینا۔
16۔ سچائی دی روشن دلیل ویکھدے ہوئے وی ایس ولوں اکھاں بند کر لینا۔
17 تنگ نظری تے دشمنی وچ ایس حد تیکر چلے جانا کہ کن حق گل نہ سن سکن، زبان حق گل نہ کہہ سکے تے اکھاں حق نہ ویکھ سکن۔
18۔ اسلام دی راہ وچ پیش آن والی مشکلاں توں گھبرانا تے ایہناں توں بچائو دی تدبیراں اختیار کرنا۔
19۔ مسلمان دی کامیابیاں اُتے حیران رہ جانا تے ایہناں اُتے حسد کرنا۔
20۔ اپنے مفادات دے حصول لئی اہل حق دا ساتھ دینا تے خطرات و مصائب وچ قربانی توں گریز کردے ہوئے ایہناں توں علیحدہ ہو جانا۔
21۔ حق دے معاملے وچ نیم دلی تے ہچکچاہٹ دی کیفیت وچ مبتلا رہنا۔

اپنا تبصرہ گھلو