لانگ مارچ تے استعفے ضرور ہون گے،مریم نواز

اسلام آباد (بیورو رپورٹ)مسلم لیگ (ن) دی نائب صدر مریم نواز نے آکھیا اے کہ لانگ مارچ تے استعفے ضرور ہون گے تے ایہہ ویلا انتہائی نیڑے اے۔ سرکار مذاکرات لئی رابطے کر رہی اے اسیں ایہناں نوں کسی صورت این آراو نہیں دیاں گے۔ایہناں خیالات دا اظہار اوہناں نے قائد حزب اختلاف دے چیمبر وچ پترکاراں دے نال مختصر گل بات کردیاں ہویاں کیتا۔ مریم نواز نے آکھیا اے کہ پی ڈی ایم دے سبھ لوکائی عقلمند تے تجربہ کار نیں۔ سیاست دے اتاڑچڑھائو نوں سمجھ کے مناسب ویلے اتے استعفے دیاں گے۔لانگ مارچ وی ہووے گا تے استعفے وی ہون گے۔ ایہہ کوئی بوہت دور نہیں اے۔ سرکار پارک تے دیگر ادارے ویچ رہی اے دے سوال دے جواب وچ مریم نواز نے آکھیا اے کہ سرکار نااہل اے ایہدے نال کوئی بہتری دی امید نہیں۔ نوازشریف دا پیغام لے کے آئی واں۔ مسلم لیگ ن ہن سیو اے۔ آئندہ الیکشن وچ تحریک انصاف دا ٹکٹ لین والا کوئی نہیں ہووے گا ساڈے کسی ممبر نوں پروڈکشن آرڈر دی لوڑ نہیں۔