اوکھا ویلا

شیخ جواد حسین

کدی کدی انسان ایسے ایسے امتحان توں لنگھدا اے کہ جہدے بارے سوچ وی نہیں سکدا۔ پر مومن دی سبھ توں وڈی جاگیر تے سرمایا رب اُتے بھروسا تے توکل اے۔ انسان اوکڑاں وچ ہون مگروں جے اپنے رب اُتے اپنے ایمان نوں مضبوط رکھے تے اوہ خالق وی اپنے بندے نوں کدی نہ تے اکلا چھڈدا اے تے نہ ای بِنا مدد دے رہن دیندا اے۔
ایس گل وچ وی کوئی شک نہیں کہ اُچے نیویں حالات تے اوکڑاں دے ایس ہڑھ وچ انسان اوہ کُجھ سِکھدا اے جہڑا خورے کسے وڈے توں وڈے تجربے توں وی سکھن نوں نہیں لبھدا۔ سبھ توں وڈی گل تعلق باللہ دی مضبوطی انسان نوں وکھو وکھ فکراں دا پاندھی بنا دیندی اے۔ مینوں ایس گل دا اندازا اودوں ہویا جدوں میریاں اکھاں نے حیاتی دی سچائی تے موت و زندگی دی کشمکش وچ اپنے رب نوں بڑا نیڑے پایا تے اوہدی مدد نوں اپنیاں ایہناں اکھاں نال کئی وار ویکھیا تے محسوس کیتا۔
پنج جنوری نوں اچن چیت گلا خراب ہویا تے فیر تاپ نے آ گھیریا۔ علاج شروع کیتا تے صورتحال کرونا تیکر جا اپڑی۔ اک ادھ دن مگروں نمونیا تے فیر ویکھدے ای ویکھدے ساہ لین وچ اوکڑ محسوس ہون لگی۔ ستارھاں جنوری دی سویر جدوں جُسا مچھی وانگوں تڑفن لگا تے ایمبولیس بلوا کے سینٹ جارج ہسپتال لندن جا اپڑیا۔ آکسیجن دی ڈاڈھی کمی سی، پھیپھڑے اپنے آپ ساہ لین توں قاصر سن۔ رب توں وکھ کوئی آس نہیں سی۔ آکسیجن، ماسک، بخار، کورنا وایرس، نمونیا تے ٹونسلائیٹس سبھ دا حملا اِکو ویلے ای ہویا۔ میں اینے اوکھے ساہ لے رہیا سی کہ مینوں لگا خورے ایہ میری حیاتی دے آخری ساہ نیں۔ رب توں دعاواں دا سلسلا تے کئی دِناں توں جاری سی پر اوس ہسپتال وچ وی اپنے خالق توں توبہ کیتی تے اوہدے توں آس بنھی رکھی۔ کُجھ دن آکسیجن اُتے رہن مگروں رب نے شفا دِتی ،جہنوں یقینن رب کعبہ ولوں اک نویں حیاتی توں کسے طرحاں وی گھٹ نہیں سمجھدا۔
تہاڈے ساریاں دیاں دعاواں کرن اُتے ممنون آں، میرے پیارے چودھری خادم حسین صاحب بیماری دے دناں وچ وی رابطے وچ رہے۔ بہت سارے ہور یاراں بیلیاں، ماں پیو تے رشتے دار اُچیچی دعا کردے تے حوصلا دیندے رہے جہناں دا دیند دار آں۔کرونا اُتے لگاتار اک ورھے توں لِکھ رہیا واں تے ہمیشا سبھ لئی دعا کردا رہندا ساں کہ رب ساریاں نوں ایس خطرناک روگ توں محفوظ رکھے۔
پر کیوں جے برطانیا وچ ایس ویلے کرونا دی نویں لہر جاری اے جہنے لندن نوں ڈاڈھی طرحاں متاثر کیتا ہویا اے۔ ملک دے آل دوالے دے علاقیاں وچ وی کرونا دیاں نویاں نویاں شکلاں معصوم لوکائی نوں ڈاڈڈھا بیمار کر رہیاں نیں جو ایس ویلے کسے دے وس دی گل نہیں رہی۔ ہسپتالاں وچ ایمرجنسی نافذ اے تے سڑکاں اُتے پولیس دا گشت۔
برطانوی اخبار ڈیلی ٹیلی گراف دے مطابق اسرائیلی 80فیصد،عرب امارات 60فیصدتے بحرین 30فیصد لوکائی نوں ویکسین لا چُکیا اے ، جدوں کہ ایسے رپورٹ دے مطابق برطانوی حکومت اپنے سارے جتناں مگروں وی صرف پنج فیصد لوکائی نوں ای ویکسین لاسکیا اے۔ جہناں وچ ہسپتال دا عملا تے کُجھ وڈیری عمر دے شہری شامل نیں، جدوں کہ باقی 95فیصد لوکائی رب دے آسرے اُتے حیاتی لنگھا رہی۔ اس ساری صورتحال دی ذمے واری برطانوی حکومت اے کہ جہنے فائزر دی ویکسین دنیا بھر وچ سبھ توں پہلے ریگولیٹ کرن مگروں وی اپنی لوکائی نوں ایہدے توں دور رکھیا۔ ایس توں پہلاں سکولاں نوں کھلے رکھن دے فیصلے، پہلے لاک ڈائون مگروں ریستوارن نوں لوکائی لئی نہ صرف کھولن سگوں اوہناںنوں سرکاری پدھر اُتے رعایت دے کے باہر کھانا کھان دا آکھیا گیا ایہو نہیں سگوں یونیورسٹیاں تے کالجاں نوں کُھلا رکھیا گیا۔ اِنج دے کم حکومتی ناقص پلاننگ دا مونہوں بولدا ثبوت نیں، پر کاش کہ برطانوی سرکار عقل مندی نال فیصلے کردی تے لوکائی نوں اینیاں اوکڑاں دا ساہمنا نہ کرنا پیندا۔دوجے پاسے چین نے پاکستان نوں ویکسین دی پہلی کھیپ مفت دین دا اعلان کیتا اے۔ پاکستان نوں 31جنوری تیکر ویکسین دیاں پنج لکھ جدوں کہ فروری دے آخیر تیکر ہور خوراکاں مل جان گیاں۔ پر حکومت ولوں وکھو وکھ دعوے وی کیتے جا رہے نیں۔ جہناں وچ ڈاکٹر فیصل ولوں چالو ورھے دو کروڑ لوکاں نوں ویکسین لان دا بیان وی ساہمنے آیا اے۔ ایہ وی کوئی چنگی گل نہیں اے ایہدے اُتے ہور کم کرن دی لوڑ ہے۔پاکستان نوں برطانیا توں سبق سکھ کے دوائی نوں میڈیکل، پیر میڈیکل تے وڈیری عمر دے لوکاں تیکر سبھ توں پہلے اپڑان دے عمل نوں یقینی بنانا ہوئے گا تے برطانوی حکومت وانگ لوکائی نوں اکھوں اوہلے نہیں کرنا چاہیدا۔ پاکستانی سرکار ایس معاملے اُتے ہولی ہولی کم کر رہی اے، جہڑا کہ چنگی گل نہیں اے۔ حکومت نوں ایس گل نوں وی یاد رکھنا چاہیدا کہ کرونا دی نویں لہر برطانیا توں ہوندی ہوئی پوری دنیا وچ کھلر نوں اُتاولی اے۔ ایس لئی پاکستانی حکومت نوں ہنگامی طوراُتے کم کرن تے ایس او پیز اُتے عمل کروان دی لوڑ ہے۔ اجے ہور ویکسین دا چھیتی نال آرڈر دے دینا چاہیدا تاں جے پاکستانی لوکائی برطانوی لوکائی وانگ اپنے آپ نوں بِنا مدد دے نال محسوس کرن ۔٭٭