مسیحا نوں کم کرن دیو ۔۔ ۔۔ ۔۔ لکھت: ڈاکٹر صغرا صدف

Dr.Sughra Sadaf

ایس کائنات وچ بہوں وڈے تے نیک لوک موجود نیں جیہڑے حیاتی نوں کسے خاص مقصد لئی دان کر کے لوکائی دی فلاح وچ رُجھے رہندے نیں۔ ایہناں نال ای حیاتی دیاں چنگیاں قدراں جیوت نیں۔ 2004ءدی گل اے میری اماں ہوراں نوں ڈاہڈے برین ہیمبرج نے ادھ موا کر چھڈیا۔ گجرات دے اک وڈے ہسپتال دے اک چنگے ڈاکٹر نے کجھ گھنٹیاں دے معائنے پچھوں ہتھ چُک لئے تے مریضہ نوں گھر لے جان دا آکھیا۔ ایہدا مطلب سی کہ ہن اسیں کجھ نہیں کر سکدے۔ اک اجیہی گھڑی جدوں ماپے ڈاہڈے دکھ وچ کلپدے ہون تے اولاد بے وس فیر ایس درد نوں محسوس ای کیتا جا سکدائے دسیا نہیں جا سکدا۔ خیر اسیں اوہناں نوں گھر لے جا کے موت نوں اُڈیکن دی تھاں لاہور دے اک وڈے پرائیویٹ ہسپتال دے سوالی بن کے تِن دیہاڑے اِک پیر تے کھلوتے رہے۔ اکھاں وچ اتھرو تے ہوٹھاں تے چُپ دے جندرے ہر گھڑی اک خوف دا ساہمنا، ٹیسٹ تے پیسے اکٹھے ہوندے رہے پر درد وچ افاقہ ہویا نہ آپریشن دا پربندھ۔ ماں جی گل نہیں کر سکدیاں سن صرف کنپٹی تے ہتھ رکھ کے اشارہ کردیاں سن پئی ایتھوں سِر پاٹ گیا اے۔ ایس ویلے جدوں کجھ نہیں سُجھدا پیا سی ربّ نے نیلما ناہید درانی نوں وسیلہ بنا کے گھلیا۔ اوہناں دس پائی سگوں زور دے کے آکھیا کہ ماں جی نوں فوراً جنرل ہسپتال دے ڈاکٹر انور چوہدری ہوراں نوں وکھاﺅ، ربّ چنگا کرے گا۔ جمعے دا دیہاڑ سی بِنا کسے سفارش، رقعے یاں ریفرنس دے میں اوہناں تیکر اپڑی دسیا گیا اوہ نماز پڑھ رہے نیں تے سویر دے چار آپریشن کر چکے نیں نالے اگلے دو دن ہسپتال وچ آپریشن ڈے نہیں۔ اوہناں سلام پھیریا تے میرے اتھروو¿واں نال لِبڑے اکھّر سنے تے محسوس وی کیتے تاں ای اک گھڑی دیر کیتے بِنا اوہناں چھیتی نال ماں جی نوں جنرل ہسپتال لیاﺅن نوں آکھیا نال ای گیٹ تے فون کر کے آکھیا کہ رسمی کارروائی وچ ویلا برباد کیتے بِنا مریض نوں چھیتی نال نیورو وارڈ وچ گھل دتا جاوے۔ میں تے ہکّا بکّا رہ گئی۔ کدی اینج دا ڈاکٹر ویکھیا تے نہ ای وا پیا۔ پرائیویٹ ہسپتال توں جنرل ہسپتال شفٹ کرن تے باقی عمل وچ اک گھنٹہ لگا تے آپریشن شروع ہو گیا جیہڑا کوئی چار گھنٹے جاری رہیا۔ اوہ باہر نکلے تے چہرہ پرسکون سی، دُعا کرن دا آکھ کے ٹُر گئے۔ اگلے دن ماں جی نوں ہوش وی آ گیا تے یادداشت وی متاثر نہ ہوئی۔ فیر 2011ءوچ میرے ویہہ ورھے دے بھتیجے نوں ایکسیڈینٹ وچ ریڑھ دی ہڈی تے ڈاہڈی سَٹ لگی۔ علاج تے دیکھ بھال دے باوجود روز دیہاڑے اوہدا جُسّہ کم چھڈن لگ پیا، کدی ہتھ سُن ہو جاندا تے کدی پیر، کدی اک پاسا تے کدی دوجا پاسا، بچہ بے بسی نال روون لگ پیندا۔ آپریشن وچ ٹھیک ہون دے چانس گھٹ تے ہمیش لئی مفلوج ہون دے چوکھے سن پر کوئی چارہ نہیں سی، سوچدے کیہ کریئے۔ جدوں دوجا مہرہ وی متاثر ہون لگا تے اِک وار فیر ڈاکٹر انور چوہدری ہوراں سرکاری ہسپتال دے آپریشن تھیٹر وچ اَدھا دن لنگھایا۔ مریض دے ہوش آﺅن تے اوہنوں پیر دی انگلی ہلان نوں آکھیا تے فیر مبارکباد دے کے اگلے آپریشن ول ودھ گئے۔ ایہناں دو واقعات کارن ڈاکٹر صاحب ساہنوں اک نِگھّے بیلی تے نیک فرشتہ نظری آن لگ پئے۔ فیر اوہناں دے رفاہی کماں دا پتہ لگا تے اوہ ہر گھڑی ساڈیاں دعاواں وچ شامل ہو گئے۔ ضلع گوجرانوالہ دے نِکّے جیہے پِنڈ مجّو چک دا بہوں بیبا تے بھلا مانس سیلف میڈ بندہ جیہنے اپنی محنت تے لگن نال پڑھائی پوری کیتی تے میڈیکل کالج توں ڈاکٹر نہیں اِک مسیحا بن کے نِکلیا۔ اوہناں دی حیاتی مسیحائی دا لمّا سلسلہ اے، کئی کہانیاں نیں۔ ہزاراں لوک اوہناں دے بھلے سلوک تے چنگی دیکھ بھال کارن اوہناں نوں پیر مَندے نیں۔ اوہناں ورھیاں پچھوں وی اپنے پِنڈ نال ناطہ نہیں تروڑیا سگوں آر اینڈ آر سوسائٹی دے پربندھ ہیٹھ اوتھے مہینے دی اِک اتوار نوں فری میڈیکل کیمپ لاندے نیں۔ اک واری میں وی ایہہ سارا عمل ویکھن مجّو چک گئی۔ پورے صوبے تُوں ہزاراں لوک اک وڈے احاطے وچ اکٹھے سن۔ سارا دن ڈاکٹر صاحب سر نِیواں کیتے نسخے لکھن وچ رُجھے رہے۔ مفت دواواں دے نال ہمدردی آلا سلوک تے فیر ڈاہڈے بیماراں نوں پرائیویٹ کلینک دی تھاں سرکاری ہسپتال دا پتہ دَس کے رخصت ہوئے تے اوہناں دے آل دوالے دُکھی اکھّاں چوں نکلن آلے اتھرواں دا چانن کھِلریا سی، اوہ تروتازہ لگدے سن۔ بندے نوں خوراکاں نہیں دُعاواں تگڑا رکھدیاں نیں۔ سیلاب، زلزلے تے کسے وی آفت وچ ہمیش اپنے سنگیاں نال کروڑاں روپیاں دی امداد تے دواواں لے کے اوکھیاں راہواں آلے علاقیاں وچ اپڑے۔ سرکاری ہسپتالاں وچ اوہ اکلّے ڈاکٹر نیں جیہڑے اپنی مرضی نال سویر اَٹھ وجے توں لے کے رات 11 وجے تیکر سرکاری ہسپتال وچ آپریشن کردے نیں۔ جنرل ہسپتال وچ اک ورھے دے وچکار اوہناں 70 لکھ روپئے چیریٹی توں اکٹھے کر کے نیورو وارڈ دی شکل ای بدل دتی۔ 4 وینٹی لیٹر خرید کے ICU وچ چلائے جیہڑا بہوں وڈا ریکارڈ اے۔ پرائیویٹ کمریاں توں 41 لَکھ ریونیو ہسپتال دے خزانے وچ جمع کرایا جد کہ پِشلا ریکارڈ 9 لَکھ اے۔ یو کے کریش سٹڈی جیہدا مُڈھ یو کے وچ ہویا دے موجب سر تے سَٹ لگن آلے مریضاں نوں چھیتی نال اک انجکشن لایا جاندائے جیہدے کارن اوہ برین ہیمبرج توں بچ جاندے نیں۔ ڈاکٹر انور چوہدری تے جنرل ہسپتال دے دوجے پروفیسراں کارن پاکستان پہلے نمبر تے وے۔ ڈاکٹر صاحب اک ہزار توں چوکھے مریضاں نوں انجکشن لا چکے نیں ایس لئی انفرادی حوالے نال وی پوری دنیا وچ پہلے نمبر تے نیں۔ کئی ڈاکٹراں دا آکھنا اے پئی PINS (پنجاب انسٹیٹیوٹ آف نیورو سرجری) نوں اک وکھرا ادارہ بنا دتا جاوے کیوں جے ملک وچ حادثیاں، لڑائی جھگڑیاں تے بیماریاں کارن مریضاں دی گنتی بڑی چوکھی اے۔ جے PIC وانگوں ایہنوں وکھرا انسٹیٹیوٹ بنا دتا جاوے تے ایہہ چوکھا چنگا کم کر سکدائے۔ ایہہ اک سانجھا مطالبہ سی جیہدے لئی اک جامع Presentation دتی گئی، کوئی سڑک بلاک نہیں کیتی گئی نہ ای قانون دی خلاف ورزی۔ ایس مطالبے وچ تے کوئی ہرج نہیں سی پر ایہدے کارن ڈاکٹر صاحب پِشلے کئی مہنیاں توں او۔ ایس۔ ڈی نیں۔ ایس دوران مریضاں تے پاکستان سَنے نیپال، افغانستان تے دوجیاں مُلکاں دے ٹریننگ لئی آﺅندے نوجوان ڈاکٹراں دا جیہڑا نقصان ہویا اوہ ناقابل تلافی اے۔ سیکرٹری صحت نجم شاہ ہوری بڑے چنگے افسر نیں۔ خورے کیوں ھلے تیکر اوہناں ایس پاسے دھیان نہیں دِتا۔ فیر وی دل نوں اِک آس اے پئی اوہ ایس مسئلے نوں سُلجھان گے۔ وزیر اعلیٰ پنجاب ہوراں ملکوال وچ کم، کم تے کم دے اکھان تے عمل نوں پنجاب حکومت دی پچھان دسیا۔ اوہناں اگے بِنتی اے کہ اک کم کرن آلے ڈاکٹر نوں کم کرن دیو۔ اوہناں نوں گیٹ کول میز لا کے مریضاں نوں ویکھن دا آکھ دیو پر کم توں نہ ڈَکو۔ اوہ نرے اک ماہر ڈاکٹر نہیں سگوں اوہناں تے خدا دا خاص کرم اے، لوکائی نوں کرم توں دُور نہ رکھو۔

نئی تبصرہ شامل کریں

About text formats

متعلقہ خبریں

اسیں پھسے ہوئے ہاں

تحریر:

سید آصف شاہکار

موچی دا پتر موچی ای بنندا اے تے نائی دے پتر نے وڈے ہو کے حجامتاں ای کرنیاں ہوندیاں نے۔ساڈے دیس وچ ایہہ ک

جولائی 06, 2018

بوگس سیاست وانگوں بوگس ویاہ ...... اسد مفتی

تحریر:

اسد مفتی

خبر آئی اے کہ انگلستان وچ وسن والی ایشیائی کمیونٹی وچ جبری ‘بے جوڑ تے سہولت دیاں ویاہواں دامسئلہ شدت اختیارکردا

اگست 03, 2018

*رمضان تے قرآن دی مناسبت*

*رمضان تے قرآن دی مناسبت*
مفتی عمران (لیکچرار)

جون 02, 2018

ملکی ترقی دی ضامن سوچ

عبدالباسط

ملک نوں ترقی دی شآہراہ اتے چلان‘ اقتصادی تے معاشی سرگرمیاں نوں فروغ دین تے عوام دے مسئلے تے مشکلاں حل کرن لئی ملکی اداریاں دے س

اپریل 09, 2018

نواں پاکستان ........ کرن وقار

پاکستان وچ عام انتخابات مگروں جتھے مرکز تے چاراںصوبیاں وچ حکومت سازی لئی کوششاں جاری نیں ۔اوتھے خیبر پختوانخواہ اک ایسا صوبہ اے جتھے تحریک انصاف دو

اگست 03, 2018