فردوس دے بعد نیلو وی ٹُر گئی

نیلو بیگم فلم دا اثاثہ سی۔۔ شاہد

فلم دا اک روشن باب ختم ھوگیا۔۔ چوھدری کامران

نیلو بیگم زرقا دی شکل وچ زندہ اے۔۔ اچھی خاں
بھلیکھا دے شوبز ایڈیٹر اشفاق کاظمی نے وی شرکت کیتی
(رپورٹ: رضوان اصغر بٹ) گزشتہ روز سپر سٹار شان دی والدہ تے عظیم مصنف وھدایتکار ریا ض شاھد مرحوم دی بیوہ معروف اداکارہ نیلو بیگم دی نمازِ جنازہ اوہناں دے گھر دے لان وچ ادا کر دتی گئی جس وچ فلم انڈسٹری دے ھر مکتبہ فکر دے لوکاں نے شرکت کیتی ۔

ایس موقعے تے اداکار شاھد نے اپنے ٹیلی فونک پیغام وچ آکھیا کہ نیلو بیگم پاکستان فلم انڈسٹری دا ک عظیم اثاثہ سی ایس موقعے اُتے فلمساز چوھدری کامران دا کہنا سی کہ نیلو بیگم دی موت نال فلم دا اک روشن باب ختم ھوگیا ۔

ایس حوالے نال گل بات کر دیاں ھوئیاں ادکار اچھی خاں دا کہنا سی کہ نیلو بیگم فلم زرقا دی شکل وچ ہمیشہ زندہ رہن گئیاں جتھوں تک نیلو بیگم دی فلمی جدوں جہد دا تعلق اے اوس لئی اوہناں دی اک فلم زرقا دا ذکر ای کافی اے جس وچ اوہناں فلسطینی مجاہدہ دا لا فانی کردار ادا کیتا سی تے خاص کر آغا طالش مرحوم تے نیلو اُتے پکچرائز حبیب جالب دا لکھیا انقلابی گیت
توں کہ نا واقف آداب غلامی ھے ابھی
رقص زنجیر پہن کر بھی کیا جاتا ھے
ایہناں عرصہ لنگ جان دے بعد ایہ انقلابی گیت تِن نسلاں وچ پسند کیتا گیا۔ ایس کردار نے نیلو نوں راتو رات شہرت دی بلندیاں اُتے پہنچا دِتا ۔ ایس المیہ جنازے وچ رَلت کرن ولیاں وچ سید نور، مسعود بٹ،پرویز کلیم، صائمہ، معمررانا، غلام محی الدین، شفقت چیمہ ،راشد محمود، فیصل بخاری ،سہیل خان، آغاقیصر عباس ،شاھد خاں ،قیصر پیا ،ساحرعلی بگا، مختار احمد، اوریا مقبول جان ، پپو سمراٹ ،سرور تے زیڈ اے زلفی دے ناں شامل نیں۔