‘‘ہتھ نہ لائیں میرے ووٹ نوں ’’

حمیداحمد سیٹھی

ایس کالم دی شان نزول اک وڈیری عمر دی خاتون دا غصے نال بولیا اوہ فقرا اے جو اوہنے میرے ہتھ نوں جھٹکدے ہوئے راولپنڈی ویمن کالج دے اک کمرے وچ 1970ء دے جنرل الیکشن دوران ادا کیتا سی تے اوہ فقرا مینوں ہوبہو یاد آ گیا اے کیوں جے پچھلے دیہاڑیاں سینٹ دے الیکشن توں کئی دن پہلاں ٹیلی ویژن تے لوکاں دے کن ایس الیکشن وچ دھاندلی تے ووٹاں دی خریدوفروخت دیاں داستاناں سن سن کے پک گئے سن۔
میری ڈیوٹی 1970ء دے الیکشن وچ دس پولنگ اسٹیشناں دا رائونڈ کرنا تے لاء اینڈ آرڈر دی نگرانی کرنا سی۔ میں اوس بزرگ خاتون نوں ویکھیا کہ اوہدے ہتھ وچ ایناں رعشہ سی کہ ووٹ دی پرچی باکس دے سوراخ وچ نہیں سی جا رہی۔ اک ادھ منٹ اوس خاتون دی مشکل ویکھ کے میں مودبانہ اپنی سروس آفر کیتی جہدے تے اوہنے غصے نال کہیا ’’ہتھ نہ لائیں میرے ووٹ نوں‘‘ تے آخر کار اوہ کامیاب ہو گئی۔ اوسے لیڈیز پولنگ اسٹیشن دا دورا کرکے میں سامنے والے مین گیٹ دی تھاں اک پچھے والے دروازے توں باہر نکلن لئی گیا تے دو تن مرداں نوں اندر داخل ہوندے ویکھ کے اوہناں نوں روک کے کہیا‘ ایہ عورتاں دا پولنگ اسٹیشن اے تسیں لوک کدھر جا رہے او؟ اگے والے نے جواب دتا تسیں وی تے مرد او جہدے تے میں کہیا کہ میں تے ڈیوٹی تے آں اوہناں دے پچھے کالے سوٹ والے بندے نے انگریزی وچ کہیا We are also on duty اودوں میں اوہناں نوں پچھان لیا کہ اوہ تے پاکستان دے چیف الیکشن کمشنر نیں تے فیر اوہناں نوں پولنگ سٹیشن دا رائونڈ لگوایا۔
ایہ اوہناں دیہاڑیاں دی گل اے جدوں ٹیلی ویژن سیاسی‘ سماجی خبراں توںودھ دلچسپ تے معلوماتی خبراں تے تفریحی معلومات توں علاوہ معروف ادیباں تے شاعراں دے پروگرام نشر کردا سی تے کجھ وقفے دے بعد مختصر اشتہار وی چلا دیندا سی۔ جد کہ ہن سیاسی گالھاں نال ملدیاں جلدیاں‘ گھسی پٹی تے ہزار بار دی رٹی رٹائی الزام تراشی ویکھن تے سنن نوں ملدی اے۔ دن وچ کئی واری تے مہینے دے تریہہ دن بار بار اوہو گلاں سنن والے ٹی وی ناظرین شکل ویکھ کے ای دس دیندے نیں کہ اوہنے کیہ کہنا اے۔ سیاسی رہنماواں دے اک دوجے خلاف جو الزامات اٹھ دس ورھے پہلاں جلوساں یاں انٹرویوز وچ لائے جاندے رہے اوہ ٹی وی کیمریاں وچ محفوظ نیں تے ہن وی سنن تے ویکھن نوں مل جاندے نیں۔
مینوں اپنی ملازمت دوران تن واری ساہیوال تے گوجرانوالہ وچ بحیثیت ریٹرننگ افسر الیکشن کران دا موقع ملیا اے۔ امیدوار نوں کجھ ہزار روپیے فیس جمع کرانی ہوندی سی۔ الیکشن توں پہلاں جلسے جلوس تے اک معمول دی گل ہوندی سی۔ ووٹراں نوں محدود حد تک کھانے وی کھلائے جاندے سن۔ کسے تھاں دنگا فساد وی ہو جاندا سی پر اودوں ووٹراں نوں شامل کرن تے خریدن لئی مال لان دا کدی ذکر سنیا‘ نہ الزام لگدے ویکھیا۔ پچھلے کئی ورھے توں ذات برادریاں نوں Win Over کرن لئی کھان پلان دیاں دعوتاں تے میٹنگاں دا ذکر وی ہون لگ پیا اے تے الزام لگدے وی سنے پر جے پچھلے کجھ ورھیاں تے نظر ماریئے تے حکمران جماعت ولوں اپنے امیدواراں نوں ترقیاتی کماں لئی سرکاری خزانے چوں فنڈز دے کے کجھ لگائو کجھ کھائو دا کلچر عام ہوندے ویکھیا جا سکدا اے پر اج کل دی الیکشن کمپین دا ذکر ٹیلی ویژن سکریناں تے اخبارات تے عوامی جلسیاں وچ ویکھو‘ پڑھو تے سنو تے محسوس ہوندا اے کرپشن‘ الزام تراشی‘ گالھاں‘ بدزبانی ساڈے لوکاں وچ ای نہیں خواص دیاں رگاں وچ وی وڑ چکی اے تے سیاست کرن لئی کرپشن دا مال تے بدتمیزی دے مظاہر ساڈیاں اگلیاں نسلاں نوں برباد کر کے رکھ دین گے۔
ساڈے اکثر دوستاں تے ملاقاتیاں دے مطابق 2021ء دے سینٹ چیئرمین دے الیکشن ورگا گھمسان دا رن ایس توں پہلاں کدی نہیں پیا سی سگوں کسے اخبار یاں ٹی وی نیوز نے وی ایس الیکشن وچ دلچسپی لین دی خواہش نہیں سی جگائی۔ انج پیپلزپارٹی تے مسلم لیگ (ن) واریاں لے کے حکومت دے مزے اڑا چکی اے سگوں ایہ کہنا ٹھیک ہووے گا کہ توں چل تے میں آیا دی طرز تے ایہو دو سیاسی پارٹیاں اقتدار وچ آئوندیاں رہیاں۔ دوہاں جماعتاں نے اقتدار وچ آ کے اک دوجے تے ثابت نہ ہون والے کرپشن مقدمے بنا کے ویلا پورا کیتا۔ دوہاں کول اک دوجے دی اندرونی کہانیاں موجود تے علم وچ نیں۔
ایس ویلے اک سزا یافتہ سابق حکمران علاج لئی لندن وچ اے تے پاکستان وچ اپنی دھی دے راہیں سیاست چلا رہیا اے اوہدا پاسپورٹ تے ویزا ایکسپائر ہو چکے نیں پر ایہ وی سچ اے کہ اوس سابق سزایافتہ حکمران نوں عدالتی فیصلے پاروں وزیراعظم عمران خان نے ای لندن جان دی اجازت دتی سی۔ دوجے پاسے پچھلے صدر آصف علی زرداری دی سیاست اے۔ سمجھ نہیں آئوندی ورلڈکپ جت کے پاکستان نوں کرکٹ وچ ممتاز کرن والا ایناں اناڑی اے یاں مجبور اے جہدیاں تفصیلاں ساڈے توں لاعلم نیں کہ اوہدے پونے تن ورھے دی وزارت عظمیٰ دے دور وچ اوہ جہناں نوں مہاکرپٹ کہندے نیں اوہ کدی جیل گئے تے کدی ضمانت تے وی آئی پی زندگی گزاردے ویکھے جا سکدے نیں تے کھڈاری وزیراعظم اپنی ہر تقریر وچ ایہ فقرا دہرائی جاندا اے کہ میں کسے کرپٹ نوں این آر او نہیں دیواں گا کوئی کیس اپنے منطقی انجام تک نہیں اپڑدا۔
ان گنت مقدمے ویکھے گئے نیں جہناں نوں لوئر کورٹ توں اعلیٰ ترین عدالتاں تک سماعت دی غرض نال جاندے ویکھیا اے تے مدعیاں تے ملزماں دے پوترے ہن وی مقدمے بھگت رہے نیں۔ اجے کجھ دیہاڑ پہلاں چیئرمین سینٹ دا الیکشن ہویا اے جہدے وچ پچھلے وزیراعظم گیلانی نوں صادق سنجرانی نے ہرایا اے پر ہارن والا بلاول زرداری‘ مریم صفدر تے آصف زرداری دا نمائندہ سی جد کہ سنجرانی نوں پی ٹی آئی یعنی عمران خاں دی سپورٹ سی پر پی ڈی ایم اپنی ہار منن دی تھاں عدالت دا بوہا کھڑکان دا اعلان کر رہی اے تے ایہ فساد لماں عرصہ چلے گا ایتھے مینوں اک واری فیر اوہ بڈھی مائی یاد آ گئی اے جنہے اپنے ووٹ دی حرمت قائم رکھن لئی مینوں کہیا سی ’’ہتھ نہ لائیں میرے ووٹ نوں‘‘ جد کہ اج کل تے ووٹ وکائو مال اے جہدی بولی لگدی اے۔ (بشکریہ ایکسپریس)