تازہ ترین

پاکستان کرکٹ ٹیم نوں آسٹریلیا کولوں وڈی شکست

Rizwan Asghar butt

تحریر :رضوان اصغر بٹ


17 مارچ 2019 نوں پی ایس ایل سیزن فور دا فائنل کراچی وچ ہویا تے تینوں فارمیٹس وچ پاکستانی ٹیم دی کپتانی کرن والے سرفراز احمد دی ٹیم کوئٹہ گلیڈی ایٹرز نے میدان مار لیا۔پورے پاکستان وچ کرکٹ بخار چھا رہیا سی تے اوس توں بعد قومی ٹیم لئی آسٹریلیا نال 5   ون ڈے میچاں دی ہوم سیریز دی صورت وچ ورلڈ کپ توں پہلاں اِک وڈا امتحان انتظار کر رہیا سی۔ پی ایس ایل فائنل توں پہلاں ای ایس سیریز لئی چیف سیلیکٹرتے سابق کپتان قومی کرکٹ ٹیم انضمام الحق ولوں پاکستان ٹیم دے سکواڈ دا اعلان کر دتا گیا سی۔ جیہدے وچ ورلڈ کپ لئی لائن اَپ وچ نانواں وچوں چند اِک ناں ای نظر آئے۔ کپتان سرفراز احمد سمیت اوپنر فخر زمان، آئی سی سی بیٹنگ رینکنگ وچ نمبر 7 بلے باز بابر اعظم ، نوجوان آل رائونڈر شاداب خان ، مڈل آرڈر وچ جارحانہ بیٹنگ کرن والے آصف علی، فاسٹ بائولر ز شاہین آفریدی تے حسن علی نوں ایس سیریز وچ آرام دین دا فیصلہ کیتا گیا۔شعیب ملک نوں اک واری فیر کپتان بنا دِتا گیا جد کہ ڈومیسٹک کرکٹ وچ بہتر کارکردگی اُتے عابد علی تے پی ایس ایل وچ شاندار بولنگ کرن پاروں ینگ فاسٹ بائولر محمد حسنین نوں پہلی واری پاکستان ٹیم دے سکواڈ وچ شامل کیتا گیا۔عمر اکمل نوں پی ایس ایل فور وچ بہتر کارکردگی وکھان دی وجہ توں اک واری فیر قومی ٹیم وچ موقع دِتا گیا کہ شاید اوہ ٹیم وچ ہارڈ ہٹر دی کمی پوری کر سکے۔ ورلڈ کپ 2019 توں پہلاں جد ساریاں ٹیماں اپنا ورلڈ کپ سکواڈ ترتیب دے کے اوسے سکواڈ نال کھیڈ رہیاں نیں ایس ویلے پاکستان کرکٹ ٹیم ولوں ایس طرح دے تجربے کرنا سمجھ توں باہر سی تے ہر کرکٹ ایکسپرٹ اور تجزیہ کار دا ایہہ ہی آکھنا سی کہ آسٹریلیا دی اوہ ٹیم جیہڑی بھارت نوں بھارت وچ 5 ون ڈے میچاں دی سیریز ہرا کے آ رہی اے اوہنوں آسان حریف سمجھنا مہنگا ثابت ہو سی۔
22  مارچ نوں ہون والے پہلے میچ وچ پاکستان نے ٹاس جت کے پہلاں بیٹنگ دا فیصلہ کیتا تے اوپنرز دے سلو سٹارٹ توں بعد حارث سہیل نے  101  رنز دی بہترین اننگز کھیلی لیکن ٹیم وچ کوئی ہارڈ ہٹر نہ ہون پاروں  50  اوورز وچ قومی ٹیم صرف  280  رنز ای کر پائی۔ ایس اننگز وچ صرف عماد وسیم نے جارحانہ بیٹنگ کیتی تے 4 چوکے اور 1 چھکے دی مدد نال  13 گینداں کھیڈ کے  28  رنز بنائے۔ ورلڈ کپ توں پہلاں موقع حاصل کرن والے عمر اکمل نے وی  48 سکور کیتی لیکن 280 رنز دا ہدف انڈیا کولوں مسلسل 3 میچ جت کے سیریز اپنے ناں کرن والی آسٹریلین ٹیم لئی بہت آسان سی۔ آسٹریلیا دی پہلی وکٹ  12 ویں اوور وچ  63  سکور تے عثمان خواجہ دی شکل وچ فہیم اشرف نے لئی تے فیر کپتان ارون فنچ اور شان مارش نے پاکستانی بائولرز دی خوب دھلائی کردیاں ہویاں   172 رنز دی پارٹنر شپ لائی۔ کپتان ارون فنچ نے شاندارسنچری سکور کیتی تے ایس طرح آسٹریلیا نے ایہہ میچ با آسانی  49  اوورز وچ  8  وکٹاں توں جت لیا۔
دوجے میچ وچ کپتان شعیب ملک نے ٹاس جت کے فیر بیٹنگ دا فیصلہ کیتا تے اوپنر امام الحق پہلے ای اوور وچ بغیر کوئی سکور بنائے آئوٹ ہو گئے جیہدے بعد 7 ویں اوور وچ دوجے اوپنر شان مسعود وی اوہناں دے پچھے لگے گئے۔ وکٹ کیپر محمد رضوان نے اپنے کیرئیر دی پہلی سنچری بنائی جد کہ کپتان شعیب ملک نے 60 رنز دی اننگز کھیلی جیہدے بعد اننگز دے اختتام اُتے پاکستان دا سکور 284 سی جد کہ 7 آئوٹ ہوئے۔ اک واری فیر پاکستان نے ہارڈ ہٹر زدی کمی محسوس کیتی جیہڑے آخری دس اوورز وچ  100  سکور کرن دی صلاحیت رکھدے ہون۔ آسٹریلیا نے بیٹنگ شروع کیتی تے ڈیبیو کرن والے ینگ فاسٹ بائولرمحمد حسنین توں علاوہ ہر بائولر نوں بڑی آسانی نال آسٹریلین اوپنرز کھیلدے رہے تے 209 رنز دی اوپننگ پارٹنرشپ بنائی جیہدے بعد عثمان خواجہ 37ویں اوور وچ یاسر شاہ دی گیند تے امام الحق نوں کیچ دے بیٹھے۔ کپتان ارون فنچ نے دوجی اکٹھی ناقابل شکست سنچری سکور کیتی تے 153 سکور کرن پاروں دوجے میچ دے وی بہترین کھلاڑی قرار پائے۔ ایہہ میچ وی آسٹریلیا 8 وکٹاں توں آرام نال جت گیا۔ دوجا میچ ہارن توں بعد جتھے پاکستانی ٹیم ایہہ سوچن تے مجبور ہوگئی کہ اسیں کس طرح وڈا ٹارگٹ دے سکنے آں اوتھے ای کینگروز دی شاندار بیٹنگ نے پاکستانی بائولرز دی کارکردگی اُتے وی سوال چُکے کے اسیں اوہناں دیاں وکٹاں کیوں نہیں لے پا رہے تے سکور روکن وچ وی ناکام ہو رہے آں۔
تیسرے ون ڈے توں پہلاں آل رائونڈر فہیم اشرف نوں بغیر کسے وجہ توں وطن واپس بُلا لیا گیا تے اوہناں دی جگہ کسے ہور کھلاڑی نوں سکواڈ وچ شامل وی نہ کیتا گیا۔ اک واری فیر قوم نوں ایس فیصلے دی سمجھ نہ آئی کہ پی سی بی مینجمنٹ بوکھلاہٹ دا شکار کیوں اے۔ ایس میچ وچ آسٹریلیا نے ٹاس جت کے پہلے بیٹنگ دا فیصلہ کیتا تے عثمان شنواری نے پہلے اوور وچ ای پاکستانی نژاد آسٹریلین بیٹسمین عثمان خواجہ نوں  0  تے آئوٹ کر دتا۔ 6 ویں اوور وچ جنید خان نے شان مارش نوں آئوٹ کیتا تے آسٹریلیا دا سکور 20 سی جیہدے بعد پہلے دو میچاں وچ سنچریاں بنائون والے کپتان ارون فنچ تے نوجوان بلے باز پیٹر ہینڈز کومب نے 85 رنز دی پارٹنر شپ بنائی تے ہینڈز کومب حارث سہیل دی گیند تے بولڈ ہوگئے۔ فیر 40 40   سکور دے وقفے نال سٹائنس تے فنچ وی آئوٹ ہوئے تے آسٹریلیا دا سکور  42 اوورز وچ 5 وکٹاں دے نقصان نال 188 سی۔ لگ اینج رہیا سی کہ اج پاکستانی ٹیم ایہناں نوں  230 تک محدود رکھے گی تے میچ جت کے سیریز نوں زندہ رکھے گی لیکن پاکستانی ٹیم د ے بر عکس آسٹریلیا کول میکس ویل جیہا ہارڈ ہٹر موجود سی جنہے  55 گینداں تے  71  سکور بنا یا تے اپنی ٹیم دا ٹوٹل  266  تے لے گیا۔ پچھلے میچ وچ ڈیبیو کرن والے محمد حسنین نوں  5  اوورز وچ  50  رنز پئے تے کپتان شعیب ملک نے اوہناں دے کوٹے دے باقی اوورز حارث سہیل کولوں کروانا ای مناسب سمجھیا۔ ایس ٹارگٹ دے حصول لئی جد ٹیم پاکستان نے بیٹنگ شروع کیتی تے پاکستانی بلے باز تُو چل میں آیا دی عملی تصوری نظر آئے تے 186  رنز تے سارے آئوٹ ہو گئے۔ آسٹریلوی آل رائونڈر پیٹ کمنزنے شاندار بائولنگ کردے ہویاں  8  اوورز وچ  23  رنز دے کے  3  وکٹاں حاصل کیتیاں جیہدے تے اوہناں نوں میچ دا بہترین کھلاڑی قرار دتا گیا۔
چوتھے میچ وچ کپتان شعیب ملک نوں انجری دی وجہ توں ریسٹ دتی گئی تے اوہناں دی جگہ آل رائونڈر اعماد وسیم نوں کپتانی دتی گئی۔ ایس انجر اُتے وی سوالیا نشان اے کہ ایہہ انجری قدرتی سی یا جبری؟۔ بہر حال شعیب ملک دی جگہ سعد علی نوں ڈیبیو کیپ دِتی گئی جد کے اوپنر امام الحق دی جگہ تے عابد علی نوں پاکستان دی نمائندگی کرن دا اعزازحاصل ہویا۔ ایس میچ وچ کپتانی دا ڈیبیو کرن والے عماد وسیم نے ٹاس جت کے فیلڈنگ دا فیصلہ کیتا تے آسٹریلیا دی پہلی وکٹ ارون فنچ  56  دے ٹوٹل سکور تے آئوٹ ہوئے جیہدے بعد ہر 20  30  سکور توں بعد وکٹ ڈگدی رہی تے آسٹریلیا 28 اوورز وچ 140 تے 5 آئوٹ ہو چُکے سن تے پاکستانی قوم نوں اک واری فیر اُمید سی کہ ہُن  200  توں پہلے آئوٹ کر کے پاکستانی ٹیم اج تے میچ جت ای لوے گی لیکن گلین میکس ویل اک واری فیر پاکستانی بائولرز دی دُھلائی لئی تیار سن تے اوہ  82 گیندا ں تے  98  رنز بنا کے آخری اوور وچ رن آئوٹ ہو گئے۔ اوہناں دے نال وکٹ کیپر کیرے وی  55  رنز بنائے تے کینگروز  277  رنز بنائون وچ کامیاب ہوئے۔ جیہدے جواب وچ پاکستان نے بیٹنگ شروع کیتی تے اوپنر شان مسعود پہلے ای اوور وچ آئوٹ ہو گئے ۔ ڈیبیو کرن والے عابد علی نے شاندار بیٹنگ دا مظاہرہ کیتا تے ڈیبیو میچ وچ سنچری کرن والے تریجے پاکستانی بلے باز دا اعزاز حاصل کیتا اوہناں دے نال وکٹ کیپر محمد رضوان نے ایس سیریز تے اپنے کیرئیر دی دوجی سنچری بنائی لیکن ہارڈ ہٹر نہ ہون دی وجہ توں اک واری فیر پاکستان نوں شکست دا ساہمنا کرنا پیا۔ ون ڈے میچاں دی تاریخ وچ ایہہ پہلا میچ سی جیہدے وچ  300  توں گھٹ ٹارگٹ چیز کرن دے دوران دو کھلاڑی سنچری بنائون تے ٹیم فیر وی میچ ہار جائے۔
5ویں میچ وچ پاکستانی کپتان اک واری فیر ٹاس جت گئے تے پنجاں وچوں  4  واری ٹاس جت گئے۔ ہوم سیریز وچ  4  ٹاس جتن دے با وجود ٹیم پاکستان نوں بد ترین کلین سویپ دا سامنا کرنا پیا۔ آخری میچ وچ ینگ بائولر محمد حسنین نوں ڈراپ کیتا تے محمد عباس نوں اک واری فیر ٹیم وچ شامل کیتا گیا۔ آسٹریلیا دے اوپنرز نے اک واری فیر پاکستانی بائولرز دی دھلائی کیتی تے پہلی وکٹ 24 ویں اوور وچ  134 سکور تے عثمان شنواری نوں ملی۔ دوجی وکٹ لئی پاکستانی قوم نوں 80 سکور دا انتظار کرنا پیا تے 214 دے ٹوٹل سکور تے عثمان خواجہ 98 رنز بنا کے آئوٹ ہو گئے۔ تریجی وکٹ 60 تے چوتھی 25 سکور دے وقفے نال ڈِگی جیہدے بعد میکس ویل نے اک واری فیر پاکستانی بائولرز نوں بال سمجھدیاں ہویاں دھلائی شروع کر دتی تے 33 گینداں کھیڈ کے  70 رنز دی شاندار اننگز کھیلی۔ آسٹریلیا 327 سکور بنائون وچ کامیاب ہویا۔ اپنے ڈیبیو میچ وچ سنچری بنائون والے تے پورے پاکستان دی امیداں دے محور عابد علی پہلے ای اوور وچ کھاتہ کھولے بغیر ای آئوٹ ہوئے تے شان مسعود تے حارث سہیل نے  109  رنز دی پارٹنر شپ بنائی جیہدے بعد شان مسعود  50  رنز بنا کے آئوٹ ہوگئے۔ ٹیم دے  136  سکور تے دو سنچریاں ضائع کروان والے محمد رضوان ساتھی کھلاڑی حارث سہیل دا ساتھ چھڈ گئے تے عمر اکمل نے حارث سہیل دا بھرپور ساتھ دتا جیہدے دوران حارث سہیل نے سیریز دی دوجی سنچری سکور کیتی لیکن کیہہ پتہ سی کہ اوہدی وی دوجی سنچری ٹیم دے کم نہیں آ سکنی۔ حارث سہیل تے عمر اکمل اگے پچھے ای جاندے رہے تے میچ دی ساری ذمہ داری کپتان عماد وسیم تے پے گئی۔ جیس ویلے عماد وسیم کریز تے آئے تے ٹیم نوں 10 اوورز وچ 88 سکور چاہیدا سی لیکن ایہہ کم دو جارحانہ بیٹنگ کرن والے بلے باز ای کر سکدے سن جد کہ کپتان دا کسے ساتھ نہ دِتا تے کپتان دی تیز ففٹی دے باوجود پاکستان ایہہ میچ وی 20 سکور توں ہار گیا۔ ایس طرح ایہہ سیریز  5-0  توں آسٹریلیا نے جت لئی۔ سیریز دے بہترین کھلاڑی دا ایوارڈ کینگروز کپتان ارون فنچ نوں شاندار بیٹنگ کرن تے ملیا جنہاں 2 سنچریاں تے اک ففٹی سکور کیتی۔
ہوم سیریز وچ ایس طرح دی ہار توں بعد پوری قوم سیلیکٹرز کولوں پُچھ رہی اے کہ ایس طرح دے تجربے ورلڈ کپ توں پہلاں کرن دی کیہہ لوڑ سی؟ جد پچھلے  2 سالاں توں تجربے کر کے نسبتاََ بہتر ٹیم بنائی جا چُکی اے تے فیر قوم دے جذبات نال ایس طرح کھیلنا مناسب نہیں۔ جد سکواڈ دا اعلان کیتا گیا تے کپتان سرفراز احمد ایس سیریز وچ ریسٹ نہیں کرنا چاہندے سن لیکن زبردستی ریسٹ کروائی گئی۔ کیہہ ٹیم بنائون وچ اوہناں دے لیڈر کپتان دی رائے نوں کوئی اہمیت نہیں دِتی جاندی؟ کیہ ٹیم مینجمنٹ تے سلیکشن کمیٹی کپتان نوں ایہناں کمزور بنا چُکی اے کہ اوہدی مرضی دے بغیر ای فیصلے کیتے جا رہے نیں؟ ایہہ سارے سوال پوری قوم ولوں نے ۔ اوہ قوم جنہاں دے جذبات وچ کرکٹ اے۔ ورلڈ کپ کرکٹ دا سبھ توں وڈا میلہ ہوندا اے۔ ورلڈ کپ 2019 مئی دے اخیر تے انگلستان وچ شروع ہو رہیا اے تے اوس توں پہلے انگلینڈ دے خلاف پاکستان دی 5 ون ڈے میچاں دی سیریز انگلینڈ وچ شیڈول اے۔ ایس سیریز وچ کامیابی پاکستانی ٹیم دا مورال بلند کر سکدی اے تے ٹیم پاکستان ورلڈ کپ وچ چنگی پرفارمنس دے کے چیمپئنز ٹرافی 2017 دی طرح سرفراز احمد دی قیادت وچ قوم نوں وڈا تحفہ دے سکدی اے۔ ساڈھی دعا اے کہ پاکستان کھیل دے ہر میدا ن وچ کامیابیاں حاصل کرے تے کھیل دی دنیا وچ پاکستان دا نام روشن رہوے۔

Fantastic tips. Kudos! list of approved canadian pharmacies canadian viagra drugs without prescription canadian pharmacies-24h buy medication without an rx - http://canadianpharmaceuticalsonlinerx.com/ c0344cc

نئی تبصرہ شامل کریں

About text formats

متعلقہ خبریں

ڈِکشنریاں دی ماں، پِلاک ڈکشنری

لکھت:ربیعہ رفیق
 

جنوری 24, 2019

پنجاب تے بیرونی حملہ آور

لکھت:سیف علی اعوان

جنوری 24, 2019

پاکستان کرکٹ ٹیم نوں آسٹریلیا کولوں وڈی شکست

تحریر :رضوان اصغر بٹ

اپریل 05, 2019

اَن پڑھتا دی وڈی وجہ غربت تے مہنگی تعلیم

لیکھ: صبا زہرا

جمدیاں ای گڈیاں دے شیشے صاف کرن والے بال اہم شہری کیویں بنن گے…؟؟؟

جولائی 04, 2018

اسیں پھسے ہوئے ہاں

تحریر:

سید آصف شاہکار

موچی دا پتر موچی ای بنندا اے تے نائی دے پتر نے وڈے ہو کے حجامتاں ای کرنیاں ہوندیاں نے۔ساڈے دیس وچ ایہہ ک

جولائی 06, 2018