کیہ میرے "جانوں" چور نیں؟

Javed malik

تحریر: جاوید ملک

میری پہلی محبت صحافت تے عشق اہل قلم سن۔عمر دا اوہ حصہ جدوں میرے سارے دوست حسینا دی آمدورفت دا شیڈول ترتیب دِتا کردے سن میں کتاباں وچ گواچیا رہنا ساں۔ کالج وچ جیویں ای کوئی فارغ ویلا ملدا، لائبریری وچ گھس جاندا تے سارے اخبار چٹ دیندا سی۔ دوست بڑی مشکل نال مینوں گھسیٹ کے کینٹین تے لے جاندے۔ ایس محفل دا موضوع شہر بھر دی مہ جبیناں ہوندا سی۔ سارے اپنی اپنی جاناں دے قصے سناندے اوہناں دی غزالی اکھاں، ہرنی جیہی چال، مونالیزا نوں شرماندی مسکراہٹ دا ذکر کردے۔ آہواں بھردے تے فیر کوئی سینے تے ہتھ رکھ کے چہرے تے مجنوں دے درد و الم دی کیفیات پیدا کرکے " اوئی میں مر گیا" دا نعرہ لاندا تے محفل ہاسیاں نال گونج اٹھدی۔ اکثر ایس چٹخارے دار گل بات دے دوران کوئی دوست ازراہ تفنن میرے کولوں پُچھ لیندا " تسیں سناؤ اج تہاڈے جانوں نے کیہ لکھا؟" فیر بہت دیر تک فضا بے فکرے ہاسیاں نال گونجدی رہندی۔

میں برہم ہو جاندا تے اوہناں نوں آکھدا کہ ایہ لوک ساڈے ہیرو نیں۔ ایہناں دی قدر ساڈے ساریاں تے واجب اے۔ جہڑی قوماں اپنے دانشوراں دی قدر نہیں کردیاں اوہ مٹ جاندیاں نیں۔ دوست کوئی ہور چٹکلا چھڈ دیندے تے گل ہسی وچ اڈ جاندی۔ میرے جوانی دے دور وچ مجیب الرحمٰن شامی توں ضیاء شاہد تک کنے ای اہل قلم سن جہناں دا ڈنکا وجدا سی۔ اوہ لفظاں دے بادشاہ سن۔ انج گلدا سی جیویں لفظ اوہناں دے اگے ہتھ بنھ کے قطار در قطار آندے نیں۔ ایہدے وچ کوئی شک نہیں سی کہ اوہناں دے لفظاں وچ حسینا دی زلفاں توں ودھ طاقت سی تے اوہ لوکاں نوں اپنا اسیر کر دے سن۔ اوہ میرے سَنے لکھاں لوکاں دی جاناں سن۔

لوکاں نے اوہناں نوں دیوا جیا درجہ دے رکھیا سی تے اوہناں دی پوجا پاٹ کر دے سن۔ میں اکثر ایہ سوچنا واں کہ کاش صحافت میر ذریعہ معاش نہ بن دا۔ اخباری دفتراں دی ایہ تنگ تے تاریک سیڑھیاں میرا مقدر نہ ہوندیاں تے اسرار دے بہت سارے پردے قائم رہندے۔ میرے من دے اندر سجے ایس بت خانہ دے اکثریتی بت انج پاش پاش نہ ہوندے۔ میں صحافتی عقوبت خانیاں دی سسکیاں نال آشنا نہ ہوندا۔ قول و فعل دے ایس تضاد دا مینوں مشاہدہ نہ ہوندا میں اج وی اہل قلم دے لفظاں دا اسیر ہوندا۔ اوہناں دا ذکر کردے ہوئے احترام میرے لہجے وچ درآندا۔ میں کدی نہ جان پاندا کہ حسینا دی زلفاں وانگوں ایہ اسیری وی دھوکہ اے۔ ایہناں وچ بھاری تعداد مفادی ٹولہ اے جیہڑا دانشور نیں لفظی مالشیے نیں۔ اوہناں دا قبلہ تے کعبہ جی حضوری اے۔ ایہ صحافی نہیں سگوں " ٹھگ" نیں۔ ایہ میں جاننا واں کہ بھرم ٹُٹن دی تکلیف موت توں بری ہوندی اے۔ اے عقیدتاں جدوں زمین بوس ہوندیاں نیں تے پہلے پہلے اوہناں دی تھاں بے بسی چادر اوڑھ لیندی اے تے فیر ایہ بے بسی جدوں غصہ گھونٹ گھونٹ پی کے تھک جاندی اے تے بغاوت نوں جنم دیندی اے۔

مدثر اقبال بٹ لہور دے صحافی نیں۔ میرا اوہناں نال بہت احترام دا رشتہ اے۔ میں اوہناں دی حق گوئی تے بے باکی دا ہمیشہ توں معترف رہیا واں۔ ایہناں دناں سوشل میڈیا تے اوہناں ولوں قومی احتساب بیورو لہور نوں دِتی گئی اک درکواست وائرل اے۔ اوس درخواست دا خلاصہ کڈھ لیا جاوے تے مدثر اقبال بٹ دی نظر وچ میرے ایہ سارے جانوں چور نیں جیہڑے کمینگی دی آخری حد تک لٹ مار وچ مصروف نیں۔ اوہناں نے احتساب بیورو نوں اپیل کیتی اے کہ اوہ ایس معاملہ دا نوٹس لین تے غلاظت نال اٹے ایہناں نام نہاد ناصحیاں نوں قرار واقعی سزا دین۔ ہن فیصلہ تاں احتساب بیورو دی تفتیش وچ ای ممکن اے کہ میرے کیہڑے کیہڑے جانوں چور نیں؟ پر مینوں ایہ تفتیش ہوندی وکھائی نہیں دیندی کیوں جے احتساب بیورو پہلے ای جس قدر تنقید دی زد وچ اے اوہنوں ویکھدے ہوئے ایہ امید رکھنا کہ ایسے حالات وچ اوہ ایس بدمعاشی تے وی ہتھ پا لین گے ممکن وکھائی نہیں دیندا، پر امید دا دامن کدی ہتھوں نہیں چھڈنا چاہیدا۔ مدثر اقبال بٹ امید نال نیں تے سانوں وی حوصلے جوان رکھنے چاہیدے نیں۔

نئی تبصرہ شامل کریں

About text formats

متعلقہ خبریں

بوگس سیاست وانگوں بوگس ویاہ ...... اسد مفتی

تحریر:

اسد مفتی

خبر آئی اے کہ انگلستان وچ وسن والی ایشیائی کمیونٹی وچ جبری ‘بے جوڑ تے سہولت دیاں ویاہواں دامسئلہ شدت اختیارکردا

اگست 03, 2018

اسیں پھسے ہوئے ہاں

تحریر:

سید آصف شاہکار

موچی دا پتر موچی ای بنندا اے تے نائی دے پتر نے وڈے ہو کے حجامتاں ای کرنیاں ہوندیاں نے۔ساڈے دیس وچ ایہہ ک

جولائی 06, 2018

نواں پاکستان ........ کرن وقار

پاکستان وچ عام انتخابات مگروں جتھے مرکز تے چاراںصوبیاں وچ حکومت سازی لئی کوششاں جاری نیں ۔اوتھے خیبر پختوانخواہ اک ایسا صوبہ اے جتھے تحریک انصاف دو

اگست 03, 2018

گُونگا........... افضل راز

تحریر:

افضل راز

 

جولائی 28, 2018

فقیر یاں فنکار

منگتے بہت وڈے ایکٹر ہوندے نیں تے کروڑاں دے مالک وی

جولائی 04, 2018

ملکی ترقی دی ضامن سوچ

عبدالباسط

ملک نوں ترقی دی شآہراہ اتے چلان‘ اقتصادی تے معاشی سرگرمیاں نوں فروغ دین تے عوام دے مسئلے تے مشکلاں حل کرن لئی ملکی اداریاں دے س

اپریل 09, 2018