غزل

بشارت احمد بشارت

بھکھا بھکھ نوں ٹالی بیٹھا اے
اپنی لاش سنبھالی بیٹھا اے
میرے دیس دی دولت ساری
لٹی دیس دا والی بیٹھا اے
پیار دے موتی ونڈن والا
لے کے جھولی خالی بیٹھا اے
دھی دا داج خریدن دے لئی
ویچی ہل پنجالی بیٹھا اے
کھول کے اکھاں وچ ہنیرے
آس دے دیوے بالی بیٹھا اے
پنچھی پرت گھراں نوں ٹر گئے
شہروں باہر سوالی بیٹھا اے
رند کوئی نہ تسا جاوے
ساقیؔ جام سنبھالی بیٹھائے

اپنا تبصرہ گھلو