پارلیمنٹ آرمی چیف دی توسیع دے معاملے دا ہمیشہ لئی حل کڈھے: سپریم کورٹ

اسلام آباد: سپریم کورٹ نے آرمی چیف دی مدت ملازمت وچ توسیع دے معاملے تے تفصیلی فیصلہ جاری کر دتا اے۔

فیصلے وچ آکھیا گیا اے چھ مہینے وچ معاملہ حل نہ ہو سکیا تے وزیراعظم دی سفارش تے صدر مملکت حاضر سرور جنرل نوں نواں سربراہ مقرر کرن گے۔

آرمی چیف دی مدت ملازمت وچ توسیع دے معاملے تے سپریم کورٹ نے تفصیلی فیصلہ جاری کر دتا اے۔

43صفحیاں تے مشتمل ایہ فیصلہ جسٹس منصور علی شاہ نے تحریر کیتا جد کہ چیف جسٹس آف پاکستان جسٹس آصف سعید کھوسہ نے 2صفحیاں تے مشتمل اضافی نوٹ تحریرکیتا۔ چیف جسٹس آصف سعید کھوسہ نے اضافی نوٹ وچ لکھیا کہ میں جسٹس منصور علی شاہ دے لکھے فیصلے نال اتفاق کرنا آں۔ تریخ دسدی اے کہ چیف آف آرمی سٹاف دا عہدہ طاقتور اے۔

سپریم کورٹ ولوں جاری تفصیلی فیصلے وچ آکھیا گیا اے جنرل دی مدت ملازمت تے ریٹائرمنٹ قنون وچ متعین نہیں، آرمی چیف دی مدت ملازمت دا معاملہ مستقل بنیاداں تے حل کیتا جاوے۔ فیصلے وچ آکھیا گیا اے قنون وچ جنرل دی مدت ملازمت بارے کوئی شق موجود نہیں اے۔

منتخب نمائندیاں دی ذمہ داری اے کہ اوہ معاملے تے قنون سازی کرن۔

تفصیلی فیصلے دے مطابق وزارت دفاع دی صدر، وزیراعظم تے کابینہ توں منظوری قنون دے بغیر بے معنی اے۔

آرمی ریگولیشن دا سیکشن 255جنرل دی مدت ملازمت وچ توسیع دا اختیار نہیں دیندا۔ سیکشن 255صرف عارضی مدت ملازمت لئی استعمال ہو سکدا اے۔

عدالت عالیہ ولوں آرمی چیف دی مدت ملازمت وچ توسیع دے معاملے تے جاری تفصیلی فیصلے وچ آکھیا گیا حکومت نے 6مہینے وچ قنون سازی دی یقین دہانی کرائی۔ جے چھ مہینے وچ قنون سازی نہ ہوئی تے حاضر سروس جنرل نوں نواں آرمی چیف مقرر کراں گے۔

نواں آرمی چیف صدر تے وزیراعظم دی سفارش تے مقرر کیتا جاوے گا۔