قندوز سے دوما تک

isar Rana

ایثار رانا

شکر اے ساہڈے بچے محفوظ نیں۔ ساہڈی دعا اے اوہ ہمیشہ ہسدے مسکراندے رہن۔ ملال وی ساہڈی بچی اے‘ اوہنوں اک گولی لگی سی۔ اوہدی تعلیم لئی کوشش تے اوہدے نتیجے وچ لگن والی گولی تاریخ وچ ہمیشہ یاد رہوے گی۔ پر ایہ قندوز وچ مارے جان والے کسی دے بچے نہیں سن۔ تعلیم اوہو اے جہدے وچ اے امریکہ تے بی برطانیہ اے۔ مدرسیاں وچ تعلیم اکبے معنی عمل اے۔ آکھدے نیں قندوز وچ شہید ہون والے بچے مدرسے دے کانووکیشن وچ شریک سن۔ بہت سارے بچے قرآن حفظ کر کے مدرسے توں پاس آئوٹ ہونے سن تے عین اوس ویلے جدوں کانووکیشن تکمیل دے مراحل وچ سی امریکہ نے ڈرونز حملہ کر دتا۔ کھیڈ ختم۔ سینکڑاں بچے مارے گئے‘ شہیداں دی ویڈیوز پوری دنیا وچ وئارل ہوئیاں۔ معصوم چہرے جیسے ساریاں دے بچے ہوندے نیں پر خون وچ لت پت‘ زخم زخم‘ ہن ایہ کوئی ملالہ تے سی نہیں کہ یورپ کنپ اٹھدا‘ امریکہ اوہنوں تعلیم اتے گہرا وار قرار دیندا۔ یورپی یونین اقتصادی پابندیاں اتے غور کردا‘ اقوام متحدہ ایس ظلم ستم اتے خصوصی اجلاس طبل کردا۔ ایہ افغانستان دے شہر قندوز دے بچے سن جہناں دا شاید انسان یا انسانیت نال کوئی تعلق نہیں سی۔ اوہ سارے دہشت گرد سی۔ اوہ بچ جاندے تے انسانیت نوں بھاری نقصان ہوندا۔ ساہنوں امریکہ دے ایس بیانیے نوں تسلیم نہیں کرنا۔

ایس بیانیے نوں اپنی زبان وچ بار بار ادا کرنا اے ورنہ گائیڈڈ ڈرونز مس گائیڈڈ وی ہو سکدے نیں۔ افسوس جرم ضعیفی دی سزا ساہڈے بچیاں نوں بھگتنی پے رہی اے۔ امریکہ دے مطابق ایہ بچے دہشت گرد سی۔ اوہناں دا مارے جانا ضروری سی۔ ساہنوں امریکہ دا موقف تسلیم کرنا پووے گا کیوںجے باس از آل ویز رائٹ۔ ویسے وی مسلماناں دا خون کہڑا اینا قیمتی اے۔ عراق ہووے‘ مصر ہووے‘ لیبیا ہووے‘ کشمیر ہووے‘ فلسطین ہووے‘ شام ہووے‘ افغانستان ہووے ‘ پاکستان ہووے‘ اہدے خون دی کوئی حیثیت نہیں۔ ہن امریکہ نے قندوز وچ جو کم وکھانا سی وکھا دتا۔ بچ جان والے بدلہ لین لئی نکلن گے۔ اوہ امریکہ نہیں جاسکن گے۔ چاند گرہن کتیاں اتے بھاری ہوندا اے۔ کالم لکھ رہیا سی تے خبر آئی فلسطین وچ اسرائیلی بمباری نال درجناں فلسطینی بچے شہید ہو گئے نیں۔ میرا قلم رک گیا۔ اوہناں بچیاں نوں وی شامل کر لیتا جاوے۔

فیر بریکنگ آگئی‘ شام تے روسی طیاریاں دی بمباری نال دومہینیاں وچ درجناں بچے شہید ہو گئے نیں۔ میرے لکھے لفظاں نوں شہادت مل گئی۔ مسلماناں دا خون ارزاں نہیں‘ بے قیمت بے وقعت اے۔ دوما اتے بمباری ہووے‘ قندوز وچ معصوم بچیاں نوں قتل کیتا جاوے یا فلسطین وچ بچیاں دی نسل کشی ہووے یا یمن وچ مسلماناں نوںگاجر مولی وانگوں وڈیا جاوے۔ ایس خون دا تے اوہناں انساناں دے مرن دا اقوام عالم یا اقوام متحدہ نال کوئی تعلق نہیں تے ہاں اوہناں دا مسلم امہ او آئی سی یا مسلم قیادت نال وی کوئی تعلق نہیں۔ ایہ امریکہ اے اوہ ماردا وی اے تے باقی مسلم قیادت نوں جتا وی دیندا اے کہ جے اوہ اپنے حرماں‘ سوئس اکائونٹس‘ نائٹ کلبس‘ مے فیئر فلیٹس‘ ریالاں‘ ڈالراں تے درہماں توں باہر نکلے تے اوہناں نوں صدام بنا دتا جاوے گا۔ اوہناں نوں بھٹو بنا دتا جاوے گا۔ قذافی‘ فیصل بنا دتا جاوے گا۔ چھڈو امریکہ‘ یورپ تے سرائیل نوں مینوں دسو دوما وچ مارے جان والے بچے جے مسلمان نیں تے اوہناں نوں کون ماردا اے۔ مینوں دسو شام وچ مارے جان والے بچے کہدے نیں؟ مینوں دسو کیہ یمن دے بچیاں دا اسلام نال کوئی تعلق نہیں‘ مصنوعی قیادت دا بیج بوندے‘ فصل بنان وچ‘ اج عالم اسلام اک فٹ بال اے کیوں جے فٹبال اتے گول گول تے محفوظ جد کہ اندروں خالی ہوندا اے۔ فقط ہوا بھری ہوندی اے۔ اوہنوں کک مارو تے بہت دور تک اچھلدا ہے۔

کس کس دا نوحہ لکھاں گا۔ قندوز‘ فلسیطن‘ کشمیر‘ یمن‘ دوما وچ شہید ہون والے بالاں دا یا اسلامی قیادت دا‘ جہنں نوں اپنے آسے پاسے خون دی بو محسوس نہیں ہوئی۔ ساہڈے روحانی سرداراں داجو تسیں اک غیر محسوس انداز وچ اسلامی امہ دی نسل کشی اتے خاموش نیں بلکہ ایہدا حصہ نیں۔ پاکستان اسرائیل نوں ناتسلیم کر کے سزا بھگتے تے جہناں دے پچھے اسیں ہتھ بنھ کے کھڑے آں اوہ اسرائیل نوں تسلیم کرن۔ ایہدے حق وچ بیان دین۔ ایس تک طیارے پہنچان لئی اپنی فضا دین۔اوہ دھرتی جتھے دے تاجدار عالمؐ نے اپنے عمل تے اپنے کردار نال بت سٹے۔ اوتھے جدید ترین مندر بنائے جا رہے نیں تے خود گیروے کپڑے تے متھے اتے تلک لا کے نمستے ہو رہے نیں تے اوہناں دا افتتاح کون کر رہیا ہووے؟ دل ڈرد ااے جدوں آن والا ویلا سوچدا واں۔ہر پاسوں دھواں‘ بارود‘ چیخاں‘ سسکیاں دی آوازاں بلند ہوندی محسوس ہو رہیاں ہون۔ الاماں الاماں دی سسکیاں۔ عالم اسلام تباہی ول جا نہیں رہیا اوہدا شکار ہو چکیا۔ ہن اسیںمسلمان گھٹ تے شیعہ سنی زیادہ آں۔ کافر ساہنوں مسلمان تے اسیں اک دوجے نوں کافر کہنے آں۔ ساہڈی قیادت نوں اقتدار دی کشمکش تے دولت دی حرص وچ پھسا دتا گیا اے۔

اسیں اک بزدل قوم بن گئے آں جو امریکہ نوں خوش کرن لئی کھرباں روپے دا اسلحہ خریددی اے تے اک دوجے نوں مارن لئی استعمال کردی اے۔ افسوس اسیں ہیروز جننے‘ مفکر پیدا کرنے بند کر دتے۔ اسیں آہستہ آہستہ موت نو پانے ول ودھدا ویکھ رہے آں۔ خلیج توں اٹھن والا لہو دا طوفان پوری مسلم امہ نوں پانی لپیٹ وچ لے جکیا۔ ہنری کسنجر نے آکھیا سی اسیں ہر حال وچ تیل پیدا کرن والے ملکاں اتے قبضہ کرنا اے اوہ کامیاب ہو چکے تے اسیں اقتدار دی شطرنج کھیڈن اپنی کھل بچان‘ امریکہ دی خوشنودی حاصل کرن وچ مصروف آں۔ ایہ بھل رہے آں کہ آندھی دے جھکڑ کسی دے دوست نہیں ہوندے۔ دیوے ساریاں دے بجھنے ہوندے نیں۔

'bZgIBQ<'">sxhkvd

نئی تبصرہ شامل کریں

About text formats

متعلقہ خبریں

فقیر یاں فنکار

منگتے بہت وڈے ایکٹر ہوندے نیں تے کروڑاں دے مالک وی

جولائی 04, 2018

نواں پاکستان ........ کرن وقار

پاکستان وچ عام انتخابات مگروں جتھے مرکز تے چاراںصوبیاں وچ حکومت سازی لئی کوششاں جاری نیں ۔اوتھے خیبر پختوانخواہ اک ایسا صوبہ اے جتھے تحریک انصاف دو

اگست 03, 2018

برلن‘ لہور تے ساڈی گلی

تحریر:

وجاہت مسعود
 

 

جولائی 30, 2018

’’کون لین آئے گا غریب دی دھیاں‘‘

تحریر:

صدام ساگر

جولائی 27, 2018

قندوز سے دوما تک

ایثار رانا

شکر اے ساہڈے بچے محفوظ نیں۔ ساہڈی دعا اے اوہ ہمیشہ ہسدے مسکراندے رہن۔ ملال وی ساہڈی بچی اے‘ اوہنوں اک گولی لگی سی۔ اوہدی تعلیم

اپریل 09, 2018

پنجاب دااگلا وزیر اعلیٰ تے گنجے فرشتے ..... مدثر اقبال بٹ

پنجاب دااگلا وزیر اعلیٰ تے گنجے فرشتے

اگست 03, 2018