اورنج لائن منصوبہ، تعمیراتی کمپنیاں نوں 1ارب روپے دین دا حکم

اسلام آباد: سپریم کورٹ نے اورنج لائن ٹرین منصوبے دے ٹھیکیداراں نوں اک ارب روپے دین دا حکم دے دِتا۔

کنٹریکٹراں نوں کم ویلے سر تے معیار دے مطابق کرن دا بیان حلفی تے بینک گارنٹی دینی ہووے گی۔ اک کنٹریکٹر دے وکیل شاہد حامد نے عدالت نوں دسیا ایل ڈی اے نے 60کروڑ میرے موکل تے 40کروڑ دوجے ٹھیکیدار نوں دینے نیں۔ چیف جسٹس نے آکھیا لوکاں نے اورنج ٹرین لئی بڑیاں مشکلاں برداشت کیتیاں نیں۔ اسیں چاہنے آں منصوبہ ویلے سر پورا ہووے، ٹھیکیدار بینک گارنٹی تے بیان حلفی دے دین اوہناں نوں رقم دے دِتی جاوے گی، جے کم معیار دے مطابق نہ ہویا ٹھیکیداراں تے جرمانہ پا دیواں گے۔ چیف جسٹس نے حکم دِتا ٹھیکیداراں نوں اک ارب روپے دِیاں ادائیگیاں کیتیاں جان، پیر نوں ایل ڈی اے چیک تے ٹھیکیدار بینک گارنٹی لے آن، نیب نوں کہہ دیواں گے ایس معاملے وچ مداخلت نہ کرے، ایل ڈی اے کمرشلائزیشن دے حوالے نال جامع پلان بنا کے دیوے۔