اپوزیشن اتحاد وچ دراڑ

پی ڈی ایم دی وڈی غلطی سیاسی لڑائی وچ اداریاں نوں گھسیٹن دی کوشش اے

تحریر حمیداللہ بھٹی

16 مارچ دے پی ڈی ایم اجلاس وچ جس طرح اپوزیشن رہنمائواں نے اک دوجے اُتے طنز دے نشتر چلائے گئے تے طعنے بازی دی اوہ تعجب دی گل نہیں کیوں جے حکومتی اتحاد وانگوں اپوزیشن اتحاد وچ شامل جماعتاں دے مفادات اک نہیں مختلف نیں ایس لئی وقفے وقفے توں بد مزگی دے واقعے رونما ہوندے نیں جس نال اتحاد دی بجائے رسہ کشی دا گمان ہوندا اے ایسے بنا اُتے نہ تے حکومتی اتحاد اہداف حاصل کرن وچ کامیاب ہو سکیا اے تے نہ ای اپوزیشن منزل مقصود اُتے اپڑ سکی اے اہداف تے منزل دے مخالف چلن وچ کیہ رمز پوشیدہ اے شاید وضاحت لئی کسے دے کول نہ تے ویلا اے تے نہ الفاظ نیں فیر وی تصور کر لینا کہ جو کہیا جائے گا لوک اکھاں بند کر کے یقین کر لین گے ٹھیک نہیں سچ تے ایہہ وے کہ قول و فعل دے تضاد نال سیاستداناں دی ساکھ متاثر ہو رہی اے گھسیٹن، پیٹ پھاڑن تے ملک لُٹن والی فلماں ایسے بنا اُتے فلاپ ہوئیاں تے فیر میں ایہناں نوں رلائواں گا باکس آفس اُتے کامیاب جا رہی اے ایہہ راہ اپنا کے جمہوریت ملک یا قوم دی خدمت نہیں ہو سکدی حقیقت ایہہ وے کہ اپوزیشن اتحاد وچ دراڑ توں بعد ایہہ تاثر مزید پختہ ہویا اے کہ حکومت نوں اصل خطرہ اپوزیشن توں نہیں بلکہ مہنگائی تے بے روزگاری توں اے اپوزیشن اجلاساں دی گل بات تے اہم نکات دا افشا ہونا ثابت کردا اے کہ کجھ رہنما سوچے سمجھے منصوبے دے تحت انج کر رہے نیں ممکن اے ایسے طرح شاید اداریاں توں اپنے خراب تعلقات درست کرنا چاہندے نیں پر یاد رکھن والی گل ایہہ وے کہ عوامی تائید دے بغیر سیاسی کامیابیاں نہیں ملدیاں جس دی اہم مثال اصغر خاں نیں جیہڑے قریبی تعلق دے باوجود سیاسی مقبولیت توں محروم رہے۔
شریف خاندان ابتلا دا شکار اے پر نواز شریف ملک وچ آ کے جماعت دی قیادت کرن توں گریزاں نیں اوہ چاہندے نیں کہ کسے طرح دوجی جماعتاں ایہناں دے حصے دی لڑائی لڑیئے تے اقتدار دلان وچ مدد کریئے جس لئی مولانا فضل الرحمن، اچکزئی تے اسفندیارولی جہے لوک تے آمادہ تے تیار نیں کیوں جے ایہناں دا تے نواز شریف دا بیانیہ اک اے مولانا دے کول مذہب دا کارڈ اے جد کہ دیگر قوم پرستی دے علمبردار نیں۔ ایہہ سارے سیاست وچ اداریاں دی مداخلت اُتے شکوہ کناں نیں تے غم وغصہ وکھا رہے نیں ایہہ سب 2018 دے عام انتخابات توں پہلے وی سول بالادستی دے علمبردار تے نیں پر ایس حقیقت نوں جھٹلانا ممکن نہیںکہ جدوں وی کسے نوں لوڑ محسوس ہوئی موہڈھا پیش کرن توں نہیں ہچکچائے تے نہ ای استعمال ہون وچ دیر کیتی اے جس دی مثال عسکری قیادت دی مدت وچ وادھے دی غیر مشروط تائید تے حکومت توں ودھ چڑھ کے حمایت اے حالانکہ پرویز مشرف نے جدوں بطور صدر پی پی تے مسلم لیگ ن دے وزرا توں حلف لیا تے ناراضگی دا اظہار کردے ہوئے مسلم لیگ ن دے وزرا نے بازئواں اُتے کالیاں پٹیاں بنھ کے حلف چکیا موجودہ عسکری قیادت نوں برقرار رکھن وچ کیہ حکمت اے اج تیکر شریف خاندان یا ایہناں دے ہمرکاب شخصیات قابل قبول وضاحت نہیں کر سکے۔
پی پی دی پالیسی صاف چھپتے بھی نہیں سامنے آتے بھی نہیں، دے مصداق مبہم اے اوہ اپوزیشن اتحاد دا حصہ ہو کے وی حکومت توں اینا وگاڑ نہیں چاہندی جس نال سندھ دی صوبائی حکومت توں ہتھ دھونا پین ایسے لئی حکومت دی مخالفت دے باوجود نرم گوشہ وی وکھاندی اے شریف خاندان دے نال ہوندے ہوئے مخالفت دا تاثر دیندی اے وجہ شریف خاندان ولوں بے نظیر بھٹو تے آصف علی زرداری دے خلاف مہم اے ایہنوں یقین اے کہ نواز شریف دی دوبارہ سیاست وچ انٹری پی پی دے تعاون دی مرہون منت اے۔ رچرڈ بائوچر دی تجویز اُتے صاد کردے ہوئے بے نظیر جے وطن واپس آن اُتے اصرار تے نواز شریف نوں بیرون ملک رکھن دی مخالفت نہ کردیاں تے اج شریف خاندان ملک وچ اہم حیثیت دا مالک نہ ہوندا پی پی قیادت نوں ایہہ وی شکوہ اے کہ شریف خاندان نے نیکی دا صلہ نہیں دتا کدی کالا کوٹ پا کے پی پی حکومت دے خلاف سپریم کورٹ گئے تے اٹ نال اٹ وجان دی بڑھک لان اُتے نواز شریف نے آصف زرداری توں طے شدہ ملاقات ای منسوخ کر دتی ایس لئی ہن نال چل کے پی پی جڑاں کٹن دی کوشش کر رہی اے ۔ ڈومیسائل دی گل کرنا تے تحریک لئی جیل جان دا خدشہ ایسے سلسلے دی کڑیاں نیں مقصد تحریک دی کامیاب ہون دی صورت وچ شریف خاندان سیاسی فائدے نہ لے سکے، استعفے دین تے لانگ مارچ دے پی ڈی ایم دے فیصلیاں دی مخالفت وچ ایہو راز اے مریم نواز دا بے نظیر بھٹو دی قبر اُتے پھُل چڑھانا تے یوسف رضا گیلانی دے سینٹر بنن اُتے ن لیگ ولوں مٹھائیاں ونڈن اُتے وی پی پی قیادت دا دل نہیں پسیجا بلکہ مریم نواز ولوں بختاور تے آصفہ وانگوں خود نوں بیٹی کہن جہی بے چارگی و بے بسی وکھان اُتے آصف زرداری دا خیال اے کہ ایس طرح شریف خاندان دے ووٹر نوں بدظن کیتا جا سکدا اے۔
مولانا فضل الرحمن دی پریشانی قابل فہم اے اوہ اپنی سیاسی زندگی دے مشکل ترین دور توں لنگھ رہے نیں۔ پہلی وار سیاسی میدان وچ عضو معطل نیں حالانکہ ایہناں نوں سیاسی دائو پیج دا خوب تجربہ اے بے نظیر بھٹو دے مخالف فتویٰ دین دے باوجود جت اُتے حکومتی اتحاد دا حصہ بنن وچ تاخیر نہیں کردے تے خاتون وزیراعظم دی مداح سرائی وچ وی وسعت قلب دا مظاہرہ وکھاندے نیں جے نواز شریف اقتدار آن تے مولانا ناطہ استوار کرن وچ قباحت محسوس نہیں کردے انج دی چابک دستی تے مہارت نال دیگر سیاستدان محروم نیں پر عمران خان نے سابق ادوار دے بااختیار لوکاں نوں صرف بے اختیار ای نہیں کیتا بلکہ دربدر دی مٹی چھانن اُتے مجبور کر دتا اے۔ مزید ستم ایہہ کہ ہر دور وچ اہم مقام دے حامل مولانا اُتے وی خزاں دا موسم اے خزاں دے پت جھڑوانگوں ایہناں دی جماعت دے کئی اہم رہنما وی سیاسی داغ مفارقت دین لگے نیں ایہہ انج دا نقصان اے جس نال اوہ پہلے اپنی سیاسی زندگی وچ کدی دو چار نہیں ہوئے ایس لئی فوری انج دے بھرپور لانگ مارچ دے متمنی نیں جس نال حکومت ہل کے رہ جائے نال ای زور دار دھرنا دے کے بے بس کرن تے فیر استعفیاں دے آپشن دا دھماکہ کرنا چاہندے نیں تاں جے ایہہ در پہ دھچکیاں نال سنبھل نہ سکے تے حکومت عام انتخابات دی راہ اپنان اُتے مجبور ہو جائے پر شریف خاندان تے مولانا نوں ادراک کرنا چاہیدا اے کہ غلطیاں کرن منزل دا حصول ناممکن اے پی ڈی ایم وچ دو تن جماعتاں ای پارلیمانی حیثیت دی حامل نیں جے پی پی راہواں جُدا کر لیندی اے تے استعفیاں دا آپشن غیر موثر ہو جائے گا نیز سندھ دی صوبائی حکومت دے وسائل وی نہیں مل سکن گے۔
پی ڈی ایم دی وڈی غلطی سیاسی لڑائی وچ اداریاں نوں گھسیٹن دی کوشش اے حالانکہ سیاسی لڑائی سیاستداناں تیکر محدود رکھی جاندی تے حکومت دی ناقص کارکردگی دی بنا اُتے ہن تیکر حالات بوہت مختلف ہو چکے ہوندے تے تبدیلی دی راہ ہموار ہو چکی ہوندی پر اسٹیبلشمنٹ نوں اپنا مخالف تے عمران خان دا حمایتی قرار دے کے پی ڈی ایم نے حکمراناں نوں مضبوط بنا دتا اے حکومت نے وی بڑی مہارت نال اپوزیشن دے پھیلائے تاثر نوں تقویت دتی اے کہ ادارے عمران خان دے نال تے اپوزیشن اتحاد دے مخالف نیں حالانکہ عمران خان تے ایہناں دے حمایتیاں نوں اج تیکر ایہہ یقین نہیں کہ اوہ حکومت وچ نیں، ایہہ کدی دھاندلی دا رونا روندے نیں تے کدی الیکشن کمیشن توں استعفے دا مطالبہ کردے نیں جنہاں نوں اپنی مقتدر حیثیت دا اہن تیکر یقین نہیں آ سکیا اوہ کنہی ذہانت دے مالک ہو سکدے نیں؟ سمجھنا بھلا کوئی مشکل گل ہے ایس لئی اپوزیشن اتحاد نوں ٹھنڈے دل نال سوچ کے غلطیاں اُتے مُصر ہون دی بجائے تبدیلی لئی زیادہ توں زیادہ حمایت حاصل کرنی چاہیدی اے ایس طرح اپوزیشن اتحاد دی دراڑاں وی ختم ہون گیاں حریف ودھان دی بجائے گھٹ ہون گے تے گل بنے گی حریف ودھان نال مشکلات وچ وادھا ہوئے گا۔