چونیاں وچ چار بالاں نال زیادتی تے قتل، مجرم سہیل شہزاد نوں تن واری سزائے موت

لہور: انسداد دہشت گردی دی خصوصی عدالت نے چونیاں وچ چار بالاں نوں زیادتی دا نشانہ بنا کے قتل کرن والے سفاک مجرم سہیل شہزاد نوں تن واری سزائے موت دین دا حکم سنا دتا اے۔

ایہ فیصلہ دہشت گردی دی خصوصی عدالت دے جج محمد اقبال نے کوٹ لکھپت جیل وچ سنایا۔ اوہناں نے مجرم سہیل شہزاد نوں ایس کیس وچ اک واری عمر قید دی سزا وی سنائی۔

انسداد دہشت گردی عدالت نے مجرم سہیل شہزادہ دے خلاف 23گواہواں دے بیانات قلمبند کیتے جد کہ مجرم دا 342دا حتمی بیان وی ریکارڈ کیتا گیا۔ ڈپٹی پراسیکیوٹر جنرل عبدالرؤف وٹو دی سربراہی وچ تن رکنی ٹیم نے دلائل دتے۔

سکیورٹی ایشوز دی وجہ توں ملزم دا جیل ٹرائل کیتا گیا۔ یاد رہوے وزیراعلیٰ پنجاب عثمان بزدار نے ایس ورھے یکم اکتوبر نوں بالاں دے قاتل مجرم سہیل شہزاد نوں گرفتار کرن دا اعلان کیتا سی۔ ایہدے بعد پلس نے 2اکتوبر نوں انسداد دہشت گردی عدالت وچ ایہنوں پیش کرکے ایہدا جسمانی ریمانڈ حاصل کیتا۔