اَتھرا

Sughra Sadaf

لکھت : ڈاکٹر صغرا صدف

کھاندے پیندے گھراں دے سبھ ہی جی چنگا چوکھا کھاندے نیں پر اصلی طاقت غذاواں وچ نہ جثے دے کھلار وچ لُکی ہوندی اے۔ اساں پہلواناں ورگے لوکاں دے اندر چڑی ورگا دل ویکھیا اے جیہڑے ذرا جئی اوکڑ آوے تے ریت دے ٹیلے وانگوں ڈِگ پیندے نیں ٹھاہ دی واج وی نہیں آوندی جد کہ ویکھن نوں سُکّے سڑے مطلب بہوں سمارٹ لوک وڈے وڈے پِڑ جت لیندے نیں، ڈاہڈیاں تے اوکھیاں راہواں وچ ہمت نہیں ہاردے سگوں اپنے حوصلے نال مَتھا لان آلیاں منفی طاقتاں دا بوتھا بھن کے اَگاں لنگھ جاندے نیں۔ حامد میر وی اینج دی ای مخلوق اے۔ کسے نہ کسے نال متھا لائی رکھنا اوہدا روز دیہاڑ دا کم اے کیوں جے عام روٹین دی حیاتی کرنا اوہدے وس وچ ای نہیں۔ آل دوال کھلرے وگاڑاں تے کُھل کے اپنی نراضگی ظاہر کر کے مسئلے بنان آلیاں نال آڈا لائی رکھدا اے۔ جے کر باہر سبھ کجھ خُشل منگل ہووے تاں اپنے آپ نال یُدھ چھیڑ کے رونق لا لیندا اے۔ جیویں کہ وجود وچ موجود عناصر بندے دی حرکت تے عمل دا نکھیڑ کردے نیں۔ لگدائے ربّ نے اوہنوں پارے ورگی فطرت دے کے گھلیا اے۔ تاں ای اوہ اک جھٹ وی چین نال نہ بہندا نہ کھلوندا اے۔ جدوں چُپ چپیتا تے پرسکون دِسدا ہووے تاں وی اوہدے اندر کوئی نہ کوئی جھکھڑ جھل رہیا ہوندا اے۔ اوہ مسئلے تے گل ہی نہیں کردا سگوں بڑی گوہ نال دھرتی دے کُوڑ کباڑ وچوں مسئلے لبھ کے اوہناں نوں چمکاندا تے پالدا اے۔ تے فیر اوہدا کوئی منطقی حل نکلن تیکر اوہدا پِچھا کردا رہندا اے۔
آکھیا جاندا اے کہ وڈے رُکھ تھلے کوئی ہور وڈا رُکھ نہیں جمدا تے جے کر جم وی پوے تے اوہدے وانگ اُچیائی تیکر نہیں اپڑدا۔ پرانے زمانے دیاں گلّاں حقیقت تے مبنی ہوندیاں سن۔ صدیاں دے تجربیاں مگروں کوئی اکھان ہوند وچ آئوندا تے جگت حقیقت بن جاندا۔ سنگھنی چھاں آلے وڈے رُکھ تھلّے کسے بِیں دا جم پینا ای اوکھا اے ایس لئی کہ اوتھے دُھپ دا سیک گھٹ گھٹ ای اپڑدا اے۔ نویں حیاتی دے پُنگرن دی گل کریئے تاں سورج تے دھرتی دے اکھ مٹکے باہجوں گل نہیں بندی۔ سورج دھرتی نوں اپنی تپش دے کے بیج نوں اینا طاقتور کر چھڈدا اے کہ اوہ دھرتی دا سینہ پاڑ کے باہر نکل آئوندا اے۔ وڈے رُکھ تھلّے جے کوئی بیج اُگ وی پوے تے اوہ یاں تے پیراں تھلے آ کے مِدھیا جاندا اے تے جے ایہدے توں بچ جاوے تے فیر اوہدی بڑھوتری دا سلسلہ اِک خاص حد مگروں رُک جاندا اے۔ بندیاں دے حوالے نال وی ایہہ کلیہ ورتیا جاندا اے کیوں جے بوہتے وڈے سوجھواناں، شاعراں، لکھاریاں، فنکاراں، سائنسداناں یاں حیاتی دے کسے وی شعبے نال سمبندھ رکھن آلیاں دی اولاد گھٹ گھٹ اوہناں وانگوں تخلیقی قوتاں رکھدی اے۔ اوہناں دا ظاہری جُثّہ تے بھاویں پیو نالوں چوکھا تگڑا تے قد بُت آلا ہووے پر تخلیق تے ہنر وچ اوہ بہوں پِچھے رہ جاندے نیں۔ کئی وار سماج وچ وڈیاں دی گوڑھی پچھان تے وڈیائی دا رُعب بالاں نوں ایس پاسے ودھن توں ڈکدا اے۔ فیر دنیا جیہنوں من چکی ہووے اوہدے ساہمنے اپنے آپ نوں منوانا اوکھا ہوندا اے ایس لئی رُکھ دا حوالہ ٹھیک جاپدا اے پر اساں کجھ اجیہے لوک ویکھے نیں جیہڑے نہ صرف اپنے ماپیاں دے پیراں دے نشاناں تے پیر رکھدے ہوئے اَگے ودھے سگوں اوہناں نویں رستے لبھ کے اپنی وکھری پچھان بنائی۔ وڈے رُکھ دی چھانویں پُنگرن آلا حامد میر بہوں گُنی، سوجھ سیانف آلا، اتھرا تے جوش نال بھریا ہویا نوجوان اے۔ بھاویں اوہدے اپنے بال جوان ہو چکے نیں پر اوہ حالے تیکر نوجوانی دی پوڑھی تے مضبوطی نال کھلوتا اے۔ تسیں ویکھ سکدے او تے ویروا وی کر سکدے او کہ پروگرام کردیاں اوہنوں واہوا چِر ہو گیا اے پر اجے تیکر اوہدی لکھت، اوہدی گل بات تے اوہدا ویہار ویکھ کے گویڑ ہوندا اے کہ روز سویرے اِک نوجوان پورے بھروسے تے پوری طاقت نوں دل دے بستے وچ پا کے جابر دنیا دے غیر انسانی سلوک نال لڑن تے دنیا نوں ہمنوا بنان دا عزم لے کے گھروں نِکلدا اے۔
تسیں حامد میر دے ذاتی وچاراں بارے وکھری سگوں مخالف رائے رکھدے ہووو پر فیر وی اوہ تہاڈے دل یاں سوچ وچ اپنی چاہت دی تھاں بنا ای لیندا اے۔ مینوں وی اوہدے کئی پروگراماں تے کالماں نال چنگا بھلا اختلاف اے۔ پر فیر میں سوچدی آں کہ جد بندہ کسے چینل تے بہہ کے پروگرام کردا ہووے تے ضروری نہیں کہ اوہ پورا پروگرام اوہدی اپنی ذہنی سوچ دا گواہ ہووے۔ کئی وار اُپروں آئے حکم اوہدے اَگّے کندھ بن کے کھلو جاندے نیں۔ کدی اوہدے چینل دی منگ ہوندی اے تے کدی سماجی دباؤ یاں ہور کسے ملکی یاں عالمی مسئلے کارن ڈنڈی مارنی پیندی اے۔ ایس لئی جیہناں سرناویاں تے اسیں اوہدے نال آڈا لانے آں اوہناں نوں کنڈھ پِچھے سُٹنا پیندا اے پر اِک گل سچی اے کہ اوہ جس شے نوں حقی گل سمجھ لیندا اے فیر اوہدے لئی اوہ جیویں تن من دھن دی بازی لان لئی ڈٹ جاندا اے اوہ گھٹ گھٹ ویکھن وچ آیا اے۔ ایسے لئی حالے تیکر حامد میر جیہا اِک ای نمونہ اے (نمونہ میں مثبت رنگ وچ آکھیا اے)۔ ایس لئی اجے تیکر پِڑ وچ اوہدا مقابلہ آپ اوہدے اپنے نال ای اے۔ جدوں وی اینکرز دی گل ہووے تے اوہ پہلے نمبر تے کھلوتا دِسدا اے۔ اوہدا پروگرام شروع ہون دا ویلا آوے تے جیو دی ریٹنگ اپنے آپ ودھن لگ پیندی اے۔ حامدمیر دیاں گلّاں لوک سننا چاہندے نیں، اوہ اپنے اکھراں، نویکلے ڈھنگ، سُچل وچاراں تے چین چک سوالاں نال لوکاں دا دھیان کھِچن دا وَل جاندا اے۔
حامد میر دی حیاتی وچ وی کئی رمزاں تے اوہلے نیں۔ اوہدی باہروں لِشکدی ذات دیاں کئی پرتاں نیں۔ اِک لمّی کھیچل تے جبر بالپن توں اوہدے نال نال وڈے ہوئے نیں۔ اجے تیکر اوہنے ویلے دے جبر نوں جہد راہیں وَس وچ کیتا ہویا اے۔ کیہنوں پتہ سی کہ نِکّی عمرے پیو دی مہربان چھاں توں محروم ہو جان آلا بچہ نہ صرف اپنے آپ نوں سنبھالے تے اُجالے گا سگوں اپنے ٹبّر لئی وی چھتری بنے گا تے اوس لوک سماج لئی روشن دان دا کم کرے گا جیہڑا ہنیرے وچ ٹامک ٹوئیاں ماردا آپو چ ٹکر ٹکر کے زخمو زخمی ہوئیا پیا اے۔ ایس روشن دان چوں واج وی آئوندی اے تے چانن وی۔ زمانے دے نال ٹُرنا کوئی سوکھا کم نہیں سی پر حامد میر دے اندر دی ضد، ہمت تے دلیری اوہنوں اَگے ودھن دی ھلہ شیری دتی۔ جیہدی اپنی سنگھنی چھاں کھُس گئی اوہنے چھاں بنن دا عزم کر لیا تے اِک دن پاکستان دا نمبر ون تجزیہ کار بن گیا۔ مینوں وارث میر صاحب نال کئی وار ملن دا اتفاق ہویا۔ بھلا ہووے شعبہ فلسفہ دے اُستاداں دا کہ اوہناں دی دوستی ویلے دے وڈے سوجھواناں، کالم نگاراں، شاعراں تے لکھاریاں نال سی۔ شعبہ فلسفہ وچ پڑھائی دے دوران میری ملاقات اشفاق احمد، بانو قدسیہ تے وارث میر ورگے وڈے لوکاں نال ہوئی۔ وارث میر ہفتے وچ دو تِن وار ساڈے ڈیپارٹمنٹ ضرور آئوندے سن۔ اوہناں دے مکھڑے تے اِک بڑی مشکری آلا میسنا جیہا ہاسا ہوندا سی۔ اوہناں دی شکل اجے وی میرے چیتے وچ اے، اِک درویش، اِک انسان دوست تے اِک بہوں مہربان بندے وانگوں کلیاں پوڑھیاں تے ہولی ہولی اینج پیر دھردے کہ کدھرے اوہناں دا درد نہ جاگ پوے۔ راہداری چوں لنگھدے ہوئے اوہ کسے ہور جگ دے واسی دِسدے سن۔ اوہ جدوں وی آئوندے اسیں پوڑھیاں تے ای بیٹھے ہوندے ساں۔ کجھ چِر ساڈے کول رُک جاندے، پڑھائی بارے پُچھدے۔ نرمی اوہناں دے اکھراں وچ ای نہیں اوہناں دے رویّے توں وی جھلکدی سی۔ میرا قد کیوں جے چنگا لمّا اے تے میری اِک سہیلی شفق وی واہوا لمّی سی۔ جدوں اوہناں نوں پتہ لگا کہ اسیں کسے وی خاص جماعت دے لوکاں نوں اوتھے کسے طرحاں دی بدمعاشی نہیں کرن دیندیاں تے اوس دن توں اوہناں ساڈا نام کراماً کاتبین رکھ دتا۔ خورے اوہ ساہنوں کراماً کاتبین آکھ کے ساڈا حوصلہ ودھاندے سن۔ زنانیاں دے آدر تے زنانیاں دے حقّاں دے حوالے نال وی اوہناں دے خاص وچار سن۔ کئی وار اوہناں نال سانوں سفر کرن دا وی موقع لبھیا۔ اوہ سفر بھاویں نِکّا جیہا ہوندا سی پر سِکھن دے حوالے نال وڈا موقع آکھ سکدے آں۔ جیویں لاہور وچ کوئی میلہ لگیا ہوندا، کوئی بُک فیئر ہوندا یاں کوئی کانفرنس ہوندی۔ اسیں ڈاکٹر غزالہ عرفان تے ڈاکٹر نعیم ہوراں دی شفقت نال اوتھے اپڑدے تے وارث میر ساڈے گروپ دا حصہ ہوندے سن۔ 
ساہنوں اوس ویلے وی ایہہ احساس سی کہ اسیں اِک بہوں وڈے انسان نال ٹُر پھر رہے آں، اوہناں دیاں گلّاں سن رہے آں بعد وچ جدوں اوہناں دیاں لکھتاں پڑھیاں تے فیر سچ مچ اوہناں دی ہستی سمجھ آئی۔ بھاویں اجے فرسٹ ایئر وچ ای ساں جدوں وڈے گھروں اوہناں دا بُلاوا آ گیا پر فیر وی اِک ورھے وچ اساں اوہناں دے مونہوں نِکلے اینے نویکلے اکھر چیتے دی پوٹلی چ جمع کر لئے سی کہ ویلے کویلے اوہناں نوں بال کے راہ لبھ سکئے۔ پِشلے دیہاڑیاں میلہ چراغاں ویلے حامد میر پِلاک آئے، اوہناں نال اوہناں دی دھی رانی وی سی جیہڑی اج کل ولایت دی اِک بہوں وڈی تے نیک نام یونیورسٹی وچ پڑھ رہی اے۔ مینوں ایہہ گل وی بہوں چنگی لگی کہ اوہ کِنّے چاہ تے آہر نال اپنی دھی رانی نوں میلے ٹھیلے تے تاریخی عمارتاں وکھا رہے سن۔ اصل وچ اوہ اوہنوں اپنی ثقافت توں جانُو کروا رہے سن تے ایہدے لئی ضروری سی کہ اوہ آپے نال جا کے اوس بارے جان کاری دیون۔ پِلاک وچ اوس دِن اوہناں تقریباً دو تِن گھنٹے لنگھائے۔ صوفیانہ کلام سُنیا تے اوہدی واہوا داد دِتی۔ فیر ریڈیو تے وی اوہناں نال اُچیچی گل بات ہوئی۔ حیرانی ہوئی کہ اوہناں بِنا کسے تیاری دے جِسراں ساڈے سوالاں دے جواب دِتے اوہدے توں جاپیا کہ اوہناں دا مطالعہ کِنّا ڈونگھا اے تے نرویا اے نالے ایہہ وی خبر ہوئی کہ اوہ اپنی ثقافت، دھرتی تے اپنیاں قدراں نال کِنّی جڑت رکھدے نیں۔ سچی گل اے پہلاں میں سمجھدی ساں کہ اوہ چنگی تیاری کر کے پروگرام کردے نیں۔ پر اوس دیہاڑے احساس ہویا کہ حامد میر کسے وی سرناویں تے کئی گھنٹے گل کر سکدا اے تے اوہدے کول اینیاں دلیلاں، کہانیاں تے سُلکھنیاں یاداں نیں کہ اوہ فر فر بول کے سُنن آلیاں دا من پرچا سکدا اے۔ 
رج کے سوہنا کشمیری مُنڈا شکل صورت ہیرو ورگی سی۔ فلماں وچ آ جاندا تے ساڈی انڈسٹری دے بھاگ جاگ پیندے کیوں جے ایہدے اندر شان تے سلطان راہی دوویں موجود نیں۔ بھڑک وی لا سکدا اے تے مَٹھّے لہجے وچ رومانی ڈائیلاگ وی بول سکدا اے۔ اوہدے تے ربّ دا خاص کرم اے تاں ای لوک اوہدا بہوں آدر کردے نیں، اوہدے نال نِگھّا پیار کردے نیں تے اوہدے نال فوٹو بنان لئی اُتاولے ہوئے پھِردے نیں۔ حامد میر نے اپنے عمل نال، اپنی نَس بھَج نال تے اپنی محنت نال ایہہ ثابت کیتا اے کہ اوہ وڈے پیو دا وڈا پُتر اے۔ اوہ انسانی حقاں دے حوالے نال، جمہوریت دے پھلن ودھن تے محروم طبقے دی واج بنن دے حوالے نال ہر محاذ تے ڈٹ کے کھلوتا اے۔ میں حامد میر لئی دِلوں دعا کرنی آں کہ اوہ ایسے طرحاں بھرویں جذبے تے جوش نال اپنے ملک تے اپنے لوکاں نال جڑیا رہوے تے لوکائی تیکر حق سچ دی گل اپڑاندا رہوے۔ پک نال اجیہے لوک معاشرے دا مونہہ سِر ہوندے نیں۔ جیہڑے سچ بولنا جاندے نیں تے اپنی گل دا پہرا دینا وی اوہناں نوں بہوں سوہنا آئوندا اے۔ اوہ ملک ملک پھر چکیا اے پر اوہدے دل وچ صرف پاکستان وَسدا اے۔ اوہ ساری دنیا دیاں ونگیاں لے کے ایس ملک وچ آئوندا اے تے فیر ایہنوں سنوارن دے جتن کردا اے۔ ایہدے لئی اوہ حق مارن آلیاں دی بھرویں نندیا کردا اے تے چنگے کم دی سلاہنا وی رج کے، جیہڑے لوک سماج دی بہتری لئی کَم کردے نیں اوہ اوہناں دے نال کھلون نوں تیار اے۔ جیہڑے ایہنوں تھلّے لے جان دا کارن بن دے نیں اوہ اوہناں دا راہ ڈَکن دا آہر کردا اے۔ اوہدا پیار لوکاں نال وی اے تے دھرتی نال وی، جے گل انسانیت دی ہووے تے اوہدا دائرہ ہور کھِلر جاندا اے۔ فیر اوہ پورے جگ دے لوکاں نال جا کھلوندا اے۔ دنیا وچ کسے وی تھاں ظلم ہووے اوہ اوہناں دی واج بننا یاں اوہناں لئی کجھ اکھر آکھنا اپنا فرض سمجھدا اے۔ بندے نوں ایسراں دا ای ہونا چاہیدا اے۔ شکریہ حامد میر، شالا جیوندا رہ، بولدا رہ، ہسدا رہ تے اَگے ودھدا رہ۔ 
٭٭٭
Müllsäcke, Abfallsäcke alle Sorten. Gewebesäcke. Kartoffelsäcke. Laubsäcke. Raschelsäcke. Zwiebelsäcke. Spänesäcke. Hochwertige Waren vom Produzent. Fabrikverkauf. Versand am gleichen Tag aus Frankfurt. Bis 95 % günstiger als auf dem Markt. Arbeitshandschuhe und Vieles mehr. Info auf: folmax.pw Mit freundlichen Grüßen

نئی تبصرہ شامل کریں

About text formats

متعلقہ خبریں

خارجہ تعلقات

تحریر:

اسداللہ بھلر

 

جولائی 09, 2018

کیہ میرے "جانوں" چور نیں؟

تحریر: جاوید ملک

مئی 12, 2018

ملکی ترقی دی ضامن سوچ

عبدالباسط

ملک نوں ترقی دی شآہراہ اتے چلان‘ اقتصادی تے معاشی سرگرمیاں نوں فروغ دین تے عوام دے مسئلے تے مشکلاں حل کرن لئی ملکی اداریاں دے س

اپریل 09, 2018