اُڈیک

پروفیسر موہن سنگھ

ہویا آتھناں دا رنگ
منگو جان لنگھ لنگھ
وجن ٹلیاں تے جنگ
پر ماہی دی نہ سو
جند نوں ہو گیا کی ہو !
اوہ سمیں دے للاری
وچ لہندے کھلاری
سوہی سوسنی سلاری
وچ نیل دے ڈبو
جند نوں ہو گیا کی ہو !
پچھمی پتناں تے جڑیاں
بھیڑاں رنگاں دیاں بڑیاں
کہیاں پیاریاں گھڑیاں
لگا رنگاں دا جلو
جند نوں ہو گیا کی ہو !
پھیلے رات دے ہنیرے
کیتے پنچھیاں بسیرے
لائے فقراں وی ڈیرے
دل پر کویں نہ کھلو
جند نوں ہو گیا کی ہو !
اچی گگن دی اٹاری
رتناں موتیاں شنگاری
کہڑے چتر نے اساری
سمجھ سکیا نہ کو
دل نوں ہو گیا کی ہو ؟
تردا گگناں تے چند
کٹی جانودا اے پندھ
جند بوہے وانگ بند
کون گیا ایہنوں ڈھو
جند نوں ہو گیا کی ہو !
تارہ گگناں تے ڈلھکے
دل کوٹھی وانگ دھڑکے
کدوں ہوونے نے تڑکے
کدوں کٹنے نے کوہ
جند نوں ہو گیا کی ہو !
کنجی رات نے جاں لہنگی
آئی سرا دی ایہہ وہنگی
گھڑی ہن اتے مہنگی مل ایس دا نہ کو
جند نوں ہو گیا کی ہو !
واہی چاننے جاں لیک
پہلی، فکی تے بریک
چڑھیا جذبیاں دا شوہ
جند نوں ہو گیا کی ہو !
چڑھ پئے سون سویرے
مکے رات دے ہنیرے
گھر بار تے بنیرے
لئے کرناں نے چھوہ
جند نوں ہو گیا کی ہو !