اَن پڑھتا دی وڈی وجہ غربت تے مہنگی تعلیم

Saba Zahra

لیکھ: صبا زہرا

جمدیاں ای گڈیاں دے شیشے صاف کرن والے بال اہم شہری کیویں بنن گے…؟؟؟
پڑھیا لکھیا پنجاب دا نعرہ وی کاغذی ثابت ہویا

 


نویں نسل کسے وی قوم دا مستقبل ہندی اے۔ ایس لئی ضروری ہندا اے کہ اوہدی تعلیم تے تربیت اتے خاص دھیان دتا جاوے پر بدقسمتی نال ماڑے دیساں وچ سارا کجھ ایہدے الٹ ہو رہیا اے۔ انج دے دیساں وچ ساڈا سوہنا تے من موہنا دیس پاکستان وی شامل اے۔ماڑے دیساں وچ دولت دی کانی ونڈ‘ معاشی بدحالی‘ بے روزگاری تے غربت نے بالاں دا استحصال کیتا اے۔
جے اسیں پاکستان دی گل کریے تے ایتھے اج وی اک وڈی گنتری وچ بال سکول نہیں جاندے جہدی سبھ توں وڈی وجہ غربت اے۔ ماپے نکی عمرے ای بالاں نوں سکول دی تھاں ورکشاپاں تے کارخانیاں دے بالن بنا چھڈدے نیں تے ساڈی سرکار دا تے پہلاں ای اللہ حافظ اے۔
ملاں‘ کارخانیاں تے ہوٹلاں وچ کم کرن والے بالاں دا مستقبل کیہ ہونا اے سگوں اوتھے اک ہور وگاڑوی پیدا ہندا اے جے اوتھے اوہناں نمانیاں اتے جسمانی تے جنسی تشدد وی کیتا جاندا اے انج اوہ ساری حیاتی لئی احساس کمتری دا شکار ہو جاندے نیں۔ دورجان دی لوڑ نہیں اسیں جے اپنے آل دوالے جھاتی ماریے تاں ہر تھاں تے سڑکاں دے چوکاں وچ بھیک منگن دے نال نال گڈیاں دے شیشے صاف کردے بال نظری آون گے۔ کجھ نکے نکے ہتھاں نال جتیاں پالش کردے وی۔ کھیڈن تے پڑھن دی عمر وچ ایہہ بال وچارے جہناں دا بال پن وچ روٹی دے چکر وچ گواچ جاندا اے وڈے ہو کے کیہ سواہ اہم شہری بنن گے؟
کجھ تے ساڈے دیس وچ مہنگی تعلیم نے وی غریب ماپیاں دے بالاں نوں تعلیم کولوں دور کردتا اے تے کجھ بھکھ تے ننگ نیں۔
دنیا بھر دے غریب ملکاں وانگوں ساڈے دیس وچ وی وسائل دی کانی ونڈ‘ معاشی بدحالی‘ بے روزگاری‘ غربت جہے مسئلیاں دے کارن معصوم بال تعلیم دے زیور توں محروم نیں تے اوہناں کولوں مشقت لئی جا رہی اے۔ پھلاں وانگوں سوہنے بال گھریلو‘ ملازم‘ بوٹ پالش کردے‘ ہوٹلاں چاء خانے‘ ورکشاپاں‘ مارکیٹاں‘ چھوٹی فیکٹریاں بھٹے‘ سی این جی تے پٹرول پمپاں سنے کئی تھاواں تے مشقت کردے نظر آئوندے نیں جد کہ بالاں کولوں دھکے دھکی مشقت لینا وی ساڈے معاشرے وچ عیب نہیں سمجھیا جاندا۔کھیڈن تے پڑھن لکھن دے دناں وچ ہتھاں وچ کتاباں دی تھاں اوزار پھڑا دتے جاندے نیں۔ ایہو معصوم بال جدوں حالات توں مجبورہو کے کم کار کرن لئی نکل کھلوندے نیں تے یقینی طور تے ایس معاشرے لئی اک وڈا المیہ بندا جا رہیا اے۔ بالاں توں مشقت خوشحالی تے ترقی دے دعویدار معاشرے دے مونہہ تے کالک اے تے قوم دی اخلاقی قدراں دے زوال دی نشانی اے۔
ہر سال 12جون دے دن پاکستان سنے دنیا بھر وچ محنت مزدوری کرن والے بالاں دے عالمی دن دے طور تے منایا جاندا اے۔ ایس دن سرکاری تے سماجی تنظیماں ولوں وکھ وکھ تقریباں دا آہر کیتا جاندا اے تاں جے محنت کش بالاں دے مسئلے نوں ذمہ واراں تک چنگے طریقے نال اپڑایا جاوے تے بالاں توں دھکے دی مشقت دا خاتمہ ممکن ہووے۔
پاکستان وچ جتھے غربت‘ مہنگائی‘ بے روزگاری نے غریب بالاں نوں سکول توں دور کردتا اے۔ تعلیم اوہناں ماڑیاں لئی سفنا بن کے رہ گئی اے۔ اوتھے پرائیویٹ سیکٹر دے تعلیمی اداریاں تے تعلیم نوں ایس قدر مہنگا کردتا اے کہ اوسط درجے دی آمدن والے لوک وی اپنے بالاں نوں معیاری تعلیم دوان توں قاصر نیں۔ اجہے حالات وچ غریب اپنے ڈھڈھ دی اگ بجھان یاں تعلیم دے بھارچکن۔
ایہو وجہ اے کہ ماڑیاں دے بال ہر طرحاں دی قابلیت دے باوجود پچھے رہ جاندے نیں۔کیوں جے ماپیاں کول وسائل دی کمی ہون پاروں اوہ اپنے بالاں نوں معیاری تعلیم نہیں دوا سکدے۔ محنتی بال کوئی جمدے ای محنتی نہیں ہندے۔ اوہناں دیاں شکلاں دی اوجیہاں ای ہوندیاں نیں جیویں وڈے تعلیمی اداریاں وچ پڑھن والے بالاں دیاں ہندیاں نیں۔ گل ایہہ وے پئی وسائل نہ ہون مگروں ماڑے لوکی معاشرے دے ’’چھوٹے‘‘ بن کے رہ جاندے نیں۔ پاکستان وچ آئین دا آرٹیکل ’’یاراں‘‘ ایس گل دی ضمانت دیندا اے کہ بالاں نوں کارخانیاں‘ دکاناں تے کئی خطریاں والیاں ملازمتاں تے نہیں رکھیا جاوے گا۔ پر المیہ ایہہ وے کہ چائلڈ لیبر قوانین تے بنائے گئے نیں اج تک کسے نوں وی ایہناں قانوناں دی خلاف ورزی کرن پاروں سزا نہیں سنائی گئی۔ صورتحال وی ساریاں دے سامنے ایں۔
امیر لوکاں دے گھراں وچ کم کرن والے بالاں دے حالات سبھ توں بھیڑے نیں جہناں تے ڈاڈھا تشدد ہندا اے تے ایہہ واقعے وی اسیں روز سندے تے ویکھدے آں۔ پنڈاں وچ بھٹیاں تے کھیتاں توں اڈ شہراں وچ سڑکاں تے ورکشاپاں تے ہور نکے نکے کارخانیاں وچ پابندی دے باوجود معصوم بالاں کولوںمشقت لئی جاندی اے۔ ایس طرحاں ایہناں دے ننھے ہتھاں وچ قلم دی تھاں اوزاراں نے لے رکھی اے۔
یونیسیف دے مطابق چائلڈ لیبر دراصل اوہ کم اے جہڑا بالاں لئی عمر دے لحاظ تے کم دی نوعیت نوں نظری رکھدیاں ہوئیاں گھٹ توں گھٹ مقررہ کردہ اوقات توں بوہتی ہووے۔
پاکستان وچ بالاں دی مزدوری یعنی چائلڈ لیبر دی ہوڑھ دے بارے کیہڑے کیہڑے قوانین موجود نیں! چائلڈ لیبر دے متعلق آئینی شقاں نوں ویکھنے آں۔

نئی تبصرہ شامل کریں

About text formats

متعلقہ خبریں

ملکی ترقی دی ضامن سوچ

عبدالباسط

ملک نوں ترقی دی شآہراہ اتے چلان‘ اقتصادی تے معاشی سرگرمیاں نوں فروغ دین تے عوام دے مسئلے تے مشکلاں حل کرن لئی ملکی اداریاں دے س

اپریل 09, 2018

اَن پڑھتا دی وڈی وجہ غربت تے مہنگی تعلیم

لیکھ: صبا زہرا

جمدیاں ای گڈیاں دے شیشے صاف کرن والے بال اہم شہری کیویں بنن گے…؟؟؟

جولائی 04, 2018

’’کون لین آئے گا غریب دی دھیاں‘‘

تحریر:

صدام ساگر

جولائی 27, 2018

کیہ میرے "جانوں" چور نیں؟

تحریر: جاوید ملک

مئی 12, 2018