بے نظیر دی شہادت دا پوری دنیا نوں نقصان تے زرداری نوں فائدہ ہویا: شیخ رشید

لہور: وزیر ریلوے شیخ رشید آکھیا اے بے نظیر بھٹو دی شہادت دا پوری دنیا نوں نقصان تے آصف زرداری نوں فائدہ ہویا۔

لہور وچ پریس کانفرنس کردیاں شیخ رشید نے اک واری فیر شہباز شریف تے رانا ثناء اللہ نوں شدید تنقید دا نشانہ بنایا۔ اوہناں نے سابق وزیراعظم شاہد خاقان عباسی تے وی الزام لاندیاں آکھیا خاقان عباسی ایل این جی دے چور نیں اوہناں نے جیل ای جانا اے۔ شیخ رشید دا کہنا سی میرا ایہناں لوکاں نال کوئی ذاتی جھگڑا نہیں، رانا ثناء بدبودار بندہ اے، اوہ ایس لئی بول رہیا اے کہ میں شہباز شریف دے خلاف سپریم کورٹ جا رہیا آں، دنیائے سیاست دا سبھ توں وڈا ڈاکو جے پی اے سی دا چیئرمین اے تے ایہہ پی ٹی آئی دا مسئلہ اے۔ اوہناں نے پیپلزپارٹی دے صدر آصف زرداری نوں وی ہدف تنقید بناندیاں آکھیا زرداری دا لیول گول گپے والا، فالودے والا تے ویلڈنگ والا سی، زرداری کھلے عام کہندے نیں جیل اوہناں دا دوجا گھر اے، زرداری بلاول نوں سیاسی طور تے مروائے گا جیہدے تے مینوں دکھ ہووے گا۔ اوہناں آکھیا کوئی اک مثال وِکھا دیو کہ کسے شخصیت دا وصیت نامہ کسے ملازمہ توں ملیا ہووے، بے نظیر بھٹو دی شہادت دا پوری دنیا نوں نقصان تے آصف زرداری نوں فائدہ ہویا۔