ون ڈے کپ: فواد عالم نے کراچی وائٹس نوں ٹائٹل جتوا دِتا

لہور: قومی ون ڈے ریجنز کپ دا ٹائٹل کراچی وائٹس نے اپنے ناں کر لیا جد کہ فواد عالم فیصلہ کن میچ دے ہیرو رہے۔
قومی ون ڈے ریجنز کپ کراچی وائٹس دے چیمپئن بنن نال مُک گیا اے، فائنل وچ اسلام آباد نوں 5وكٹاں توں ناكامی دا ساهنما كرنا پیا، پنڈی كركٹ اسٹیڈیم راولپنڈی وچ هون والے ایس میچ وچ اسلام آباد نے بابر اعظم، شاهد یوسف تے شان مسعود دی عمده بیٹنگ دی بدولت 4 وکٹاں تے 347 دا مجموعہ تشکیل دِتا۔
شان مسعود تے عابد علی نے اسلام آباد نوں 83 رنز دا چنگا آغاز فراهم كیتا، شان مسعود 51 رنز بنا کے پویلین لوٹ گئے، اسد شفیق نے اوہناں نوں آؤٹ کیتا۔
ایس موقع تے بابر اعظم تے شاہد یوسف نے ذمہ دارانہ بیٹنگ کردیاں ٹیم دے مجموعی اسکور نوں 298 رنز تیک اپڑا دِتا۔ بابر اعظم نے 105 تے شاهد یوسف نے 96رنز دی اننگز كھیڈی۔
جواب وچ کراچی وائٹس نے فواد عالم تے دانش عزیز دی عمدہ بیٹنگ دی بدولت ہدف 49.3اوورز وچ حاصل كر لیا۔ كراچی دا آغاز چنگا نہ سی تے صرف 38رنز تے خرم منظور 7تے اسد شفیق 22پویلین جا چكے سن، ایس موقع تے اكبر الرحمٰن تے فواد عالم نے كھیڈ کے بیٹنگ دے جوہر وکھائے تے ٹیم دے مجموعی اسکور نوں 134رنز تك اپڑا دِتا جدكه فواد عالم نے 18چوکیاں دی مدد نال 149 رنز بنا کے اپنی ٹیم نوں فتح دے نیڑے اپڑا دِتا۔ بعدوں دانش عزیز نے ناٹ آؤٹ 86رنز بنا كے فتح اپنی ٹیم دی جھولی وچ پا دِتی۔
اختتامی تقریب دے مہمان خصوصی چیئرمین پی سی بی نجم سیٹھی دے مشیر شکیل شیخ نے کھڈاریاں وچ انعامات ونڈے۔